1 Yak sok ɛ́ yii elɛl mɛ di ezyɛ pɛ yebɔ ɛ. Ekwyala lɛɛ ɛ́ náá: «Etɛp djas goka ɛ́ nɛ ɛliiaa ɛ́, kɔ mɛkpa mɛ bɛtyaasɛs bɛbá nɛghu bɛlɛl✝.» 2 É ghɛŋ mɛ nazyɛ pɛ yebɔ, é mɛdjoŋ mam yii bhɔɔba ɛ, mɛ naalɛka nɛ bot ɛ nasa mesyem ɔ, dɔɔ nɛ bɛdhiiti bot. Nenak, dáa mɛ di ɛtsetaɛpe nɛ nen ɛ, mɛ ɛpebaalɛka nɛ nen náá, é sok mɛ aabaazyɛ pɛ yebɔ ɛ, mɛ aawa bɔɔ djas é feŋ. 3 Bi ɛpekwyɛl ɛgu, yɛ bɛ náá, Klisto ɛ́ di elii tɔ lam ɔɔ? Bi ɛ́ waagu, Klisto tok mot elɛtɛ, tin, nyɛ waalyaal mɛbwala mɛ pak’en. 4 Yɛ ɛ́ tsɛɛtsɛ náá, é ghɛŋ nyɛ nabemaa é mɛlaaba ɛ, nyɛ nabɛ ɛ́ ààbɛ nɛ ghwyil. Tin, nenak nyɛ ɛ́ nɛ tsik tɔ ghwyil ɛ Zɛɛb. Tɔ ɛgwakel ɛ lena nɛ nɛ, menabɛlka pe tok nɛ ghwyil. Tin, bis ɛ́ waalyaal bin náá, bis ɛ́ nɛ tsik sama nɛ nɛ tɔ ghwyil ɛ Zɛɛb.

5 Sɔska sa bi di esa biyɔ bɛmet ɛ, yɛ bɛ náá, bi dinaa ekɛ tɔ ɛdum koŋ nɛ Zɛɛb ɔɔ. Bi ɛ́ pookozogu ɛnyɔɛpe náá, Yezu Klisto ɛ́ tɔ len é? Yɛ di ààbɛ deenek ɔɔ, bi tok nɛ ghwyil ɛlyaal náá, bi nɛ kɛ tɔ ɛdum ɛ koŋ nɛ Zɛɛb. 6 Tin, mɛ bee ɛ́ náá, bi ɛ́ waagu náá, bis eelyaal ɛdum ɛ koŋ ɛ les nɛ Zɛɛb. 7 Bis ɛpedjaala nɛ Zɛɛb, etɛɛ náá, bi needi ààsa sa ɛbiyo. Ye tok étɛp ɛlyaal bin náá, mɛsa mɛ bis nasa nɛ nen ɛ́ nabɛ ɛ́ ɛnyɔɛpe. Bis kwyɛl ɛ́ náá, bi sa enɛm esa, yɛ kodi náá, bis nabɛ ɛ́ ààsa mɛsa tɔ len ɛnyɔɛpe ɔ. 8 Etɛɛ náá, bis tok nɛ ghwyil ɛsaab etsɛɛtsɛ e Zɛɛb. Bis zosa ɛ́ mɛsa mɛ etsɛɛtsɛ. 9 Bis nɛ myaala é ghɛŋ bis di ààbɛ nɛ ghwyil, da biyɔ ɛ́ di nɛ ghwyil ɛ. É di’enek, bis nɛ waab tɔ mendjaala mes náá, bi di tɔ esosoob. 10 Étɛp tak ɛ, mɛ di ekwyal bin mɛkana mak, mam ɛtsetaɛpe nɛ nen. Etɛɛ náá, é sok mɛ aakum pɛ yebɔ ɛ, yɛ aabela ɛ́, bi eezeswoola mɛfulu. Tin, Ghɛŋ naadjɛ mɛ ekukuma ɛkɔk kɔ len, nyɛ nabɛ ɛ́ ààdjɛ ekukuma é tak étɛp mɛ neepul bin, ye nabɛ ɛ́ étɛp bi neetɔ́ sok tɔ mɛsa ɛ Zɛɛb.

11 Bɔn-nyɛɛg bam, mɛ moo mwana nɛ nen, saaka bi tɔ́ sok tɔ mɛsa mɛ Zɛɛb, djɛelka mɛghaaz pak’en, da bi ɛ́ di tɔ ɛgwakel, dika tɔ egwyem. Tin, Zɛɛb mot di ekwyɛl bot ɔ, mot di edjɛ bot egwyem aadi ɛ́ sama nɛ nen.

12 Swoselka pak’en nɛ mɛbeedela mɛ bɔn-nyɛɛg.

Bɔn-nyɛɛg tɔ ɛdum ɛ koŋ nɛ Zɛɛb eeswos bin. 13 Betka náá, enɛm nɛ embɛɛ e Ghɛŋ Yezu Klisto, nɛ kwyɛl ɛ Zɛɛb, nɛ ɛgwakel tɔ Sisim na Dɛɛ di nɛ biyɔ djas.