1 Beeka dhaad ɛ Yezu Klisto, mɔn ɛ Dhavid, dha ɛ Abalaam:

2 Yɛ ɛ́ Abalaam ɛ nabya Izak, Izak ɛ nabya Zakɔɔb, Zakɔɔb kabya yɛ ɛ́ Yuda nɛ bɔn-nyɛɛg. 3 Tin, Yuda kabya ɛ́ Pelɛɛz bɛ nɛ Zaala. Din ɛ nyɛɛg’ɔɔ nabɛ ɛ́ Tamaad. Pelɛɛz kabya ɛ́ Ɛslɔm, Ɛslɔm kabya yɛ ɛ́ Alam. 4 Mɔn Alam kadi ɛ́ Aminadaab, Aminadaab nakabya yɛ ɛ́ Naasɔn. Naasɔn kabya ɛ́ Salman. 5 Salman bɛ nɛ myɛl Layaab ɛ́ nabya Bhooz. Bhooz bɛ nɛ ngbɛ myɛl Luth nakabya ɛ́ Obɛɛd. Obɛɛd nabya ɛ́ Yese, 6 Yese kabya ɛ́ mɛkoozi Dhavid.

Mɛkoozi Dhavid kabya ɛ́ Salomɔŋ, nyɛ nabya Salomɔŋ ɛ́ bɛ nɛ mwaa Uli*. 7 Salomɔŋ nabɛ ɛ́ sɛɛg ɛ Loboam, Loboam nakabya yɛ ɛ́ Abya, Abya kazɛbya ɛ́ Asaf. 8 Asaf nabya yɛ ɛ́ Yozafat, Yozafat kabya ɛ́ Yolam. Mɔn Yolam nabɛ ɛ́ Ozias. 9 Ozias nadi ɛ́ sɛɛg ɛ Yotam, Yotam kabya ɛ́ Akaaz, Akaaz eezɛbya Ezekias. 10 Ezekias kabya ɛ́ Manase. Manase kabya ɛ́ Amɔn, Amɔn kabya ɛ́ Zozias. 11 Zozias kadi ɛ́ sɛɛg ɛ Zekonias nɛ bɔn-nyɛɛg, yɛ é ghɛŋ bɔn ɛ Yisalaɛl natɔ́ é ekwom pɛ kyee dik Bhabhilɔn ɛ.

12 Bhii bɔn ɛ Yisalaɛl natɔ́ é ekwom pɛ kyee dik Bhabhilɔn ɛ, Zekonias naakɛbya Salatyɛl. Bhii tak, Salatyɛl eezɛbya Zoolobhabhɛl. 13 Zoolobhabhɛl kabya ɛ́ Abyuud. Abyuud nabɛ ɛ́ sɛɛg ɛ Eliakim, Eliakim kadi ɛ́ sɛɛg ɛ Azɔɔd. 14 Azɔɔd eezɛbya Sadɔk, Sadɔk kabya ɛ́ Akim. Mɔn ɛ Akim kadi ɛ́ Eliyuud. 15 Eliyuud kadi ɛ́ sɛɛg ɛ Eleazaad, Eleazaad kabya ɛ́ Matan. Matan eezɛbya Zakɔɔb, 16 Zakɔɔb kadi ɛ́ sɛɛg ɛ Zozɛf ngom ɛ Maali. Yɛ ɛ́ Maali tak ɛ nabya Yezu bot di edjóo Mɛsia ɔ.

17 Tinaak, kana kɔkɔ mɛbyel ɛ Abalaam, kɛyaka nɛ yɛ Dhavid, ye nabɛ ɛ́, ye naasa tyee ekɔkɔ e mɛbyel kam nɛ ená (14). Ye naabaasa tyee ekɔkɔ e mɛbyel kam nɛ ená (14) kana ɛbyel ɛ Dhavid, kɛyaka nɛ membu mɛ bɔn ɛ Yisalaɛl natɔ́ é ekwom pɛ Bhabhilɔn ɛ. Kana membu mɛ bɔn ɛ Yisalaɛl natɔ́ é ekwom pɛ Bhabhilɔn ɛ kɛyaka nɛ ɛbyel ɛ Mɛsia, ye naasa tyee ekɔkɔ e mɛbyel kam nɛ ená (14).

18 Gwakeka ɛsuk ɛ ɛbyel ɛ Yezu Klisto. Maali nyɛɛg nabɛ ɛ́ ghɔɔd ɛ Zozɛf. Ɛsok nɛ bɛ nɛ di moma nɛ motom, ye nabɛ ɛ́, Maali eezɛbela ɛbum nɛ ghwyil ɛ Sisim na Dɛɛ. 19 Zozɛf, mwaaz’ɛ nabɛ ɛ́ mot epiki, nyɛ nabɛ ɛ́ ààkwyɛl ɛdhusal nyɛ é mis mɛ bot. Nyɛ ɛ́ boozɛke náá, emwaaz bɛ nɛ Maali si tɔ syaab. 20 Dáa nyɛ nadi esiiza deenek ɛ, dhiiti fofop ɛ Ghɛŋ ngɔt eezɛtuula nyɛ tɔ dhyam, nyɛ eezɛke nɛ nɛ náá: «Zozɛf, dha ɛ Dhavid, nàbem ba étɛp ɛba Maali, etɛɛ náá, yɛ ɛ́ nɛ ghwyil Sisim na Dɛɛ ɛ, nyɛ bela ɛbum. 21 Nyɛ waabya mɔn mɔɔ motom, bi aaget nyɛ ɛ Yezu, etɛɛ náá, nyɛy ɛ́ kwaatsik bot ɛ mbyak’ɛ tɔ mesyem mɔɔ.»

22 Esesɛɛ binek djas aasael ɛ, etɛɛ náá, etɛp djas Ghɛŋ nalɛɛ tɔ nuub ngoolel-Mɛkpa ɛ Zɛɛb ɛ neebela ɛsuk. Ye nabɛ ɛ́ náá:

23 «Mɔn ɛsyes ɛ moma di ààgu botom ɔ waabela ɛbum.

Bhii tak, nyɛ waabya mɔn mɔɔ motom,

nyɛ aaget nyɛ ɛ́ Emanuɛl.*»

Ye kwyɛl ɛlɛɛ ɛ́: «Zɛɛb ɛ́ nɛ nena.»

24 Dáa Zozɛf kadjem é gɔ́ ɛ, nyɛ zokasa ɛ́ dáa fofop ɛ Ghɛŋ nalɛɛ nyɛ ɛ, nyɛ ɛ́ boozɛbeeb myɛl Maali. 25 Tin, nyɛ nabɛ ɛ́ ààsɛɛga goŋ bɛ nɛ myɛl kɛkum dwoo myɛl nabya mɔn motom, Zozɛf naget Yezu ɛ.