2 Coríntios 11

Pɔl bɛ nɛ bɛmbee ɛ bot ɛ lwoma

1 Mɛ kwyɛl ɛ́ náá, bi pel ewo bam, pookopelka mɛlyet mam batsa! 2 Mɛ ɛpekwyɛl bin kwyɛl wat di náá, mɛ ààkwyɛl náá dhiiti mot djheebal min ɛ, kwyɛl tak dus ɛ́ pɛ daa Zɛɛb. Kwyɛl ɛ tak ɛ́, etɛɛ náá, mɛ nabaal bin ɛ́, étɛp ɛdjɛ bin é ɛba nɛ motom ngɔt, motom tak ɛ́ Yezu Klisto. Mɛ ɛpekwyɛl ɛtel ɛ́ bin pɛ daa lɛ dáa syes moma. 3 Taalaka dáa nyɔ nakwak Ɛve nɛ mbee mɛkɔŋ mɛ ɛ. Tin, mɛ ɛ́ nɛ kɛŋ nɛ nen, mɛ kaab ɛ́ náá, mot ɛzɛkɛkɔɔ bin, da swoola egeka bin, étɛp bi neelum koŋ nɛ etsɛɛtsɛ, da bi ɛ́ di ààdi tɔ epiki nɛ Klisto. 4 Bi nɛ dyeebakwyɛl náá, dhiiti mot zɛgoola bin dhiiti mbi Yezu sis. Yezu tak àànɔŋel nɛ yii bis nagoola bin ɛ. Deenek, bi ɛ́ pe ɛ́ ghwyɛ étɛp ɛmyaal dhiiti mbi sisim di syaala nɛ Sisim na Dɛɛ bi nabela ɛ. Bi ɛ́ ghwyɛ étɛp ɛdum ɛ koŋ nɛ dhiiti mbi bhaadal di àànɔŋel nɛ Mbɛɛ Bhaadal bis nagoola bin ɛ.

5 Mɛ nɛ gu náá, bot ɛ bi di eke náá, bɛ ɛ́ «eboo ewolo e bot ɛ lwoma» ɔ, tin, mɛ ààbee náá, bɛ eedhaa mɛ nɛ dhiiti sonok. 6 Yɛ di náá, mɛ ààgu ɛlii dáa bɔɔ ɔɔ, deenek, mɛ tok mot di ààgu sonok dum nɛ etɛp e Zɛɛb. Bis naalyaal bin etɛp e tak popoopwon esok nɛ esok, é mɛwala djas.

7 É ghɛŋ mɛ nadi egoola bin Mbɛɛ Bhaadal Zɛɛb ɛ, mɛ nasa yɛ ɛ́ ààbɛ nɛ efute. Mam eenɔɔ di mɔɔ dhyeeb, étɛp mɛ needjɛ bin di ekukuma. Dáa mɛ sa deenek ɛ, yɛ ɛ́ ɛbiyoɛpe? 8 É ghɛŋ mɛ nadi esa mɛsa mɛ Zɛɛb pɛ yebɔ ɛ, bot ɛ ezɛɛga mendjaala mɛ sis nadi edjɛ mɛ epata. Yɛ ɛ́ nɛ epata ee mɛ nadi enɔɔ pɛ daa lɔɔ ɛ, mɛ nabela ghwyil ɛkwyee ɛ bin. 9 É ghɛŋ mɛ nadi pɛ yebɔ ɛ, mɛ nadi ɛ́ nɛ gwyes epata. Tin, mɛ nabɛ ɛ́ ààwaab bin sonok. Bɔn-nyɛɛg nadus pɛ kyee dik Masedwan ɛ naazyɛ mɛ nɛ esa ee mɛ nadi nɛ gwyes tak ɛ. Deenek, mɛ nabɛ ɛ́ ààkwyɛl náá, mɛ di kɔm mɛdil kɔ ɛsu ɛ len. Nenak, mɛ aanàkobet náá, mɛ di kɔm mɛdil kɔ ɛsu ɛ len. 10 Dum nɛ etsɛɛtsɛ e Klisto di tɔ lam ɛ, mɛ lɛɛ ɛ́ náá, pɛ kyee dik Akayi, mot tok nɛ ghwyil ɛlu mɛ náá, mɛ ghɛɛ nyel kɔ ɛsu ɛ mɛsa mɛ mɛ nasa penek, ààwaab epata nɛ mot ɛ. 11 Étɛp yé mɛ lii deenek? Yɛ ɛ́ etɛɛ náá, mɛ ààkwyɛl bin é? Zɛɛb nɛ gu náá, mɛ nɛ kwyɛl bin.

12 Sa mɛ di esa nenak ɛ, yɛ ɛ́ sa mɛ aasesa mɛlu djas ɛ. Mɛ sa deenek ɛ́, ekaab náá, bɛ ɛzɛkɛbela lo mɛsɔ mɛ bɛ aaghɛɛ mɛnyel náá, bis nɛ bɛnɔɔ ɛ́ tyɛ wat ɛ. 13 Bot binɔk ɛ́ bɛmbee ɛ bot ɛ lwoma, bɛ ɛ́ bot ɛ djii di ekɔɔ bot náá, bɛ ɛ́ bot ɛ lwoma ɛ Klisto ɔ. 14 Ye tok nɛ tɛp ɛdjoka tin. Etɛɛ náá, Satan nyɛy nyɛ ɛmet nɛ kɔɔ bot náá, nyɛ ɛ́ di fofop mɛkas. 15 Bot tok nɛ ghwyil ɛdjoka, é ghɛŋ bot ɛ mɛsa ɛ Satan binɔk di ekɔɔ bot náá, bɛ ɛ́ bot ɛ mɛsa ɛ Zɛɛb, bot ɛ epiki ɛ, tin, bɛ aabela efute di egoka nɛ mɛsa mɔɔ ɛ.

Mezuk ɛ Pɔl

16 Mɛ ɛpebaabasal náá, sa mot ààbee mɛ dáa mot mɛlyet. Bɛ gek deenek ɔɔ, tin myaalka náá, mɛ ɛ́ mot mɛlyet etɛɛ náá, mɛ neebaadi nɛ ɛghɛɛa nyel batsa. 17 Sa mɛ di elii ɛ, ye tok sa Ghɛŋ di ekwyɛl ɛ, tin, é ghɛŋ mɛ di ediig bet ɛ, mɛ lii ɛ́ dáa mot mɛlyet. 18 Dáa ye di náá, bot ɛ bɔs’ak nɛ diig bet ɛ, ye goka ɛ́ mam pe, mɛ diig bet. 19 Biyɔ, bot ɛ di bɛtsoŋ ɛ bot ɔ, bi nɛ maad bot ɛ mɛlyet ɛnyɔɛpe. 20 Bi nɛ maad náá, bot binɔk tiig bin dáa ekwom, bɛ silal epata bin, bɛ djii esa bin djas, bɛ wyɛlɛ bin, bɛ myak bin mɛbhɛɛz é bhwoob. 21 Bi gek bilak ɛ́ náá, bis nadi ààsa deenek nen ɛ́, etɛɛ náá, bis ɛ́ bɛtsak-bel é? Haaa sen nɛ mbi yenek tɛp!

Yɛ bɛ náá, dhiiti mot ɛ́ nɛ sa nyɛ di egoka nɛ ɛdiig ɛ bet kɔ ɛsu ɛ tak ɔɔ, mam pe ɛ́ nɛ ghwyil ɛsa yɛ, ye nakoozodi náá, é ghɛŋ mɛ di elii deenek ɛ́, mɛ lii ɛ́ dáa mot mɛlyet. 22 Bɛ ààke tin náá, bɛ ɛ́ bot ɛ mbyak eYuda? Dɔɔ nɛ mam pe, mɛ ɛ́ mot mbyak eYuda. Bɛ ɛ́ bot ɛ kyee dik Yisalaɛl é? Dɔɔ nɛ mam pe, mɛ ɛ́ mot kyee dik Yisalaɛl. Bɛ ɛ́ bɛdha ɛ Abalaam é? Dɔɔ nɛ mam pe, mɛ ɛ́ dha ɛ Abalaam. 23 Mɛ kalii nenak wak ɛ́, dáa mot mɛlyet. Bɛ ke ɛ́ náá, bɛ ɛ́ bot ɛ mɛsa ɛ Klisto? Mam pe ɛ́ mot-mɛsa ɛ Klisto dhaa bɔɔ. Mɛ naazuk tɔ mɛsa mɛ Klisto dhaa bɔɔ. Mɛ naani tɔ membok esok nɛ esok dhaa bɔɔ. Mɛ naabiaa dhaa bɔɔ. Mɛ naadi tɔ mezuk esok nɛ esok, ɛkɛɛ yɛ aakɛkunaa-kunak nɛ ɛsyee dhaa bɔɔ. 24 Ekukuma e eYuda naamɛt mɛ esok etɛn, bɛ nanyuu mɛ nɛ eghwyɛs ɛ́ esok mɛkam-mɛlɛl nɛ etɛn nɛ ená (39). 25 Bot ɛ kyee dik Lɔm naamyak mɛ nɛ ebhil e ele esok elɛl. Sok wat, bɛ naabaal mɛ mɛpyoŋ é ghɛŋ bɛ nawus mɛ nɛ mɛkok ɛ. Esok elɛl, mɛ naadi ediida tɔ dii é ghɛŋ bɛmɛsuwa yii mɛdjoŋ mam nadi esee ɛ. Sok wat, mɛ naadhaa tu mwos nɛ tu pum tɔ boo dii mɛsɔn. 26 Tɔ bɛtɛ nɛ mɛdjoŋ mɛ mɛ nadi esa ɛ, mɛ naaboma nɛ bɛtɛ nɛ mezuk. Mɛ nabɛ ɛ́ tɔ mezuk é mɛdjoŋ mam é ghɛŋ mɛ nadi etsaal eboo mɛdhii tɔ bhyoŋ ɛ. Mɛ nadi ɛ́ nɛ mbee bwoo ekaab bot ɛ ɛzɛm, é sok mɛ nadi é mɛdjoŋ ɛ. Mɛ naaboma nɛ mezuk mɛ bɔn-nyɛɛg bam bot ɛ mbyak eYuda, nɛ bot ɛ di ààbɛ bot ɛ mbyak eYuda ɔ nawa mɛ tɔ tak ɛ. Mɛ naazuk tɔ eboo eghaada, tɔ bal, mɛ naazuk tɔ boo dii mɛsɔn, mɛ naabaazuk tɔ mɛmbɔ mɛ bɛmbee ɛ bɔn-nyɛɛg. 27 Mɛ naaboma nɛ mɛsa mɛ na lyel-lyel nɛ eboo mɛbhowal. Tin, mɛ nabɛ ɛ́ ààdi edjedja gɔ́, mɛ naagwak za, mɛ naagwak gwyes mɛdii, mɛ naabalatsi edee étɛp pwom, mɛ naazuk nɛ ɛgwyiyo nɛ eduuba. 28 Yɛ ɛ́ nɛ dhiiti mezuk mɛ di náá, mɛ ààpalaŋ ɛ. Sa di dáa boo kɔm tɔ lyem’am ɛ, yɛ ɛ́ náá, mɛ nɛ dyeebataala ngwyis nɛ bot ɛ ezɛɛga mendjaala djas. 29 É ghɛŋ mot di ààpyet tɔ ɛdum ɛ koŋ nɛ Zɛɛb ɛ, ye kpaa mɛ lyem ɛ́, ɛkɛɛ yɛ ɛ́ mam. É ghɛŋ mot di esyem ɛ, ye nɛ kpaa mɛ lyem dhaa tyɛ.

30 Yɛ bɛ sa ɛghɛɛa nyel ɔɔ, mɛ goka nɛ ɛghɛɛ nyel ɛ́, é ghɛŋ mɛ di ààbɛ nɛ ghwyil ɛ. 31 Zɛɛb, Sɛɛg ɛ Ghɛŋ Yezu, nyɛy mot nazesɛɛaa mɛtel kɔm-kɔm sii nɛ kɔm ɔ, nɛ gu ɛnyɔɛpe náá, mɛ ààkɔɔ. 32 É ghɛŋ mɛ nadi pɛ ghaada Dhamas ɛ, kukuma nadi ebɔɔba mɛkoozi Aaletas ɔ naanɛɛg esodja é ɛniel ɛ ghaada étɛp bɛ neemɛt mɛ. 33 Tin, bɛ naawa mɛ tɔ djhan, kɔl ekel é tak, bhii tak, bɛ eezɛkwyɛɛg mɛ pɛ yii kyee peeb ghaada. Yɛ ɛ́ deenek ɛ nyɛ nadi ààmɛt mɛ.