1 É di’enek, Yezu eezɛni tɔ elɛɛd, sɛɛ boo soob na djato-djato, sik pɛ dɛl. 2 Tin, bɛdhiiti bot zokazyɛ nɛ mot ngɔt nazesɔɔb nɛ ɛbɛ́ ɔ, byaala kɔ mwaala. Dáa Yezu nabee ɛdum ɛ koŋ ɛ bot ɛ nazyɛ nɛ mbel tak ɔ, nyɛ naazɛke nɛ mbel náá: «Sa mɛghaaz mɔn’am, mesyem mɔ eepelel!» 3 Dáa bɛ nabee deenek ɛ́, bɛdhiiti bɛghaŋ ɛ mɛkana mɛ etsi ɛ Moiiz nabɛ ɛ́, bɛ moo enyiŋela pak’ɔɔ náá: «Nwyak mot ɛpebyasal Zɛɛb!» 4 É di tak wat, ye nabɛ ɛ́, Yezu naagu esiiza bɔɔ. Nyɛ boozɛke náá: «Étɛp yé bi di nɛ mbee esiiza tɔ elyem bin deenek? 5 Ɛyé di elyel nɛ nen, ɛke ɛ́ nɛ mot ɛbɛ́ náá: "Mesyem mɔ eepelel" ohoo, nɛghu ɛke náá: "Wyɛla, da wɔ ɛ́ kɛ"? 6 Ye goka ɛ́ bi gu náá, Sɛɛŋɛlɛ Mɔn Mot ɛ́ nɛ ghwyil ɛpel mesyem mɛ bot kɔ bɔs.» Bhii tak, nyɛ eezɛke nɛ mot zesɔɔb nɛ ɛbɛ́ ɔ náá: «Wyɛla, nɔŋa mwaala yɔ, da wɔ ɛ́ sik pɛ ndjaŋ’ɔ!» 7 É di’enek, mot’enɔk eezɛwyɛl, sik pɛ ndjaŋ’ɛ. 8 É di’enek wat, dáa ɛdhuu ɛ bot ɛ nadi tin ɔ nabee deenek ɛ́, bɛ naadyeebadjoka ɛlyelɛpe. Bhii tak, bɛ moo eduwal Zɛɛb dáa nyɛ nadjɛ mbi yenek mɛbwala nɛ bot ɛ.

9 Yezu eezɛdus tin, dáa nyɛ nadi edhaŋ ɛ, nyɛ naazɛbee dhiiti mot, din ɛ lɛ ɛ́ Matye, nyɛ nadi ɛ́ ndiindel é di mɛsa mɛ. Nyɛ nadi ɛ́ nɔŋel epata e lapo. Yezu eezɛke nɛ nɛ: «Dua mɛ!» Matye eezɛwyɛl ngbat, bhii tak, nyɛ eezɛdu nyɛ. Matye nɔŋel epata e lapo é di mɛsa mɛ

10 Yezu bɛ nɛ bɛdjekel bɛ nadi edɛ edee pɛ ndjaŋ ɛ Matye. Wɔ gwaa, bɛtɛ nɛ bɛnɔŋel ɛ epata e lapo nɛ bot ɛ mesyem zokazɛlwood tin, zɛdɛ bɛ nɛ bɛnɔɔ djas kɔ mesa wat. 11 Dáa eFalizyɛ nabee deenek ɛ, bɛ naazɛdji bɛdjekel bɛ náá: «Étɛp yé lyoel yen di edɛ edee é di wat bɛ nɛ bɛnɔŋel ɛ epata e lapo nɛ bot ɛ mbee dék?» 12 Yezu eegwak dáa bɛ nadi elii ɛ, tin, nyɛ ɛ́ boozɛke nɛ nɔɔ náá: «Bot ɛ di nɛ mɛnyel ɛnyɔɛpe ɔ tok nɛ gwyes ngwomel bot nyɛ neegwom bɛ. Yɛ ɛ́ membel ɛ di nɛ gwyes mɛgwoma. 13 Tɔ́ka, kɛdjekeka ɛsuk ɛ Mɛkpa ɛ Zɛɛb di eke náá: "Mɛ kwyɛl ɛ́ enɛm esa, ààkabɛ ebuwa e bɛtit*." Etɛɛ náá, mɛ nabɛ ɛ́ ààzyɛ zɛsaa bot ɛ epiki. Mam nazyɛ ɛ́ zɛsaa bot ɛ di egu náá, bɛ ɛ́ bot ɛ mesyem ɔ.»

14 Dhiiti dwoo, bɛdjekel ɛ Zaŋ Nduuel-bot naazyɛ zɛdji Yezu náá: «Étɛp yé bisɔ nɛ eFalizyɛ di etsi edee étɛp mendjaala, dhi bɛdjekel bɔ di ààtsi edee étɛp mendjaala?» 15 Wɔ gwaa, Yezu zɛbɔɔza nɛ nɔɔ náá: «Bi nakobee sok paa náá, bɛsɔ ɛ mwaaz di tɔ ghoŋ dwoo ɛba, dhi bɛ di lɔɔg wat nɛ mwaaz, mot paazyɛ, zɛba moma ɔ? Yenek ààsael! Deenek, ɛwala tak ɛpezyɛ, ɛwala ɛ di náá, mot zɛba moma ɔ waadisaa pak’ɔɔ. É di tak ɛ bɛ aatsi edee.

16 Ye tok nɛ mot aanyaa pes bes kaad étɛp ɛkoobal put kaad nɛ yɛ. Wɔ sa deenek ɔɔ, é sok wɔ aagwyii kaad tak ɛ, bes kaad ɛ́ waanyaa put kaad, da yɛ ɛ́ bek ɛlen ɛ tak. 17 Mɛnyok mɛ na bes ààwaaa tɔ bhɛɛb na mwa. Yɛ sɛɛ deenek ɔɔ, bhɛɛb ɛ́ nɛ ghwyil ɛbel, da mɛnyok ɛ́ see, deenek bhɛɛb eepulel. Yɛ ɛ́ étɛp tak ɛ bɛ di lɛɛaa náá, yɛ ààgoka deenek, etɛɛ náá, mɛnyok mɛ na bes goka ɛ́ tɔ ebes e bhɛɛb.»

18 Dáa Yezu nadi elii nɛ nɔɔ deenek ɛ́, wɔ gwaa dhiiti kukuma eYuda zɛzyɛ pɛ daa lɛ. Nyɛ eezɛkwyit mɛboŋ si mɛko mɛ. Nyɛy nɛ nɛ náá: «Ɛsyes ɛ lam ààlóo nɛ pɛka. Mɛ kwyɛl ɛ́, wɔ zɛkɛl mɛmbɔ kɔ lɛ étɛp nyɛ neegom!» 19 Yezu eezɛwyɛl, ngbat, bɛ nɛ bɛdjekel bɛ, du nyɛ.

20 Dhiiti moma nadi ebɛ́ ɛbɛ́ ɛ zoob, ghiya nadi ekekɛk nyɛ ààbɛ nɛ ɛtsek. Ɛbɛ́ ɛ tak naaboya nɛ nɛ é di membu kam nɛ ebá. Moma tak zokazɛtiila pɛ bhii koŋ ɛ Yezu, nyɛ eezɛmɛt kyee ɛghɔ ɛ kaad ɛ Yezu. 21 Étɛp, nyɛ nabɛ ɛ́, nyɛ eeke tɔ lyem’ɛ náá: «Mɛ zomɛt kaad’ɛ ɔɔ, mɛ ɛpetsak!» 22 Tin, Yezu eezɛliig mis, gwyák nyɛ. Nyɛ eezɛke nɛ nɛ náá: «Sa mɛghaaz ɛsyes ɛ lam! Ɛdum ɛ koŋ ɛ lɔ nɛ Zɛɛb eetsik wɔ.» É di tak wat, moma yenɔk naazɛtsak.

23 Bhii tak, Yezu eezɛtɔ́ pɛ ndjaa kukuma eYuda e tak. Dáa bɛ nakum ɛ, bɛ kabela bot ɛ, ebwom ngɔmbi, zɛnɔɔ bak bot esa yɔbɔ ɛzɛm pɛ ndjaa tak étɛp ɛkoobal esesɛɛ, bɛ neetɔ́ ndela. 24 Tin, Yezu eezɛke nɛ nɔɔ náá: «Wyiska pɛ kel, etɛɛ náá, ɛsyes ɛlak ààpagwyɛ, nyɛ dja ɛ́ gɔ́.» É di’enek, bɛ moo tin eduk Yezu. 25 Dáa bɛ nawyisal ɛdhuu ɛ bot pɛ kel ɛ, Yezu eezɛni tɔ dhɛŋ, nyɛ eezɛmɛt nyɛ é mbɔ, wɔ gwaa ɛsyes ɛlenɔk zɛwyɛl. 26 Menduk mɛ tɛp’enek naakɛ kɔ kyee dik’enek djas.

27 Dáa Yezu nadus tin ɛ, wɔ gwaa bot ɛ mɛbɛ́ mɛ edhim bɛbá zokazɛni edu nyɛ bhii koŋ nɛ etsim: «Mɔn Dhavid, geka bis ghoŋ!»

28 Dáa Yezu nakum pɛ ndjaŋ ɛ, wɔ gwaa, bɛ na edhim binɔk zɛtiila pɛ daa lɛ. Yezu eezɛdji bɛ náá: «Bi eemyaal náá, mɛ ɛ́ nɛ ghwyil ɛsa sa bi di ewaab’enek é?» Bot binɔk eezɛbɔɔza nɛ nɛ náá: «Iyooo, Ghɛŋ! Wɔ ɛ́ nɛ ghwyil ɛsa.» 29 Tin, Yezu eezɛkɛl bɛ mɛmbɔ kɔ mis. Nyɛy nɛ nɔɔ náá: «Zɛɛb eedjɛ bin sa djala nɛ ɛdum ɛ koŋ ɛ len ɛ.» 30 É di tak wat, wɔ gwaa bɛ nyaasok. Yezu eezɛlu bɛ ɛlyelɛpe náá: «Gwakeka mɛ ɛnyɔɛpe: sa mot ngɔt ààgu sa sɛɛ wak ɛ.» 31 Tin, bot binɔk katɔ́ ɛ́, elɛɛ tɔ kyee dik’enek djas esesɛɛ Yezu nasa ɛ.

32 É sok bɛ nadi ekwyɛl ɛtɔ́ ɛ, bɛdhiiti bot nabɛ ɛ́, bɛ eezyɛ Yezu nɛ mot ngɔt nadi bubu ɔ, etɛɛ náá, embee esisim nadi edhek nyɛ. 33 Dáa Yezu nasɔ embee esisim tak ɛ, é di tak wat mot’enɔk nabɛ ɛ́, nyɛ moo elii. Tin, ye nabɛ ɛ́, ɛdhuu ɛ bot ɛ nadi é di tak ɔ, moo tin edjoka. Bɔɔ náá: «Bis dinaa ààpakobee kɔkɔ mbi yak sonok tɔ Yisalaɛl.» 34 Yɛ kabɛ eFalizyɛ ɔɔ, bɔɔ nake yɔbɔ ɛ́ náá: «Yɛ ɛ́ kukuma embee esisim ɛ di edjɛ Yezu mɛbwala mɛ nyɛ di esɔ embee esisim nɛ yɛ ɛ!»

35 Yezu nadi ekɛ kɔ boo eghaada nɛ kɔ mɛl. Nyɛ nadi elelyo mɛdhuu mɛ bot tɔ mendjaa mɛ mendjaala mɛ eYuda. Nyɛ nadi egoola bɛ Mbɛɛ Bhaadal dum nɛ Ɛyoŋ ɛ Zɛɛb. Nyɛ nadi etsik bot ɛ di nɛ epel ɔ, zɛnɔɔ bot ɛ nadi nɛ edjam ɔ. 36 Ye nabɛ ɛ́, ghoŋ naasa nyɛ ɛlyelɛpe dum nɛ ɛdhuu ɛ bot ɛ nadi tin ɔ. Etɛɛ náá, bot ɛ tak nadi ɛ́, bɛ eezewak dáa mɛsaa mɛ ebhata di ààbɛ nɛ mbaalel ɛ. 37 Nyɛ ɛ́ boozɛke nɛ bɛdjekel bɛ náá: «Edee nɛ bu tɔ pyeeb, tin, bot ɛ ɛbɔ́k ààbu. 38 Ye goka ɛ́ bi djaala náá, nakuma pyeeb dhis bɛdhiiti bot ɛ mɛsa étɛp bɛ needis edee tɔ pyeeb.»