2 Coríntios 2

1 Étɛp tak ɛ, mɛ ke náá, mɛ tok baazyɛ pɛ daa len, etɛɛ náá, mɛ ɛ́ zɛkɛbaazɛbaal bin elyem. 2 Mɛ baal bin elyem ɔɔ, ye tokapɛ nɛ dhiiti mot pak’en aakabaasa náá, lyem’am di tɔ mɛmyaala. Etɛɛ náá, biyɔ djas aakadi ɛ́ nɛ ghoŋ tɔ elyem. 3 Mɛ kwyal bin mɛkana mak dáak ɛ, etɛɛ náá, mɛ ààkwyɛl náá, mɛ zyɛ pɛ yebɔ ɔɔ, mɛ di nɛ ghoŋ tɔ lyem kɔ ɛsu bot ɛ goka nɛ ɛsa náá, mɛ di tɔ mɛmyaala ɔ. Nɛ tsɛɛtsɛ, mɛ nɛ gu náá, é ghɛŋ mɛ di tɔ mɛmyaala ɛ, biyɔ djas pe nɛ myaala. 4 Nɛ tsɛɛtsɛ, mɛ nakwyal bin mɛkana mak ɛ́ tɔ mɛnwyaad, nɛ ghoŋ tɔ lyem nɛ bɛtɛ nɛ miŋal é mis. Mɛ nabɛ ɛ́ ààkwyal bin yɛ étɛp ye needjɛ bin ghoŋ, yɛ ɛ́, étɛp bi neegu náá, mɛ nɛ kwyɛl bin dhaa tyɛ.

Pɔl eepel mot lee nyɛ ɔ

5 Tin, yɛ bɛ náá dhiiti mot ngɔt pak’en ɛsa náá, bi di nɛ ghoŋ ɔɔ, nyɛ ààpasa yɛ nɛ mam, nyɛ sa yɛ ɛ́ nɛ biyɔ djas, nɛghu nɛ ba bim bot tɔ len, sa bot ààkabek. 6 Étɛp mbi mot’enɔk, mɛdjamela mɛ bot ɛ zɛɛga mendjaala eedjala nɛ nɛ. 7 Dum nɛ tɛp tak ɛ́ ye di náá, ye goka ɛ́ bi pel nyɛ. Deenek, da bi ɛ́ djɛ nyɛ mɛghaaz, étɛp ɛkaab náá, sen ɛzɛkɛsa náá, ɛbwaalel ɛ nyɛ di nɛ yɛ ɛ́ si. 8 Tin, ngwyeebel’am pɛ daa len ɛ́ náá, bi lyaal nyɛ náá, bi nɛ kwyɛl nyɛ. 9 Gwakeka sa nasa náá, mɛ kwyal bin mɛkana ɛ. Mɛ nasuu ɛ́ náá, mɛ wa bin tɔ mɛbhowal, étɛp mɛ neegu yɛ bɛ náá, bi nɛ looba nɛ mɛtiŋ mam ɔɔ. 10 Bi ɛ pel mot ɔɔ, mam pe ɛ́ waapel nyɛ. Mɛ pel mot’enɔk ɔɔ, mɛ pel nyɛ ɛ́ kɔ ɛsu ɛ len é mis ɛ Klisto. 11 Etɛɛ náá, Satan needi ààkwak mena, deenek, menabɛlka djas nɛ gu egeka bɛ ɛnyɔɛpe.

Pɔl pɛ kyee dik Toloas

12 É sok mɛ nakum pɛ kyee dik Toloas étɛp ɛgoola Mbɛɛ Bhaadal ɛ Klisto ɛ, mɛ naabee náá, Ghɛŋ naadii mɛ ze étɛp mɛ sa mɛsa mɛ. 13 Tin, kɛŋ naazɛsa mɛ tɔ lyem dhaa tyɛ, etɛɛ náá, mɛ nabɛ ɛ́ ààbela mɔn-nyɛɛg’ena Tit. Yɛ ɛ́, étɛp tak ɛ mɛ namwana nɛ bot ɛ Toloas. Wɔ gwaa, mɛ zɛgoola tɔ́ pɛ kyee dik Masedwan.

Yezu Klisto nɛ djɛ eghɛŋ

14 Duu nɛ Zɛɛb, etɛɛ náá nyɛ ɛ́ di edjɛ mena ghwyil ɛkwak etɛp é mɛwala djas kɔ ɛsu ɛ Klisto. Deenek, kɔ ɛsu ɛ lena, nyɛ eesa náá, bot gu Klisto dáa mɛnuub mɛ mbɛɛ mɛmanas zesoaa é edi djas ɛ. 15 Tin, menaka ɛ́ dáa mɛnanas na mbɛɛ mɛnuub ɛ Klisto. Yɛ ɛ́ mɛnuub mɛ buwa nyɛ naka Zɛɛb yɛ ɛ. Menaka ɛ́ mɛnanas mɛ tak étɛp bot ɛ zebela tsik ɔ, nɛ bot ɛ zewo ze ɔ. 16 Étɛp bot ɛ zewo ze ɔ, yɛ ɛ́ mɛnuub mɛ ɛsyee di edul bot pɛ ze ɛsyee ɛ. Ye kabɛ bɛdhiiti bot ɔ, yɛ ɛ́ mɛnuub mɛ tsik di edul bot pɛ ze tsik ɛ. Tin, ɛzɛ di nɛ ghwyil ɛsa yenek mbi mɛsa? 17 Bisɔ tok dáa bɛdhiiti bot ɛ di ebɔmsa Mɛkpa ɛ Zɛɛb ɔ. Etɛɛ náá, yɛ ɛ́ Zɛɛb ɛ lwom bis, tin, bis goola mɛkpa mɛ ɛ tɔ etsɛɛtsɛ é mis mɛ, etɛɛ náá, bis ɛ́ bot ɛ mɛsa ɛ Klisto.