1 Mɛlu mɛlɛl bhii tak, ye nabɛ ɛ́ nɛ ɛba pɛ dɛl Kana, pɛ kyee dik Ghalile. Nyɛɛg ɛ Yezu nadi ɛ́ tin. 2 Ye nabɛ ɛ́ Yezu bɛ nɛ bɛdjekel bɛ naadjóoaa pɛ ɛba ɛ tak. 3 Dáa mɛnyok nabɛ náá, ye naawyii ɛ, nyɛɛg ɛ Yezu ɛ́ booke nɛ Yezu náá: «Bɛ tokapɛ nɛ mɛnyok.» 4 Tin, Yezu ɛ́ boozɛbɔɔza nɛ nyɛɛg náá: «Wɔy moma, yenabɛl mɛsɔ ɛ́ yé é tɛp’ak? Ɛwala ɛ lam dinaa ààpakum.» 5 Deenek nyɛɛg eezɛke nɛ bot ɛ mɛsa náá: «Saka sa djas nyɛ aalɛɛ bin náá, bi sa ɛ.»

6 Ghuna é di’enek, ye nabɛ ɛ́ nɛ mɛbhe mɛ nasael nɛ mɛkok ɛ etɛn nɛ wat. Mɛbhe mɛ tak nadi tin ɛ́ etɛɛ náá, bot ɛ mbyak eYuda neesa mɛzel mɛ ɛdis edhuud*2.6 eYuda neesa mɛzel mɛ ɛdis edhuud yɛ ɛ́ dáa etsi ɛ Moiiz nalɛɛ bɛ ɛ Msa 11.33-36.. Ngɔt-ngɔt tɔ mɛbhe mɛ tak ɛ́ nɛ ghwyil ɛnɔɔ bhɛɛb mɛdii elitɛlɛ dhet etɛɛ náá, ye neelwood. 7 Tin, Yezu eezɛke nɛ nɔɔ náá: «Lwoodalka mɛbhe menek nɛ mɛdii.» Wɔ gwaa, bɛ zɛlwoodal kum pɛ ka. 8 Bhii tak, Yezu eezɛke nɛ nɔɔ náá: «Daaka yɛ batsa, da bi ɛ́ kɛdjɛ mot di elii etɛp e ɛbyoŋ ɔ, étɛp nyɛ neebowal.» Bɛ eezɛtɔ́ nɛ yɛ pɛ daa mot tak.

9 Dáa mot tak nabowal mɛdii mɛ zeliigel moo mɛnyok ɛ, nyɛ nadi ɛ́ ààgu pɛ mɛnyok mɛ tak nadus ɛ́. Tin, ye nazobɛ ɛ́ bot ɛ mɛsa mɛ nalwoodal mɛbhe ɔ, bɔɔ bɛmet ɛ́ nadi egu pɛ kyee ye nadus ɛ. Mot’enɔk ɛ́ boodjóo motom nadi eba ɔ. 10 Nyɛ ɛ́ booke nɛ nɛ náá: «É mɛbyoŋ, bot djas dyeebadjɛ sok ɛ, tɛtɛ mɛnyok na nyenyɔ-nyɔ. Tin, da yii di ààdyeebanyɔ ɛ, kadjɛaa ɛbhis, bot ɛ di, bɛ moo tɔ elangi ɔɔ. Ghuna wɔ bɛ ɛ́, wɔ eekwom mbɛɛ mɛnyok étɛp ye needɛaa nenak ɛbhis.»

11 Yenek nabɛ ɛ́ ndem mɛbwala yii ɛsok Yezu nasa pɛ dɛl Kana pɛ kyee dik Ghalile ɛ. Yɛ ɛ́ deenek ɛ́ Yezu nalyaal duma nyɛ nadi nɛ yɛ ɛ. É di’enek, ye nabɛ ɛ́, bɛdjekel bɛ naadum koŋ nɛ nɛ. 12 Bhis yenek, nyɛ eezɛtɔ́ pɛ ghaada Kapɛlnaum bɛ nɛ nyɛɛg, nɛ mɔn-nyɛɛg zɛnɔɔ bɛdjekel bɛ. Bɛ naadhaa ba bim mɛlu penek.

13 Ɛbyoŋ ɛ Pak e eYuda nabɛ ɛ́ ye moo ekunaa, Yezu eezɛtɔ́ pɛ Yeluzalɛm. 14 Nyɛ kazɛbela tɔ kok Ndjaa-ebuwa ɛ́, bot ɛ nadi ebɔmsa engɔmbɛ, etaa, nɛ mɛghum, dɔɔ nɛ bot ɛ nadi eswoola epata ɔ mendiindil kɔ emesa bɔɔ. 15 Tin, Yezu eezɛlóo ghwyɛs nɛ ekel, nyɛ ɛ́ boozɛsɔ bɔɔ djas tɔ kok Ndjaa-ebuwa, dɔɔ nɛ etaa nɛ engɔmbɛ bɔɔ. Nyɛ eezɛmwas epata nɛ ɛwaaz emesa e bot ɛ nadi eswoola epata ɔ. 16 Nyɛ eezɛke nɛ bot ɛ nadi ebɔmsa mɛghum ɔ náá: «Diska esa bak wak! Nàliigka ndjaa Saagam náá, ye di zɛɛga bot ɛ di ebɔmsa esa ɔ.» 17 Tin, bɛdjekel bɛ eetaala náá, Ekwyala lɛɛ ɛ́ náá: «Mɛkwyɛla mɛ mɛ di nɛ yɛ dum nɛ ndjaŋ’ɔ ɛ, yɛ ɛpegoo mɛ tɔ lyem dáa du*2.17 Mɛd 69.10.»

18 Ekukuma eYuda eezɛke nɛ nɛ náá: «Yaa kɔkɔ ndem mɛbwala wɔ aatel bis, étɛp bis neemyaal náá, wɔ ɛ́ nɛ ghwyil ɛsa dáa wɔ di esa’aak?» 19 Tin, Yezu eezɛbɔɔza náá: «Bwakeka Ndjaa-ebuwa yak, bhii tak, tɔ mɛlu mɛlɛl, mɛ waabaawyɛl yɛ.» 20 Tin, ekukuma eYuda eezɛswonal, bɔɔ nɛ nɛ náá: «Dáa weee? Sonok étɛp ɛsum ɛ Ndjaa-ebuwa bak, ye nabɛ ɛ́, ye naabɔya membu mɛkam-mɛná nɛ etɛn nɛ wat. Wɔy lɛɛ ɛ́ náá, wɔ ɛ́ nɛ ghwyil ɛsum yɛ tɔ mɛlu mɛlɛl e!»

21 Ghuna Ndjaa-ebuwa Yezu nadi elii ɛ, nabɛ ɛ́ nyel’ɛ met. 22 Bhis ɛgom ɛ Yezu, bɛdjekel bɛ naazɛtaala sa nyɛ nake ɛ. É di’enek, bɛ naazɛmyaal etɛp ee nadi kwyala tɔ Mɛkana ɛ Zɛɛb ɛ, nɛ etɛp ee Yezu nadi elɛɛ bɛ ɛ.

23 É sok Yezu nadi, nyɛ dinaa pɛ Yeluzalɛm ɛ, é ɛbyoŋ ɛ Pak, bot ɛbuɛpe naadyeebadum koŋ nɛ din ɛ lɛ. Etɛɛ náá, bɛ nadi ebebee endem e mɛbwala mɛ nyɛ nadi esesa ɛ. 24 Tin, Yezu nabɛ ɛ́ ààbɛ nɛ ɛbwaalel nɛ nɔɔ. Etɛɛ náá, nyɛ nadi egu bɔɔ djas. 25 Bela náá, nyɛ nabɛ ɛ́ ààbɛ nɛ gwyes náá, mot zɛlɛɛ nyɛ sa bot binɔk di ɛ, etɛɛ náá, nyɛ nadi egu sa nadi tɔ lyem mot nɛ mot ɛ.