न्यायी 13

शिमशोनेरू ज़र्म

1 तैन दिहाड़न मां इस्राएली लोकेईं फिरी यहोवारी नज़री मां बुराई की; एल्हेरेलेइ यहोवाए तैना पलिश्ती लोकां केरे कब्ज़े मां 40 सालन तगर रख्खे।

2 तैन दिहाड़न मां दानेरे कुलेरे सोरा नगरेरे रानेबाले मानोह नंव्वेरो अक मैन्हु थियो, ज़ेसेरी कौन्श बेऔलाद भोनेरे वजाई सेइं कोई मट्ठू न थियूं। 3 एक्सां एस कौन्शी यहोवारे भेज़ोरे दूते दर्शन देइतां ज़ोवं, "शुन, चाए बेऔलाद भोनेरे वजाई सेइं तेरो बच्‍चो नईं; पन हुनी तू दोज़ींती भोनिस ते तीं मट्ठू भोल्हु। 4 एल्हेरेलेइ हुना करां ध्यान रख, कि न त तू दाछ़रो रस या कोई होरि किसमेरी शराब पीयां, ते न कोई अशुद्ध चीज़ खेइयां,✝13:4 लूक. 1:15. 5 किजोकि तू दोज़ींती भोनिस ते तीं अक मट्ठू भोल्हु। ते तैसेरे दोग्गे पुड़ छ़ुरो न लेइयां, किजोकि तै ज़रमने करां परमेशरेरो नाज़ीर*13:5 नाज़ीर इब्रानी मां इस शब्देरो मतलब भोते कि परमेशरेरे लेई खास वाधो कियोरो रालो; ते इस्राएली लोकन पलिश्ती लोकां केरे हथ्थे मरां छुटानेबालो भोल्हो।" 6 तैस कौन्शां अपने मुन्शे कां गेइतां ज़ोवं, "परमेशरेरो अक मैन्हु मीं कां एवरो थियो ज़ेसेरू रूप परमेशरेरे दूतेरू ज़ेरू महिमा बालू थियूं; ते मीं तैस न पुछ़ू कि तू कोड़ि रहतस? ते न तैनी मीं अपनु नवं ज़ोवं; 7 पन तैनी मीं सेइं ज़ोवं, ‘शुन तू दोज़ींती भोनिस ते तेरू अक मट्ठू भोल्हु; एल्हेरेलेइ हुनी न त दाछ़रो रस ते न कोन्ची किसमेरी शराब पीयां, ते न कोई अशुद्ध चीज़ खेइयां, किजोकि तैन मट्ठू ज़रमने करां मरने तगर परमेशरेरू नाज़ीर रालू।’"

8 तैखन मानोहे यहोवा कां ई बिनती की, "हे प्रभु, बिनती शुन, परमेशरेरो ई मैन्हु ज़ै तीं भेज़ोरो थियो फिरी असन कां एज्जे, ते असन शिखाले कि ज़ैन मट्ठू पैदा भोनेबालूए तैस सेइं अस कुन-कुन केरम।" 9 मानोहेरी ई बिनती यहोवा शुनी, एल्हेरेलेइ ज़ैखन तै कौन्श उडारे मां बिशोरी थी, ते तैसेरो मुन्श मानोह तैस सेइं साथी न थियो, तैखन परमेशरेरो तैए दूत तैस कां अव। 10 तैखन तैस कौन्शां लूशी दौड़तां अपने मुन्शे जो ई खबर दित्ती, "ज़ै मैन्हु तैस दिहाड़े मीं कां एवरो थियो तैनी मीं दर्शन दित्तोरूए।" 11 एन शुन्तां मानोह उठतां अपनि कौन्शी सेइं साथी च़लो, ते तैस मैन्हु कां नेड़े एइतां पुछ़ू, "कुन तू तैए मैन्हु आस ज़ैनी इस कौन्शी सेइं गल्‍लां कियोरी थी?" तैनी जुवाब दित्तो, "अवं तैए आईं।" 12 मानोहे ज़ोवं, "ज़ैखन तेरी गल्‍लां पूरी भोइ गान त, तैस बच्‍चेरी ज़िन्दगी कोस तरीके सेइं भोल्ही ते तैसेरू कुन कम भोल्हु?" 13 यहोवारे दूते मानोहे सेइं ज़ोवं, "ज़ेत्री चीज़ां केरि चर्चा मीं इस कौन्शी सेइं कियोरी थी तैन सेभन करां ई दूर राए। 14 ज़ांतगर बच्‍चो न भोए तांतगर ई कोई दाछ़री बनोरी चीज़ न खाए, ते न दाछ़रो रस ते न कोन्ची किसमेरी शराब पीये, ते न कोई कानूनेरे मुताबिक अशुद्ध चीज़ खाए; ते ज़ै हुक्म मीं एस जो दित्तोरो थियो तैस्से मन्ने।"

15 मानोहे यहोवारे दूते सेइं ज़ोवं, "अस तीं रोकम, कि तेरे लेई अक छ़ेड़ू पकेइतां तियार केरम।" 16 यहोवारे दूते मानोह सेइं ज़ोवं, "चाहे तू मीं रोकतां रख्खस, पन अवं तेरी रोट्टी मरां किछ न खेइलो; ते अगर तू होमबलि केरनी चास त यहोवारे लेई केर।" (मानोह त न थियो ज़ानतो, कि ई यहोवारो दूते।) 17 मानोहे यहोवारे दूते पुछ़ू, "अपनु नवं ज़ो, एल्हेरेलेइ कि ज़ैखन तेरी गल्‍लां पूरी भोन तैखन अस तेरी आदर केरि सखम।" 18 यहोवारे दूते तैस सेइं ज़ोवं, "मेरू नवं त समझ़ी करां बेइरे, एल्हेरेलेइ तू तैस किजो पुछ़तस?" 19 तैखन मानोहे अन्नबलि ते अक छ़ेड़ू नेइतां चट्टानी पुड़ यहोवारे लेई च़ाढ़ू तैखन तैनी दूते मानोह ते तैसेरी कौन्शरे हेरते-हेरते अक बड़ू बड्डू कम कियूं। 20 पन ज़ैखन लप तैस वेदी पुड़ेरां अम्बरेरे पासे उठती रहती थी, तैखन यहोवारो दूत तैस वेदरे लप्पी मां भोइतां मानोह ते तैसेरी कौन्शरे हेरते-हेरते उबरो च़लो जेव; तैखन तैना ज़मीनी पुड़ तुत्तरेरे भारे झुके।

21 पन यहोवारे दूते मानोह ते तैसेरी कौन्शी फिरी कधे दर्शन न दित्तू। तैखन मानोहे समझ़ू कि तै यहोवारो दूत थियो। 22 तैखन मानोहे अपनि कौन्शी सेइं ज़ोवं, "अस सच़्च़े मेरि गानेम, किजोकि असन परमेशरेरू दर्शन मैल्होरूए।"✝13:22 न्या. 6:22-23. 23 तैसेरी कौन्शां तैस सेइं ज़ोवं, "अगर यहोवा असन मारनो चाथो, त इश्शे हथ्थे सेइं होमबलि ते अन्नेरी बलि कबूल न केरेथो, ते न तै एरी सैरी गल्‍लां असन हिराथो, ते न तै एस मौके असन एरी गल्‍लां शुनाथो।" 24 किछ वक्तेरां बाद तैस कौन्शी अक मट्ठू भोवं, ते तैसेरू नवं शिमशोन रख्खू; ते तै बच्‍चो बेडोतो जेव, ते यहोवा तैस बरकत देतो राव। 25 ते यहोवारो आत्मा सोरा नगर ते एश्ताओलेरे महनेदाने मां तैस उभारने लगो।