1 Yezu zokazɛben lo, nyɛ moo tin ebee dáa bɛkum ɛ bot nadi ezɛwa epata tɔ ɛbɔɔl ɛ nanɛɛgaa kɔ ɛbɛsɛɛ ɛ kok Ndjaa-ebuwa étɛp tak ɛ. 2 Nyɛ eezɛbee dhiiti djel kus moma ezyɛ zɛwa yɛ bɔɔ efalanga ebá tɔ ɛbɔɔl. 3 Dáa Yezu nabee deenek ɛ́, nyɛ ɛ́ booke náá: «Tsɛɛtsɛ nɛ tsɛɛtsɛ, mɛ lɛɛ bin ɛ́ náá, djel kus moma yak eelóo tɔ ɛbɔɔl dhaa yii bot djas lóo wak ɛ. 4 Etɛɛ náá, bot ɛ lóo wak djas’aak, bɛ lóo ɛ́ eghutu-ghutu. Tɔ mɛbɔs mɛ, kus moma yak djɛ ɛ́ ɛkwom ɛ lɛ djas.»

5 Bɛdhiiti bot ɛ nadi elii dum nɛ zumal Ndjaa-ebuwa, dáa ye nasumel nɛ embɛɛ mɛkok ɛ, zɛnɔɔ esa ee bot nakadjɛ Zɛɛb ɛ. Tin, Yezu eezɛke náá: 6 «Dhiiti ɛlu ɛpezyɛ, ɛlu ɛ di náá, yɛ aanàkabaalik é di’ak ɛkok ɛ wat kɛla kɔ sɔ ɛkok tɔ ndjaa bi di bee’aak. Etɛɛ náá, djas aadi ɛ́, bik, waazel, see é bɔs.»

7 Bɛdjekel bɛ eezɛdji Yezu náá: «Lyoel! Lɛɛa bis, esesɛɛ binek aasael den? Lyaala bis endem ee bis aagwyák náá, esesɛɛ binek moo kɔ nɛ ɛsael ɛ.» 8 Nyɛ eezɛbɔɔza náá: «Tselalka, nàbetka náá, bɛ kɔɔ bin etɛɛ náá, bot ɛbuɛpe ɛ́ waazyɛ nɛ din ɛ lam. Mot nɛ mot ɛ́ waalɛɛ náá: "Yɛ ɛ́ mam ɛ di Mɛsia." Bɛ aake náá: "Ɛlu ɛ tak eezedjala." Sa bi ààdu bɛ. 9 É sok bi aadi bi moo gwak lɛŋ mɛɛb, nɛ menduk mɛ ɛkus ɛ ɛghuub ɛ, sa mot ààbem ba, ye goka ɛ́ esesɛɛ binek pookosael sok, guka náá, yenek ààlɛɛ náá, yɛ ɛ́ ɛsi ɛ bɔs.»

10 Yezu eebaazɛke náá: «Yak mbyak ɛ́ waaghɛɛ, kɛlumla dɛɛb nɛ dhiiti mbyak. Dhiiti ɛyoŋ ɛ wat ɛ́ waaghɛɛ kɛlumla dɛɛb nɛ yak ɛyoŋ. 11 Bɔs ɛ́ waaboodheegel ɛlyelɛpe. É mɛdhik nɛ mɛdhik, yɛ aadi ɛ́ nɛ pwom nɛ gum, bot djas ɛ́ waagwak bwoo é di bɛ baabee edjema nɛ epela tɔ gwoo ɔ.

12 Ɛsok nɛ esesɛɛ binek nɛ sael, bi ɛ́ waakɛmɛtaa, bi ɛ́ waakɛwaaa tɔ tsik mezuk, bi ɛ́ waakɛkaaa étɛp bɛ neekɛpɛ́ɛ bin tɔ mendjaa mɛ mendjaala mɛ eYuda, bi ɛ́ waakɛmɛtaa é membok, bi ɛ́ waakɛpɛ́ɛaa pɛ daa bɛmɛkoozi nɛ ekukuma kɔ ɛsu ɛ lam. 13 Yenek djas aasael ɛ, étɛp bi neebela ze ɛkɛlɛɛ bot sa bi di egu dum nɛ nam ɛ. 14 Dika nɛ lyem ɛnyɔɛpe, sa mot ààbem ba nɛ dáa bi aakɛtaŋal ɛ. 15 Mam ɛmet, mɛ waadjɛ bin mɛkpa nɛ etsoŋ. Tin, bot ɛ bi aadi nɛ tɛp nɛ nɔɔ aanàkwaakwak ɛkwyesal bin, nɛ ɛdupal mɛkpa men. 16 Bot aaka bin ɔ, yɛ aadi ɛ́, bɛsɛɛg bin, nɛ bɛnyɛɛg bin, bɔn-nyɛɛg bin, nɛ bɛsɔ bin, dɔɔ nɛ bot ɛ bi nɛ bɛnɔɔ di ɔ. Bɛdhiiti bot pak’en ɛ́ waagóaa tɔ membok.

17 Bot djas ɛ́ waabhina bin kɔ ɛsu ɛ din ɛ lam. 18 Tin, yɛ aanàkwaadi nɛ ko bhoo wat é elo bin aakodiib. 19 Kopyetka pɛ yebɔ kyee ɛlyelɛpe, etɛɛ náá, yɛ ɛ́ deenek ɛ́ bi aatsik mɛnyel men.»

20 «É sok bi aabee náá, mɛdhuu mɛ esodja eezɛkaal Yeluzalɛm ɛ, tin, bi ɛ́ nɛ ghwyil ɛkagu náá, ye kalik ɛ́ ba ɛwala batsa Yeluzalɛm neewaazel! 21 É di’enek, bot aadi pɛ kyee dik Yude ɔ, goka ɛ́, nɛ ɛkaab tɔ́ kɔ mɛtsok. Bot aadi tɔ ghaada Yeluzalɛm ɔ, goka ɛ́ nɛ ɛdus tin, tɔ́ ɛtsetaɛpe. Bot aadi pɛ tɔ epɛt é ɛwala ɛlenek ɔ, bɛ ààgoka nɛ ɛsik tɔ́ pɛ tɔ ghaada. 22 Etɛɛ náá, yɛ aadi ɛ́, mɛlu mɛ Zɛɛb aazɛpɛ́ɛ bot ɛ. Yɛ ɛ́ ɛlu ɛ Ekwyala djas aabela mɛsuk ɛ. 23 Haaa kpaa-ghoŋ dwoo lenek nɛ boa aadi nɛ mɛbum ɔ, zɛnɔɔ boa aadi nɛ bɔn edɛ mɛbel dwoo lɛɛg ɔ. Etɛɛ náá, boo mezuk ɛ́ waadi dwoo tak kɔ bɔs. Bot ɛbuɛpe ɛ́ waagu ɛbuk ɛ Zɛɛb kɔ ghaada tak. 24 Bot ɛ tak ɛ́ waagóaa nɛ epɛl. Bɛdhiiti ɛ́ waamɛtaa é mbok, tɔ́aa nɛ nɔɔ pɛ tɔ ekyee mɛdhik djas. Tin, Yeluzalɛm ɛ́ waazɛnyalaa nɛ bot ɛ di ààbɛ bot ɛ mbyak eYuda ɔ. Bɛ waasa deenek, kɛkum dwoo Zɛɛb nadjɛ bɛ ɛ́ aadjala ɛ.»

25 «Bot ɛ́ waabee edjema nɛ epela tɔ gwyes, tɔ ngɔn, tɔ ekwyikwyen. Pɛ si, membyak djas ɛ́ waadi nɛ boo ba nɛ kɛŋ, di bɛ aagwak ghuu nɛ ɛbee boo mɛbhyeeb tɔ boo dii mɛsɔn ɛ. 26 Gwyes nɛ ngɔn nɛ ekwyikwyen ɛ́ waadheegel nɛ ghwyil ɛ Zɛɛb. Bhii tak, bɛtɛ nɛ bot ɛ́ waagwyɛ nɛ bwoo é siiza etɛp aabootuula kɔ bhwak djas ɛ. 27 É di’enek, bɛ waabee Sɛɛŋɛlɛ Mɔn Mot ezyɛ tɔ eguud. Nyɛ waazyɛ nɛ ghwyil nɛ duma yɛ djas. 28 Dwoo etɛp binek aakan ɛ́, tyaaka, pyetka pɛ yebɔ kyee, etɛɛ náá, Zɛɛb moo zɛpɛk bin é ekwom.»

29 Bhii tak, Yezu eezɛlɛɛ bɛ kana yak: «Pookobeeka bhek le fiigh nɛ edhiiti ele djas. 30 É sok bi di ebee náá, eka e bes moo kan ɛkwyil é tak ɛ, bi nɛ gu náá, mbu ele di wum ɛ́ moo kunaa. 31 Tyee wat nɛ biyɔ pe, é sok bi aabee endem binek moo nyen ɛ, guka náá, Ɛyoŋ ɛ Zɛɛb moo ɛ́ yɛ eezekunaa. 32 Tsɛɛtsɛ nɛ tsɛɛtsɛ, mɛ lɛɛ bin ɛ́ náá, bot ɛ kɔkɔ membu mak aanàkwaagwyɛ djas, esonok mɛ lɛɛ wak djas’aak, ààsael. 33 Gwoo nɛ bɔs ɛ́ waadum, ghuna yam mɛkpa aalik ɛ́ kɔm-kɔm sii nɛ kɔm.»

34 «Bi ɛ́ kobaka! Sa bi ààpul ebhum e elyem bin gwyes tɔ elangi nɛ tɔ mɛbyoŋ, dɔɔ nɛ étɛp ɛwa lyem tɔ ɛsiiza esa e bɔs’ak. Deenek, dwoo Zɛɛb aazyɛ zɛpɛ́ɛ bot ɛ, yɛ aatuula bin ɛ́ zaka. 35 Yɛ aazyɛ dáa ɛwyet. Yɛ ɛ́ deenek ɛ yɛ aatuula bot ɛ bɔs djas zaka. 36 Dika ghwyɛ, gheedjaalaka Zɛɛb mɛlu djas. Yɛ ɛ́ deenek ɛ bi aabela ghwyil ɛmaad ɛ lyem dum nɛ etɛp ee di ezyɛ yenek. Da bi ɛ́ tyaa tetel sok bhwoob Sɛɛŋɛlɛ Mɔn Mot.»

37 É mwos, Yezu nadi elelyo bot ɛ pɛ tɔ Ndjaa-ebuwa, é pum, nyɛ katetɔ́ kɛdjaasi ɛ́ kɔ ɛtsok ɛ pyeeb oliv. 38 Tin, tɔ mɛlem, bot ɛ dɛl djas nadi etɔ́ pɛ daa lɛ tɔ kok Ndjaa-ebuwa étɛp kɛgwak mɛlyo mɛ.