1 Yɛ ɛ́ mam Pɔl, mot-lwoma ɛ Yezu Klisto tɔ ɛkwosak ɛ Zɛɛb Mɛtsik-bot yenaka, nɛ tɔ ɛkwosak ɛ Yezu Klisto, ɛbwaalel ɛ lenaka.

2 Mɛ kwyal ɛ́ wɔy Timote tɛtɛ mɔn’am tɔ ɛdum ɛ koŋ nɛ Zɛɛb mɛkana mak. Beta náá, enɛm nɛ embɛɛ, nɛ lyem ghoŋ, zɛnɔɔ egwyem di edus pɛ daa Zɛɛb Sɛɛg nɛ pɛ daa Yezu Klisto Ghɛŋ’enaka ɛ, di nɛ nɔ.

3 Dáa mɛ nake nɛ nɔ é sok mɛ nadi etɔ́ pɛ kyee dik Masedwan ɛ, dia tɔ ghaada Efɛɛz. Etɛɛ náá, penek ɛ́ nɛ bot ɛ di elyo bot embee mɛlyo ɔ. É di’enek, ye goka ɛ́ wɔ bhɛm bɛ, bɛ kat. 4 Lɛɛa bɛ náá, bɛ bet ɛsesa esua-esua nɛ ɛlaŋ ɛ ekɔkɔ e mɛbyel yii bɛpaa di ààsi ɛ. Etɛɛ náá, yɛ ɛ́ ɛpewaaz bot nɛ ɛdjóo ɛ́ mɛwɔ. Tin, ɛkaada etɛp binek ààsa náá, mot sa mɛsa mɛ Zɛɛb di enyen tɔ ɛdum ɛ koŋ nɛ Zɛɛb ɛ.

5 Tin, ɛsuk ɛ bɛmɛlyo mak djas ɛ́, étɛp bot neekwyɛla pak’ɔɔ nɛ lyem sɛŋ, nɛ tɛtɛ esiiza, nɛ ɛdum ɛ koŋ nɛ Zɛɛb di ààbɛ nɛ mɛdjhaaz pɛ ɛko bhimis pɛ si ɛ. 6 Bɛdhiiti bɛmbee bɛlyoel naazekat ɛsa etɛtɛ etɛp binek. Tin, bɛ lii ɛ́ etɛp mbɛs di ààbɛ nɛ lo nɛ mɛko ɛ. 7 Deenek, bɛ ɛpekwyɛl ɛlyaal bot náá, bɛ ɛ́ bɛtɛtɛ bɛlyoel ɛ etsi e Zɛɛb. Tin, bɔɔ bɛmet ààgu sa bɛ di elɛɛ ɛ, nɛ sa bɛ di elyo bot ɛ.

8 Mena nɛ guka náá, etsi e Zɛɛb nɛ nyɔ, ye nyɔ ɛ́, yɛ bɛ náá, mena nɛ kɛka dáa ye di elɛɛ ɔɔ. 9 Tin, ye nyɔ ɛ́, bot guka náá, etsi nabɛ ɛ́ ààdjɛaa étɛp bot ɛ epiki. Etsi nadjɛaa ɛ́ étɛp bot ɛ di ààlooba nɛ etsi ɔ, bot ɛ ɛlyel ɛ lo, bot ɛ mbee lyem, bot ɛ mesyem, bot ɛ di ààkaab Zɛɛb nɛ esa e dɛɛ ɔ, bot ɛ di egó bɛsɛɛg bɔɔ nɛ bɛnyɛɛg bɔɔ ɔ, bot ɛ di egó bot ɔ, 10 bot ɛ mɛzɔ, botom ɛ di esɛɛga goŋ nɛ bɛsɔ bɔɔ botom ɔ, bot ɛ di ebɔmsa ekwom e bot ɔ, bot ɛ etsal, bot ɛ di esu elɛŋ e etsal ɔ. Ye nabɛ ɛ́ ààbɛ-bɛak étɛp bot ɛ di esa edhiiti esa ee di àànɔŋel nɛ mbɛɛ mɛlyo mɛ Zɛɛb ɔ. 11 Mɛlyo menek ɛ́ tɔ Mbɛɛ Bhaadal nadjɛaa mɛ ɛ. Mbɛɛ Bhaadal tak dus ɛ́ pɛ daa Zɛɛb, mot di nɛ duma nɛ enɛm esa ɔ.

12 Mɛ ɛpebulal bhɔɔ nɛ mot nadjɛ mɛghwyil ɔ, Yezu Klisto Ghɛŋ’enaka. Mɛ ɛpebulal nyɛ bhɔɔ, etɛɛ náá, nyɛ eetɔ mɛ, nɛ ɛwa ɛbwaalel ɛ lɛ tɔ lam, nɛ ɛnɔŋ ɛ́ mɛ dáa mot-mɛsa mɛ. 13 É ghɛŋ sok, mɛ nadi elee nyɛ, mɛ nadi etiig nyɛ, mɛ nadi ɛ́ tɔ embee etɛp. Tin, Klisto eegek mɛ ghoŋ. Mɛ nabɛ ɛ́ ààgu sa mɛ nadi esa ɛ, etɛɛ náá, mɛ nabɛ ɛ́ ààdum koŋ nɛ nɛ. 14 Tin, enɛm nɛ embɛɛ Ghɛŋ’enaka nadyeebabu kɔ lam. Nyɛ eesa náá, mɛ di nɛ ɛdum ɛ koŋ nɛ nɛ, mɛ di nɛ ghwyil ɛkwyɛl ɛ bot kɔ ɛsu ɛ ɛgwakel ɛ lam nɛ Yezu Klisto ɛ.

15 Gwakeka mɛkpa mɛ etsɛɛtsɛ ee bot djas di egoka nɛ ɛmyaal yɛ ɛ:

Yezu Klisto nazyɛ kɔ bɔs’ak ɛ́ étɛp ɛtsik bot ɛ mesyem.

Mɛ ɛ́ mot mɛkɛn tɔ lɔɔ.

16 Tin, nyɛ naagek mɛ ghoŋ,

etɛɛ náá, Yezu Klisto neelyaal boo lyem goŋ’ɛ di ààbɛ nɛ ɛsik ɛ nɛ mam,

mot di na-ghaa mesyem ɔ.

Nyɛ nasa deenek ɛ́, étɛp bot ɛ aaboodum koŋ nɛ nɛ ɔ,

neebela tsik na kɔm-kɔm.

17 Ye goka ɛ́ náá, bot djas duwal Zɛɛb,

nɛ ɛdjɛ nyɛ duma na kɔm-kɔm.

Nyɛy ɛ́ mɛkoozi mɛ di ààbɛ nɛ ɛsik ɔ,

nyɛ ààgwyɛ, mot di ààbeeaa ɔ,

yɛ ɛ́ nyɛy ɛ di tɛtɛ Zɛɛb na kɔm-kɔm! Amɛn!

18 Gwaka sa mɛ di elɛɛ wɔ ɛ, Timote mɔn’am, yenek ɛ́ mɛlyo mɛ mɛ djɛ wɔ ɛ, dáa bɛngoolel ɛ Mɛkpa ɛ Zɛɛb naloolɛɛ kɔ ɛsu ɛ lɔ ɛ. Wɔ taala mɛkpa menek ɔɔ, wɔ waabela ghwyil, tin ɛ́ wɔ aakaduu tɛtɛ tuub. 19 Étɛp ɛsa deenek, wɔ goka ɛ́ nɛ ɛpyet tɔ ɛdum ɛ koŋ nɛ Zɛɛb nɛ mbɛɛ lyem. Bɛdhiiti bot moo ɛ́ ààkabɛ nɛ mbɛɛ lyem, deenek, bɛ eezekwyital ɛdum ɛ koŋ ɛ lɔɔ nɛ Zɛɛb. 20 Tɔ lɔɔg’ɔɔ, ye nabɛ ɛ́ nɛ Yimɛnɛ bɛ nɛ Alɛkzandɛlɛ, bot ɛ mɛ naka bɛ é mɛmbɔ mɛ Satan, étɛp bɛ needjek ɛkat ɛlee ɛ Zɛɛb ɔ.