Juízes 5

दबोरारू गीत

1 लड़ाई खतम भोनेरां बाद तैस दिहाड़े दबोरा ते अबीनोअमेरे मट्ठे बाराके एन गीत ज़ोवं:

2 "इस्राएलेरे प्रधानेईं ज़ै अगवाई की ते लोक ज़ैना अपनि मेर्ज़ी सेइं जंगरे लेई भरती भोए,

एसेरे लेई यहोवारी तारीफ़ केरा!

3 हे राज़व, शुना; हे हुकूमत केरनेबालव ध्यान देथ,

अवं यहोवारे लेई गीत ज़ोली;

इस्राएलेरे परमेशर यहोवारू अवं भजन ज़ोली।

4 हे यहोवा, ज़ैखन तू सेईर मुल्खे मरां निस्सो,

ज़ैखन तीं एदोम प्रदेशे मरां सफर शुरू कियूं,

तैखन धरती कम्बने लगी, ते अम्बरेरां झ़ड़ी बखने लग्गी,

बिदलारी मरां भी पानी बखने लगू।✝5:4 इब्रा. 12:26.

5 यहोवारे एजने सेइं पहाड़,

इस्राएलेरे परमेशर

यहोवारे प्रतापे सेइं सीनै पहाड़ हिलने लगू।

6 अनातेरे मट्ठे शमगरेरे हुकूमत केरनेरे दिहाड़न मां,

ते याएलेरे हुकूमत केरनेरे दिहाड़न मां सड़कां खाली पेवरी थी,

ते मुसाफर होरी बत्ती पुड़ च़लते थिये।

7 ज़ांतगर अवं दबोरा न खड़ी भोइ,

ज़ांतगर अवं इस्राएले मां अम्मा भोइतां न खड़ी भोइ,

तांतगर ड्लाव्वां खाली थियां।✝5:7 2 शमू. 20:19.

8 इस्राएले नंव्वे-नंव्वे देबते आराधना केरनेरे लेई च़ुने,

तैस मौके फाटकन मां लड़ाई भोती थी।

कुन 40000 इस्राएली लोकन मां भी ढाल

या भालो कोन्च हेरने मां लेइयोतो थियो?

9 मेरो दिल इस्राएलेरे हाकिमां केरे पासे लगोरोए,

ज़ैना लोकन मां अपनि मेर्ज़ी सेइं शामल भोए।

यहोवारी तारीफ़ केरा।

10 हे छ़ित्ती गेधी पुड़ सुवारी केरने बालाव,

हे गालीचन पुड़ बिशने बालव,

हे बत्तन पुड़ पैदल च़लने बालव खियाल रखा।

11 पैनी पुड़ आसे-पासे बान च़लाने बालां केरि गल्‍लां केरे वजाई सेइं,

तैड़ी तैना यहोवारे धर्मी कम्मां केरू,

इस्राएली केरे लेई तैसेरे धर्मी कम्मां केरू बियान केरेले।

तैस मौके यहोवारे भक्त लोक नगरेरे फाटकन कां जे।

12 तैखन लोक मेरे घरे आए ते ज़ोने लगे, बींझ़, बींझ़, हे दबोरा!

बींझ़, बींझ़, गीत शुना! हे बाराक, उठ,

हे अबीनोअमेरे मट्ठां,

अपने दुश्मन्न गुलैमी मां च़ला।

13 तैस मौके थोड़े ज़ेरे रईस लोक आए;

यहोवा शूरबीरां केरे खलाफ, ते मेरे हक्‍के मां अव।✝5:13 रोम. 8:37;भज. 75:7.

14 एप्रैमे मरां तैना आए ज़ैन केरू ज़ील अमालेके मांए;

हे बिन्यामीन, तीं पत्ती तेरे टोलन मां,

माकीरेरे खानदाने मरां हाकिम, ते जबूलूनेरे खानदाने मरां सेनापति एरहो अधिकार घिन्तां आए;

15 ते इस्साकारेरे हाकिम दबोरा सेइं साथी भोए,

ज़ेरो इस्साकार तेरहो बाराक भी थियो;

तैस पत्ती च़लोरे लोक गेइतां वैदी मां अकदम जे।

रूबेनेरे दरियान कां नेड़े बड्डां-बड्डां कम्मां मने मां थापा जेआं।

16 तू पुहालां केरि सीटी बज़ानी शुन्ने जो गब्बां केरे बाड़ां केरे मझ़ाटे किजो बिशोरो राव?

रूबेनेरे दरियान कां बड्डां-बड्डां कम्मां सोचां जेआं।

17 गिलाद यरदन दरियारे पार रेही जेव; ते दान किजो समुन्दरी ज़िहाज़न मां रेही जेव?

आशेर समुद्रेरे बन्ने पुड़ बिशोरो राव,

ते तैसेरे खैड़न कां रेही जेव।

18 जबूलूनेरे लोक अपने जानी पुड़ खैढने बाले बने;

ते नप्ताली लोक भी मुल्खेरे जंगरे उच्‍चे-उच्‍चे ठारन पुड़ तेरहे निस्से।

19 राज़ो एइतां लड़ो,

तैस मौके कनानेरो राज़ो

मगिद्दोरे नागन कां नेड़े तानाके मां लड़े;

पन तैन्न लूट-पाटी मां किछ भी चाँदी न मैल्ही।

20 अम्बरेरे तरफां भी लड़ाई भोइ;

बल्के तारेईं अपने-अपने जगारां सीसरा सेइं लड़ाई की।

21 कीशोन दरियाए तैना रूड़ेई छ़डे,

मतलब तैए पुरानो दरिया ज़ै कीशोन दरियाए।

हे मेरे मन, हिम्मत रेखतां अग्रोवं च़ल।

22 तैस मौके घोड़ां केरे रौन्ने सेइं टापकनेरी आवाज़ भोने लगी,

तैन केरे ताकतबर घोड़ां केरे उछ़ड़ने सेइं एन भोवं।

23 यहोवारो दूत ज़ोते,

कि मेरोज नगरे लानत देथ; तैसेरे रानेबालन भारी लानत देथ,

किजोकि तैना यहोवारी मद्दत केरने जो,

बहादर मैन्हु केरे खलाफ यहोवारी मद्दत केरने जो न आए।

24 सैरी कौन्शन मरां हेबेर केनेरी कौन्श याएल धन भोल्ही;

डेरन मां रानेबैली सैरी कौन्शन मां तै धन भोल्ही।

25 सीसरा पानी मग्गु, तैसां दुद्ध पियावं,

रईस लोकां केरे काबल भांडे मां तै मखन घिन्तां अई।

26 तैसा अपनो हथ खीलेरे पासे,

अपनो देइनो हथ ट्लीखानरेरे हथोड़ेरे पासे अग्रोवं कियो;

ते हथोड़े सेइं सीसरा मारो, तैसेरो दोग भेन्नी छ़डो,

ते तैसेरे कन वार-पार छ़िन्दे।

27 तैस कौन्शरे पव्वन पुड़ तै झुको, तै बिछ़ड़ो, तै रेही जेव;

तैस कौन्शरे पव्वन पुड़ तै झुको, तै बिछ़ड़ो;

ज़ैड़ी झुको, तैट्ठी मरोरो राव।

28 दैरी मरां सीसरारी अम्मा हेरतां चिन्डां मरने लगी,

ते जैली मरां आवाज़ दित्ती,

‘तैसेरे रथ एजने मां एत्रू च़िर किजो लगू?

तैसेरे रथ्थां केरे पेइहन च़िर किजो भोवरूए?’

29 तैसेरी अक्लमन्द कौन्शेइं तैस जुवाब दित्तो,

बल्के तैसां अपने आपे एन्च़रां सेइं जुवाब दित्तो,

30 ‘कुन तैनेईं लूट-पाट मैलतां न बंटी?

कुन एक्‍की-एक्‍की मड़दे अक-अक बल्के दूई-दूई कुइयां;

ते सीसरा जो रंगदार लिगड़ां केरि लूट,

बल्के कढ़ाई कियोरे रंगदार लिगड़ां केरि लूट,

ते लुटोरां केरे गले मां दूईये पासे कढ़ाई कियोरां रंगदार लिगड़ां न मैल्हां?’

31 तैन लोक गीत ज़ोने लगे, हे यहोवा, तेरे सारे दुश्मन एन्च़रे ही मुक्‍की गान!

पन तैसेरे ट्लारे लोक प्रतापे सेइं साथी निसते दिहाड़ेरे ज़ेरे बड़े महिमा बाले भोन।"

फिरी मुल्खे मां 40 सालन तगर आराम राव।