1 Mot nɛ mot goka ɛ́ nɛ ɛlooba nɛ eKukuma di edjɛɛd bot kɔ bɔs ɔ. Etɛɛ náá, ghwyil ekukuma djas dus ɛ́ pɛ daa Zɛɛb. Tin, bot ɛ di ekukuma ɔ, yɛ ɛ́ Zɛɛb ɛ nadjɛ bɛ bóó ekukuma. 2 Étɛp tak ɛ di náá, mot ɛ byen ɛlooba nɛ kukuma ɔɔ, nyɛ eebyen ɛlooba nɛ lwomel Zɛɛb nadjɛ ɛ. Tin, bot ɛ di ebyen ɛlooba ɔɔ, bɛ ɛpedul epɛ́ɛ kɔ lɔɔ. 3 Bot ɛ di esa enɛm esa ɔ, bɛ tok nɛ ghwyil ɛgwak bwoo nɛ ekukuma. Tin, yɛ ɛ́ bot ɛ di esa embee mɛsa ɔ di egoka nɛ ɛdi nɛ bwoo nɛ ekukuma. Wɔ kwyɛl ɛdi ààbɛ nɛ bwoo nɛ ekukuma ɔɔ, wɔ goka ɛ́ nɛ ɛsa enɛm esa, bɛ waamyaala nɛ nɔ. 4 Etɛɛ náá, ekukuma sa mɛsa mɛ Zɛɛb ɛ́ étɛp ɛkwyee wɔ é ɛsa enɛm esa. Tin, yɛ bɛ náá, wɔ eesa ɛbiyo ɔɔ, bema ba nɛ nɔɔ, etɛɛ náá, Zɛɛb naadjɛ bɛ ghwyil ɛwa bot ɛ di esa ɛbiyo ɔ é feŋ. É sok bɛ di esa deenek ɛ́, bɛ sa ɛ́ mɛsa ɛ Zɛɛb, étɛp ɛlyaal ɛbuk ɛ Zɛɛb nɛ bot ɛ di esa embee mɛsa ɔ. 5 Dum nɛ tɛp tak ɛ di egoka náá, bot looba nɛ ekukuma, ààzobɛ-bɛak étɛp ɛkaab ɛ feŋ. Tin, loobaka nɛ nɔɔ, etɛɛ náá, bi nɛ gu tɔ ebhum e elyem bin náá, yɛ ɛ́ sa di ɛnyɔɛpe ɛ.

6 Kɔ ɛsu ɛ tak ɛ bi di etuud membi mɛ lapo djas. Etɛɛ náá, bot ɛ di enɔɔ epata e lapo tak ɔ, sa ɛ́ mɛsa mɛ Zɛɛb. Étɛp tak ɛ bɛ di esa zii é ɛsa mɛsa mɛ tak. 7 Tuudka mot nɛ mot sa di egoka nɛ ɛtuudaa ɛ: Yɛ bɛ náá, yɛ ɛ́ etuud e epata e lapo ɔɔ, tuudka epata e lapo. Yɛ kabɛ dhiiti mbi etuud sis ɔɔ, tuudka yɛ. Yɛ bɛ ɛlooba ɔɔ, loobaka. Yɛ kabɛ tɛp ɛdjɛ duu ɔɔ, djɛka duu nɛ mot di egoka nɛ duu ɔ.

8 Nàdi nɛ kola nɛ sɔ’ɔ mot, ye di ààbɛ kola kwyɛl bi di egoka nɛ ɛdi nɛ yɛ pak’en ɔɔ, etɛɛ náá, mot di ekwyɛl bɛsɔ ɔ, looba ɛ́ nɛ etsi djas. 9 É di’enek, etsi lɛɛ ɛ́ náá:

«Sa wɔ ààsa mɛzɔ,

sa wɔ ààgó mot,

sa wɔ ààdjii sa mot,

sa wɔ ààwyeeb sa mot.»

Mɛtiŋ menek djas dus ɛ́ tɔ ɛtiŋ ɛ wat di eke náá: «Kwyɛla sɔ’ɔ mot dáa wɔ di ekwyɛl nyel’ɔ ɛmet ɛ✝.» 10 Mot di ekwyɛl mɔɔ sɔ mot ɔ, nyɛ tok nɛ ghwyil ɛsa nyɛ sa ɛbiyo. Tin, wɔ kwyɛl sɔ’ɔ mot ɔɔ, wɔ eelooba nɛ etsi djas.

11 Saka deenek etɛɛ náá, bi nɛ gu mɛwala mɛ mena kadika mos’aak: Yɛ ɛ́ ɛwala ɛ mena di egoka nɛ ɛdjem é egɔ́ ɛ. Etɛɛ náá, tsik moo ɛ́ ɛkunaaɛpe nɛ nena dhaa-dhaŋak é ghɛŋ mena nadumka koŋ nɛ Yezu Klisto ɛ. 12 Deenek, pum moo ɛ́ ɛtsetaɛpe, mɛlem moo aalem. Djhookatka ɛsa embee mɛsa mɛ di esael tɔ ghooghom ɛ, deenek, djhoonɔɔka bɛghɛl ɛ di ebeaa é mwos ɛ. 13 Djhookɛka tɔ epiki, dáa bot ɛ di ekɛ tɔ gwyɛ ɔ. Sa mena ààdika bot ɛ elangi, bot ɛ mɛzɔ. Sa mena ààdika bot ɛ di enɔɔ mɛzɔ tyee mɛsa ɔ. Sa mena ààdika bot ɛ mɛwɔ, bot ɛ di ewyeeb esa e bot ɔ.

14 Tin, dika nɛ mɛfulu ɛ Ghɛŋ Yezu Klisto. Sa bi ààbet náá, embee mɛkwosak pus bin é ze ɛbiyo.