Mateus 2

Bɛtsoŋ ɛ bot eezɛtɔ́ kɛduwal Yezu

1 Yezu nabyel ɛ́ pɛ dɛl ɛ Bheteleɛm pɛ kyee dik Yude é ghɛŋ Eelood nadi mɛkoozi ɛ. É ghɛŋ tak, ye nabɛ ɛ́, bɛtsoŋ ɛ bot naadus pɛ kyee ɛdjem ɛ dwoo, kum pɛ Yeluzalɛm. 2 Tin, bɛ moo zɛdji náá: «Mɛkoozi mɛ eYuda, tɔlɔɔ mɔn byel ɔ, nyɛ ɛ́ wo? Bis eebee kwyikwyen yɛ edus pɛ ɛdjem ɛ dwoo, bis ɛ́ bookazyɛ zɛduwal nyɛ.» 3 Dáa mɛkoozi Eelood nagwak deenek ɛ́, ye naanɛɛg nyɛ lo zɛm-zɛm, nyɛy nɛ bot ɛdi tɔ ghaada Yeluzalɛm ɔ. 4 Wɔ gwaa, nyɛ zɛdjóo bot ɛ nadi kɔ elo e eboo bɛghaa-Zɛɛb ɔ djas, nɛ bɛghaŋ ɛ mɛkana mɛ etsi djas, nyɛ needji bɛ di Mɛsia di esiŋa nɛ ɛbyel ɔ. 5 Bɛ eezɛbɔɔza nɛ nɛ náá: «Pɛ Bheteleɛm, pɛ kyee dik Yude etɛɛ náá, ngoolel-Mɛkpa ɛ Zɛɛb naakwyal náá:

6 "Wɔy Bheteleɛm, kyee dik Yude

Nɛ tsɛɛtsɛ wɔ tok nɛ ghwyil ɛbyaselaa

pɛ kɔ mɛl mɛ di kɔ kyee dik Yude ɛ,

etɛɛ náá, boo kukuma ɛ́ waawyis kɔ lɔ,

mot aadjɛɛd mbyak’am Yisalaɛl ɔ.*2.6 Mis 5.1"»

7 Deenek, wɔ gwaa, mɛkoozi Eelood zɛdjóo bɛtsoŋ ɛ bot binɔk tɔ syaab. Tin, bɛ eezɛlɛɛ nyɛ sum di nɛ ɛwala ɛ kwyikwyen tak nanyen tɔ gwoo ɛ. 8 Bhii tak, nyɛ eezɛlwom bɛ pɛ Bheteleɛm. Nyɛy nɛ nɔɔ náá: «Tɔ́ka kɛsaa, da bi ɛ́ gu etɛp djas dum nɛ mɔn tak, dɔɔ nɛ zeza nɛ di nyɛ di ɔ. Bi ɛ bela ɔɔ, da bi ɛ́ lɛɛ mɛ, etɛɛ náá, mam pe, mɛ neezyɛ, zɛduwal nyɛ.»

9 Bhii bɛ nazegwak dáa mɛkoozi nalii nɛ nɔɔ ɛ, bɛ eezɛnɔɔ mɛnyel dhaa yɔbɔ. Tin, kwyikwyen bɛ nadi ebee pɛ ɛdjem ɛ dwoo ɛ, moo ekɛ pɛ sok bhwoob’ɔɔ pɛ ɛko, é sok bɛ nakum zeza nɛ di mɔn tak nadi ɔ, wɔ gwaa kwyikwyen zɛtyaa piki, é di wat, ààkabaakɛ. 10 Dáa bɛ nabee kwyikwyen ɛ, bɛ nabɛ ɛ́, bɛ naamyaala ɛbuɛpe. 11 Bhii tak, bɛ eezɛni tɔ ndjaa, zɛbela mɔn bɛ nɛ nyɛɛg Maali tin. Wɔ gwaa, bɛ zɛkwyit mɛboŋ si étɛp ɛduwal mɔn. Bhii tak, bɛ eezɛkɛɛ mɛkɔm mɔɔ. Bɛ eezɛpɛk nyɛ nɛ elɔɔd, nɛ epu ele na mbɛɛ mɛnuub di edikaa ɛ, zɛnɔɔ mul mɛ di djóoaa miid ɛ.

12 Bhii tak, wɔ gwaa Zɛɛb zɛlu bɛ tɔ dhyam náá, bɛ nàdhaa pɛ daa Eelood. Tin, é ɛsik ɛ lɔɔ pɛ dɛl, bɛ nakadhaŋ ɛ́, pɛ ze sis.

Zozɛf nɛ Maali eezɛnɔɔ mɔn’ɔɔ Yezu, kaab tɔ́ pɛ Eziptɛ

13 Bhii bɛtsoŋ ɛ bot binɔk natɔ́ ɛ, fofop ɛ Ghɛŋ ngɔt eezɛtuula Zozɛf tɔ dhyam. Nyɛy nɛ nɛ náá: «Wyɛla, nɔŋa mwalɔ nɛ mɔn, da bi ɛ́ kaab, tɔ́, kɛsɔwa pɛ Eziptɛ. Kɛdi penek, kɛkum dwoo mɛ aake náá, wɔ bula ɛ. Etɛɛ náá, Eelood ɛ́ waasaa mɔn étɛp nyɛ neegó nyɛ.» 14 Tin, Zozɛf ɛ́ boozɛwyɛl, nɔɔ mɔn nɛ myɛl, zɛkaab pum nɛ pum, tɔ́, kɛsɔwa pɛ Eziptɛ. 15 Zozɛf zokadi penek ɛ kɛkum ɛlu ɛ ɛsyee ɛ Eelood. Ye nasɛɛ deenek ɛ́, etɛɛ náá, etɛp ee Ghɛŋ naloolɛɛ tɔ nuub ngoolel-mɛkpa mɛ ɛ, neebela ɛsuk. Ye nabɛ ɛ́ náá: «Pɛ mɛ nadi pɛ kyee dik Eziptɛ ɛ, mɛ eedjóo mɔn’am*2.15 Oze 11.1.»

Eelood eezɛgó bɔɔ dhyeeb

16 Bhis Eelood nazɛgu náá, bɛtsoŋ ɛ bot binɔk naakɔɔ nyɛ ɛ, nyɛ naazɛbiyo ɛlyelɛpe. Wɔ gwaa nyɛ zɛdjɛ ɛlee nɛ bot bɛ náá, bɛ tɔ́ pɛ Bheteleɛm nɛ mɛl mɛ di é mengwoob ɛ djas, bɛ kɛgó bɔn botom djas di náá, bɛ dinaa ààpakum membu membá ɔ. Etɛɛ náá, ndem bɛtsoŋ ɛ bot nalɛɛ nyɛ ɛ, ye nabɛ ɛ́ náá, mɔn tak nadi ɛ́, tɔ lɔɔg membu menek. 17 Tin, etɛp ee ngoolel-Mɛkpa ɛ Zɛɛb Zeelemi nalɛɛ ɛ́, yɛ ɛ́ boo zɛbela ɛsuk. Nyɛ nabɛ ɛ́, nyɛ naake náá:

18 «Etsim ɛpegék pɛ dɛl ɛ Lama,

etsim e boo mɛgwyɛ nɛ mezuk.

Yɛ ɛ́ Lasyɛl ɛ di edje bɔn bɛ.

Nyɛ aanàkwaakat ɛgwyɛ,

etɛɛ náá, bɔn tokapɛ*2.18 Zel 31.15.»

Zozɛf nɛ Maali nɛ mɔn’ɔɔ eezɛdus kɔ Eziptɛ, sik pɛ Nazalɛt

19 Bhis ɛsyee ɛ Eelood, fofop ɛ Ghɛŋ ngɔt eezɛtuula Zozɛf tɔ dhyam pɛ Eziptɛ. 20 Nyɛy nɛ nɛ náá: «Wyɛla, nɔŋa mwalɔ nɛ mɔn, da bi ɛ́ sik pɛ kyee dik Yisalaɛl etɛɛ náá, bot djas nadi ekwyɛl ɛgó mɔn’ɔ ɔ, bɛ eezesi bhɛɛɛ.» 21 Tin, Zozɛf ɛ́ boozɛwyɛl, nɔɔ mɔn nɛ myɛl sik pɛ kyee dik Yisalaɛl. 22 Tinaak, dáa nyɛ nagwak náá, Aalekelaus naadjila sɛɛg Eelood kɔ bóó mɛkoozi pɛ kyee dik Yude ɛ, bwoo naazɛsa nyɛ, étɛp ɛtɔ́ penek. Zɛɛb ɛ́ boobaazɛdjɛ nyɛ mɛlyo mɛ sis tɔ dhyam. Tin, nyɛ eezɛtɔ́ pɛ dhiiti dɛl ɛ sis, pɛ kyee dik Ghalile. 23 Nyɛ ɛ́ boozɛtɔ́ kɛdi pɛ dhiiti dɛl, din ɛ dɛl ɛ tak ɛ́ Nazalɛt. Ye nasael deenek ɛ́, etɛɛ náá, dhiiti etɛp ee Zɛɛb nalɛɛ tɔ enuub e bɛngoolel ɛ Mɛkpa ɛ Zɛɛb ɛ, neebela ɛsuk. Ye nabɛ ɛ́ náá: «Bɛ aadjóo nyɛ ɛ́ mot Nazalɛt.»