1 Dáa nyɛ nadi etɔ́ gba-gba ɛ, Yezu eezɛbee mot ngɔt nadi nɛ ɛbɛ́ ɛ edhim mbyela mɔ ɔ. 2 Wɔ gwaa, bɛdjekel bɛ zokazɛdji nyɛ náá: «Labhi, haaa étɛp yé mot’ak nabyel nɛ ɛbɛ́ ɛ edhim? Yɛ ɛ́ étɛp mesyem mɛ met ohoo, nɛghu etɛɛ náá, sɛɛg nɛ nyɛɛg naasyem?» 3 Yezu eezɛbɔɔza náá: «Ye tok tɛp mesyem mɛ met, nɛghu yii sɛɛg nɛ nyɛɛg. Nyɛ bɛ́ edhim ɛ́, etɛɛ náá, mɛsa mɛ mɛbwala mɛ Zɛɛb neewyis kel kɔ ɛsu ɛ lɛ. 4 É sok di náá, ye dinaa é mwos dwoo ɛ, ye goka ɛ́ mena saka mɛsa mɛ mot nadhis mɛ ɔ. Pum moo ɛ́ ɛkunaaɛpe, é sok yɛ aadi náá, mot aanàkwaabaakwak ɛsa mɛsa ɛ. 5 É sok mɛ di, mɛ dinaa kɔ bɔs’ak ɛ, mɛ ɛ́ gwyɛ ngel kɔ bɔs.»

6 Bhii nyɛ nazelii deenek ɛ́, Yezu eezɛsɛɛ mɛtel é bɔs. Bhii tak nyɛ eezɛpul bɔs nɛ yɛ, nɔɔ bhɔtɔ tak, zɛlɔɔb é mis mɛ mot edhim yenɔk. 7 Bhii tak, Yezu eezɛke nɛ nɛ náá: «Tɔ́a kɛgwyii mis pɛ tok mɛdii mɛ Silowe.» Ɛkpa ɛ Silowe kwyɛl ɛlɛɛ ɛ́ «Mot-lwoma». Tin, mot edhim yenɔk eezɛnɔɔ nyel, tɔ́, kɛgwyii mis. Dáa nyɛ nabula ɛ, ye nabɛ ɛ́, nyɛ moo ebee ɛnyɔɛpe.

8 Bot ɛ di é mengwoob ɔ, nɛ bot ɛ nadi ebee dáa nyɛ nadi sok ebɔɔ esa nɛ bot ɛ, bot ɛ tak eezɛni edjinel pak’ɔɔ náá: «Ye tok mot nadidi ndiindel é ngwoob gba ebɔɔ esa nɛ bot’aak é?» 9 Tin, bak bot náá: «Hɛɛɛ, yɛ ɛ́ nyɛy.» Yak kyee bot náá: «Ààbɛ! Ye tok nyɛy. Bɛ nɔŋel ɛ́ nɔŋelak.» Tin, mot’enɔk eezɛke nɛ nɔɔ náá: «Yɛ ɛ́ mam.» 10 Bɛ eezɛdji nyɛ náá: «Haaa mis mɔ kabɛŋel dáa?» 11 Mot’enɔk eezɛbɔɔza nɛ nɔɔ náá: «Mot di edjóoaa Yezu yenɔk ɛ́ sɛɛ mɛtel é bɔs. Bhii tak, nyɛ eezɛnɔɔ bhɔtɔ tak, lɔɔb mɛ yɛ é mis. Bhii tak, nyɛ eezɛke nɛ nam náá: "Tɔ́a, kɛgwyii mis pɛ tɔ tok mɛdii mɛ Silowe." É di’enek, mɛ eezɛtɔ́ kɛgwyii mis. Tin, mɛ moo ebee ɛnyɔɛpe!» 12 Bɛ eebaazɛdji nyɛ náá: «Mot tak moo wo?» Tin, nyɛ eezɛbɔɔza náá: «Mam ààgu.»

13 Tin, bɛ eezɛzyɛ nɛ mot nadi sok nɛ ɛbɛ́ ɛ edhim ɔ, pɛ daa eFalizyɛ. 14 Ghuna, Yezu nasa bhɔtɔ, da bɛɛ nyɛ mis nɛ yɛ ɛ dwoo saba. 15 Yɛ ɛ́ étɛp tak ɛ eFalizyɛ pɛ yɔbɔ kyee nabaadji nyɛ dum nɛ sa nasael étɛp mis mɛ neebɛŋel ɛ. Deenek, nyɛ ɛ́ boozɛbɔɔza nɛ nɔɔ náá: «Nyɛ eelɔɔb mɛ bhɔtɔ é mis. Bhii tak, mɛ eetɔ́, kɛgwyii mis. Tin, mɛ moo nenak ɛ́, ebee ɛnyɔɛpe.» 16 Bɛdhiiti bot pak eFalizyɛ moo tin eke pak’ɔɔ náá: «Mot sa kwaambi etɛp dáak ɔ tok lwoma ɛ Zɛɛb. Etɛɛ náá, nyɛ ààduwal etsi e Zɛɛb dum nɛ dwoo saba.» Yak kyee bot pak’ɔɔ náá: «Mot mesyem tok nɛ ghwyil ɛsa endem e mɛbwala mak.» Deenek, eFalizyɛ moo ɛ́, bɛ eezesyaala pak’ɔɔ dum nɛ tɛp tak. 17 Wɔ gwaa, eFalizyɛ tak baazɛdji mot edhim natsak ɔ náá: «Mba wɔy wɔ ɛmet, wɔ ke dáa dum nɛ mot bɛɛ wɔ mis ɔ?» É di’enek, nyɛ eezɛbɔɔza náá: «Nyɛ ɛ́ ngoolel-Mɛkpa ɛ Zɛɛb.»

18 Bela tin náá, ekukuma eYuda nabɛ ɛ́ ààkwyɛl ɛmyaal náá, nyɛ nadi sok ɛ́, nɛ edhim, mos nyɛ moo enyaasok. Yɛ ɛ́ étɛp tak ɛ bɛ nabaadal sɛɛg nɛ nyɛɛg mot tak náá, bɛ zyɛ. 19 Bɛ eezɛdji bɛ náá: «Yɛ ɛ́ tsɛɛtsɛ náá, nwyak ɛ́ mɔn’en é? Yɛ ɛ́ tsɛɛtsɛ náá, nyɛ byel ɛ́ nɛ ɛbɛ́ edhim é? Ye sa dáa, etɛɛ náá, nenak, mis mɛ nyaasok?» 20 Sɛɛg nɛ nyɛɛg eezɛbɔɔza náá: «Bis eegwyak náá, yɛ ɛ́ mɔn’es. Nyɛ nabyel ɛ́ nɛ ɛbɛ́ ɛ edhim. 21 Nenak nyɛ moo bee ɛnyɔɛpe. Tin, dáa nyɛ tsak ɛ, mot tsik nyɛ ɔ, di náá, bis ààgu yesɔ. Djika nyɛy nyɛ ɛmet. Etɛɛ náá, nyɛ moo ɛ́ nɛ membu mɛ di náá, nyɛ ɛ́ nɛ ghwyil ɛlɛɛ bin nyɛ ɛmet dáa ye sael ɛ!» 22 Sɛɛg nɛ nyɛɛg nalii deenek ɛ́, etɛɛ náá, bɛ nadi ekaab ekukuma eYuda. Etɛɛ náá, eYuda nabɛ ɛ́, bɛ eezeke náá, mot aake náá, Yezu ɛ́ Mɛsia ɔ, mot tak ɛ́ waasɔaa tɔ ndjaa mendjaala mɛ eYuda. 23 Yɛ ɛ́ étɛp tak ɛ sɛɛg nɛ nyɛɛg nake náá: «Nyɛ moo ɛ́ nɛ membu di náá, nyɛ ɛ́ nɛ ghwyil ɛlɛɛ bin nyɛ ɛmet dáa ye sael ɛ. Djika nyɛy nyɛ ɛmet!»

24 Wɔ gwaa, eFalizyɛ zokabaadjóo mot edhim natsak ɔ, djóoa sis. Bɛ eebaazɛke nɛ nɛ náá: «Lɛɛa bis nɛ tsɛɛtsɛ é mis ɛ Zɛɛb, etɛɛ náá, bis nɛ gu náá, mot yenɔk ɛ́ mot mesyem.» 25 Nyɛ eezɛbɔɔza nɛ nɔɔ náá: «Mam ààgu yam, nɛghu nyɛ ɛ́ mot mesyem. Mam gu ɛ́ sa wat náá, mɛ nadi ɛ́ nɛ edhim nenak, mɛ moo ebee ɛnyɔɛpe.» 26 EFalizyɛ eezɛdji nyɛ náá: «Nyɛ sa wɔ yé? Nyɛ tsik mis mɔ dáa?» 27 Mot yenɔk eebaazɛbɔɔza nɛ nɔɔ náá: «Mɛ eezelɛɛ bin, bi ààkwyɛl ɛgwak. Étɛp yé bi di ekwyɛl náá, mɛ baabasal bin yɛ esok ebá? Bi kwyɛl bilak ɛ́ náá, biyɔ pe bi di bɛdjekel bɛ?»

28 Tin, bɛ eezɛlee nyɛ, bɛ eezɛke nɛ nɛ náá: «Yɛ ɛ́ wɔy ɛ di djekel mot tak! Bisɔ ɛ́ bɛdjekel ɛ Moiiz. 29 Bisɔ nɛ gu náá, Zɛɛb naalii nɛ Moiiz. Yɛ kabɛ nyɛy ɔ, bis ààgu nyɛ, ààbaagu pe pɛ kyee nyɛ nadus ɛ!» 30 Mot edhim natsikaa ɔ, zokabaake nɛ nɔɔ náá: «Beeka, sa mɛ di edjoka ɛ, yɛ ɛ́ yenek: Bi ààbaagu pɛ kyee nyɛ nadus ɛ, dhi biyɔ ebee náá, nyɛ eebɛɛ mɛ mis! 31 Bela náá, mena nɛ guka náá, Zɛɛb ààgwak bot ɛ mesyem. Nyɛ dyeebagwak ɛ́ bot ɛ di eduwal nyɛ nɛ ɛsa ɛkwosak ɛ lɛ ɔ. 32 Bot dinaa ààpagwak sok náá, dhiiti mot ɛpetsik mis mɛ mot nabyel nɛ ɛbɛ́ ɛ edhim ɔ. 33 Mot’ak ɛpedi ɛ́ ààdus pɛ daa Zɛɛb ɔɔ, pe nyɛ aanàkwaasa etɛp e mɛbwala mɛ nyɛ di esa’aak.» 34 EFalizyɛ eezɛke nɛ mot yenɔk náá: «Kana dwoo mɛbyel mɔ, kɛyaka nɛ dwoo pan mos’ak, wɔ ɛ́ tɔp tɔ mesyem, da mbi mot dáa wɔy ɛ́ zɛlyo bis é?» Bhii nyɛ nake deenek ɛ́, wɔ gwaa bɛ zɛsɔ nyɛ tɔ ndjaa mendjaala mɛ eYuda.

35 Dáa Yezu nagwak náá, eFalizyɛ naasɔ mot yenɔk tɔ ndjaa mendjaala mɛ eYuda ɛ, nyɛ ɛ́ boozɛboma nɛ nɛ. Nyɛ eezɛdji nyɛ náá: «Wɔ nɛ dum koŋ nɛ Sɛɛŋɛlɛ Mɔn Mot é?» 36 Tin, mot yenɔk eezɛbɔɔza nɛ Yezu náá: «Lɛɛa mɛ, Ghɛŋ, yɛ ɛ́ ɛzɛ, étɛp mɛ needum koŋ nɛ nɛ.» 37 Yezu eezɛbɔɔza nɛ nɛ náá, «Wɔ ɛpebee nyɛ, etɛɛ náá, nyɛy ɛ di sok bhwoob’ɔ, nyɛ ɛ́ di elii nɛ nɔ nenak’aak.» 38 Tin, mot yenɔk eezɛbɔɔza náá: «Ghɛŋ, mɛ eedum koŋ nɛ nɔ!» Bhii tak, nyɛ eezɛkwyit mɛboŋ si sok bhwoob ɛ Yezu, étɛp ɛduwal nyɛ.

39 Yezu eezɛbil ɛkpa náá: «Mɛ nazyɛ kɔ bɔs’ak ɛ́, etɛɛ náá, bot neezɛpɛ́ɛaa, étɛp mis mɛ bot ɛ edhim neebɛŋel, tin, bot ɛ nadi enyaasok ɔ, neebela edhim.» 40 Bɛdhiiti eFalizyɛ nadi é bhaaz’ɛ ɔ, naagwak dáa nyɛ nalii deenek ɛ́. Wɔ gwaa, bɛ zɛdji nyɛ náá: «Bot ɛ edhim tak ɛ́, dɔɔ nɛ bisɔ?» 41 Yezu eezɛbɔɔza nɛ nɔɔ náá: «Bi ɛpedi ɛ́ bot ɛ edhim ɔɔ, pe bi ààpasa mesyem. Tin, dáa bi di eke náá: "Bis ɛpebee" ɛ, yɛ ɛ́ étɛp tak ɛ bi di tɔ ndjɛ sɔs dáa bot ɛ mesyem.»