यहोशू 15

यहूदा गोट्लेरी ज़मीन

1 यहूदा गोट्लेरे लोकां केरो हिस्सो तैन केरे कुलां केरे मुताबिक चिट्ठी छ़डने सेइं एदोमी लोकां केरे बन्ने तगर, ते दक्षिणेरे पासे सीन सुनसान ठारी तगर ज़ै दक्षिण पासेरे बन्ने पुड़े तै भोव। 2 तैन केरो हिस्सो दक्षिण पासेरे बन्ने करां लेइतां खारे समुन्दरे*15:2 खारे समुन्दरे मौतरो समुन्दर तगर तैस सिरे बाले पासे करां शुरू भोव ज़ै दक्षिणेरे पासे; 3 ते तै अक्रब्बीम नंव्वेरे सुनसान ठारारे दक्षिणी पासेरां निस्तां सीने मांमेइं कादेशबर्ने नगरेरे दक्षिणेरे पासे च़ेढ़ी जेव, फिरी हेस्रोन नगरेरे पासे अद्दार नगरे जो च़ेढ़तां कर्काआ नगरेरे पासे मुड़ी जेव, 4 तैट्ठां अस्मोन नगरे मांमेइं भोइतां तै मिस्रेरे नाले पुड़ हद निस्सी, ते तैस हद्दरो अन्त भूमध्य-सागर भोव। तुश्शी दक्षिणी पासेरी हद ऐह हद भोल्ही। 5 फिरी पूर्वेरी हद यरदन दरियाएरे बन्ने तगर खारे समुन्दरे तगर राई, ते उत्तरेरे पासेरो बन्नो यरदन दरियाएरे बन्ने करां खारे समुन्दरेरे खैड़ी करां शुरू केरतां, 6 बेथोग्ला नगरे जो च़ेढ़तां बेतराबारे उत्तरेरे पासे भोइतां रूबेनी बोहन नंव्वेरे बड्डे घोड़े तगर पुज़्ज़ी; 7 ते तैए हद आकोर नंव्वेरी वैदी करां दबीर नगरेरे पासे च़ेढ़ी जेई, ते उत्तरेरे पासेरां गिलगालेरे पासे झुकी ज़ै वैदी करां दक्षिणेरे पासे अदुम्मीमेरी चढ़ेइयरे सामने; तैट्ठां तै एनशेमेश नंव्वेरे नागे कां पुज़तां एनरोगेले पुड़ निस्सी; 8 फिरी तैए हद हिन्नोमेरे मट्ठेरी वैदी करां लेइतां यबूस ज़ैस जो यरूशलेम ज़ोतन तैसेरे दक्षिणेरे पासे तैस पहाड़ेरी च़ोटी पुड़ पुज़्ज़ी, ज़ै पश्चिमेरे पासे हिन्नोमेरे वैदरे सामने ते रपाईमेरे वैदरे उत्तरेरे पासे च़ोटी पुड़े; 9 फिरी तैए हद तैस पहाड़ेरी च़ोटी करां नेप्तोह नंव्वेरे नागे तगर च़ेलि जेई, ते एप्रोन पहाड़ेरे नगरन पुड़ निस्सी; फिरी तैट्ठां बाला नगरे जो (ज़ैस जो किर्यत्यारीम नगर भी ज़ोतन) तैड़ी पुज़्ज़ी; 10 फिरी तै बाला करां पश्चिमेरे पासे मुड़तां सेईर पहाड़े तगर पुज़्ज़ी, ते यारीम पहाड़ (ज़ैस जो कसालोन भी ज़ोतन) तैसेरे उत्तरी पासे भोइतां बेतशेमेश नगरेरे पासे उतरी जेई, ते तैट्ठां तै तिम्नाह नगरे पुड़ निस्सी; 11 तैट्ठां तै हद एक्रोन नगरेरे उत्तरी पासेरां भोइतां शिक्‍करोन नगरे जो जेई, ते बाला पहाड़े करां लेइतां यब्नेले पुड़ निस्सी; ते तैसेरी हद्दरो अन्त भूमध्य सागरेरो बन्नो भोव। 12 ते पश्चिमेरे पासेरी हद भूमध्य-सागरेरो बन्नो भोव। यहूदी लोकां केरो ज़ै हिस्सो तैन केरे कुलां केरे मुताबिक मैल्हो तैसेरे च़ेवरे पासां केरो बन्नो ऐह राव।

13 ते यपुन्नेरे मट्ठे कालेबे तैनी यहोवारे हुक्मेरे मुताबिक यहूदी लोकां केरे मझ़ाटे हिस्सो दित्तो, मतलब किर्यतअर्बा ज़ैस जो हेब्रोन भी ज़ोतन (तै अर्बा अनाकेरो बाजी थियो)। 14 ते कालेबे तैट्ठां शेशै, अहीमन, ते तल्मै नंव्वेरे, अनाकेरां ट्लाईए मट्ठां कढा। 15 फिरी तैट्ठां तैनी दबीर नगरेरे रानेबाले लोकन पुड़ हमलो कियो; पेइले त दबीरेरू नवं किर्यत्सेपेर थियूं। 16 ते कालेबे अपने लोकन सेइं ज़ोवं, "ज़ै किर्यत्सेपेर नगरे सेइं लड़ाई केरतां ज़ींते तैस जो अवं अपनि कुई अकसा ड्लेइतां देइलो।" 17 तैखन कालेबेरे निकड़े ढ्ला कनजी एरे मट्ठे ओत्नीएले तैन नगर ज़ींतू; ते कालेबे तैस जो अपनि कुई अकसा ड्लेइतां दित्ती। 18 ज़ैखन अकसा ओत्नीएले सेइं ड्लाह बनाव, तैखन तैनी अपनि कौन्श अपने बाजी करां किछ ज़मीन मगनेरे लेई शिखाली, फिरी ज़ैखन तै अपने गधे पुड़ेरां ओस्सी, ते कालेबे तैस पुछ़ू, "तू कुन चातिस?" 19 तै ज़ोने लगी, "मीं किछ होरि ज़मीन दे; तीं मीं दक्षिण इलाके मां किछ ज़मीन त दित्तोरिए, पन मीं पैनेरे नाग भी दे।" तैखन तैनी तैस बेइयें पासेरे नाग, ते बुनीयें पासेरे नाग, दूईये दित्ते।✝15:19 न्या. 1:11-15.

20 यहूदी लोकां केरे गोट्लां केरो हिस्सो त तैन केरे कुलां केरे मुताबिक ऐह भोव।

21 यहूदी लोकां केरे गोट्ले सेइं साथी रानेबाले नगर दक्षिण मुल्खे मां एदोम प्रदेशेरी हद्दरे पासे इना आन, कबसेल, एदेर, यागूर, 22 कीना, दीमोना, अदादा। 23 केदेश, हासोर, यित्नान। 24 जीप, तेलेम, बालोत, 25 हासोर्हदत्ता, करिय्योथेस्रोन (ज़ैस जो हासोर भी ज़ोतन), 26 ते अमाम, शेमा, मोलादा, 27 हसर्गद्दा, हेशमोन, बेत्पेलेत, 28 हसर्शूआल, बेर्शेबा, बिज्योत्या, 29 बाला, इय्यीम, एसेम, 30 एलतोलद, कसील, होर्मा, 31 सिकलग, मदमन्ना, सनसन्ना, 32 लबाओत, शिल्हीम, ऐन, ते रिम्मोन; इना सब नगर 29 आन, ते एनकेरां ड्लाव्वां भी आन।

33 वैदी मां इना आन, एश्ताओल, सोरा, अश्ना, 34 जानोह, एनगन्नीम, तप्पूह, एनाम, 35 यर्मूत, अदुल्‍लाम, सोको, अजेका, 36 शारैंम, अदीतैम, गदेरा, ते गदेरोतैम; इना सब 14 नगर आन, ते एनकेरां ड्लाव्वां भी आन।

37 फिरी सनान, हदाशा, मिगदलगाद, 38 दिलान, मिस्पे, योक्तेल, 39 लाकीश, बोस्कत, एग्लोन, 40 कब्बोन, लहमास, कितलीश, 41 गदेरोत, बेतदागोन, नामाह, ते मक्‍केदा; इना सब 16 नगर आन, ते एनकेरां ड्लाव्वां भी आन।

42 फिरी लिब्ना, एतेर, आशान, 43 इप्ताह, अश्ना, नसीब, 44 कीला, अकजीब ते मारेशा; इना सब 9 नगर आन, ते एनकेरां ड्लाव्वां भी आन।

45 फिरी नगरन ते ड्लाव्वन समेत एक्रोन, 46 ते एक्रोने करां लेइतां भूमध्य-सागरे तगर, अपने-अपने ड्लाव्वन समेत ज़ेत्रे नगर अश्दोदेरे पासेन।

47 फिरी अपने-अपने नगरन ते ड्लाव्वन समेत अश्दोद ते गाज़ा, बल्के मिस्र मुल्खेरे नाले तगर ते भूमध्य-सागरेरे बन्ने तगर ज़ेत्रे नगरन।

48 पहाड़ी मुल्खे मां इना आन, शामीर, यत्तीर, सोको, 49 दन्ना, किर्यत्सन्ना (ज़ैस जो दबीर भी ज़ोतन), 50 अनाब, एश्तमो, आनीम, 51 गोशेन, होलोन ते गीलो; इना 11 नगरन, ते एनकेरां ड्लाव्वां भी आन।

52 फिरी अराब, दूमा, एशान, 53 यानीम, बेत्तप्पूह, अपेका, 54 हुमता, किर्यतअर्बा (ज़ैस जो हेब्रोन भी ज़ोतन, ते सीओर) इना 9 नगरन, ते एनकेरां ड्लाव्वां भी आन।

55 फिरी माओन, कर्मेल, जीप, युत्ता, 56 यिज्रेल, योकदाम, जानोह, 57 कैन, गिबा, ते तिम्नाह; इना 10 नगरन ते एनकेरां ड्लाव्वां भी आन।

58 फिरी हलहूल, बेतसूर, गदोर, 59 मरात, बेतनोत ते एलतकोन; इना 6 नगरन ते एनकेरां ड्लाव्वां भी आन।

60 फिरी किर्यतबाल (ज़ैस जो किर्यत्यारीम भी ज़ोतन) ते रब्बाह; इना दूई नगरन, ते एनकेरां ड्लाव्वां भी आन।

61 सुनसान ठैरी मां इना नगरन, बेतराबा, मिद्दीन, सकाका; 62 निबशान, लूनेरू नगर ते एनगदी, इना 6 नगरन ते एनकेरां ड्लाव्वां भी आन।

63 यरूशलेम नगरेरे रानेबाले यबूसी लोकन यहूदी न केढी सके; एल्हेरेलेइ अज़्ज़ेरे दिहाड़े तगर यबूसी लोक यहूदी लोकन सेइं साथी यरूशलेम नगरे मां रहतन।