1 Ɛdi ɛ́ mot mbyak eYuda kwyɛl ɛlɛɛ ɛ́, wɔ eedhaa bot djas é? Ɛni ɛ́ beka ɛ́ ɛpeval dhiiti sonok é? 2 Tsɛɛtsɛ, yɛ ɛ́ nɛ boo mɛtaŋ tɔ bɛtɛ nɛ esonok. Yii mɛkɛn ɛ́ náá, Zɛɛb naleekan ɛdjɛ mɛkpa mɛ ɛ́ nɛ bot ɛ mbyak eYuda. 3 Yɛ ɛ́ tsɛɛtsɛ náá, bɛdhiiti bot pak’ɔɔ nabɛ ɛ́ ààdi sosoob nɛ Zɛɛb. Tin, ye kakwyɛl ɛlɛɛ ɛ́ náá, Zɛɛb ɛ́ waakat ɛdi ɛ́ sosoob etɛɛ náá, bɛ tok sosoob é? 4 Ààbɛ deenek! Yɛ ɛ́ kobɛ náá, bot ɛ bɔs djas ɛ́ bot ɛ etsal ɔɔ, ye goka ɛ́, ye nyen popoopwon náá, Zɛɛb ɛ́ mot etsɛɛtsɛ. Yɛ ɛ́ tsɛɛtsɛ, Ekwyala lɛɛ ɛ́ náá:

«Ye goka ɛ́ náá,

bot gu epiki bɔ, tɔ mɛkpa mɔ.

Tin, mot ɛ pit wɔ ɔɔ,

wɔ pɛ́ɛaa ɔɔ,

wɔ goka ɛ́ nɛ ɛdi nɛ gham✝3.4 Mɛd 116.11; Mɛd 51.6 .»

5 Tin, yɛ bɛ náá, embee mɛsa mɛ mena di esa ɛ, ye ɛpesa náá, epiki e Zɛɛb nyen popoopwon é mwos dwoo ɔɔ, haaa mena aakabaake dáa? Zɛɛb ɛ́ ɛbiyoɛpe etɛɛ náá, nyɛ eewa mena é feŋ é? Mɛ kalii wak ɛ́ dáa bot djas di elii ɛ. 6 Yɛ aanàkwaasael deenek! Etɛɛ náá, yɛ ɛpedi ɛ́ di deenek ɔɔ, pe Zɛɛb aakasa dáa étɛp ɛpɛ́ɛ bot ɛ bɔs?

7 Yɛ bɛ náá, etsal bam ɛpesa náá, etsɛɛtsɛ e Zɛɛb nyen popoopwon étɛp ɛlyaal duma yɛ ɔɔ, haaa, étɛp yé mɛ baadi epɛ́ɛaa dáa mot mesyem? 8 Bɛdhiiti bot ɛ di ààkɛ tɔ epiki di eke náá: «Djhoosaka ɛbiyo, etɛɛ náá, enɛm esa neenyen.» Bot binɔk ɛpebyak mɛ, bɛ ɛpeke náá, yɛ ɛ́ mɛkpa mam. Mbi binɔk bot ɛ́ waawaaa é feŋ di egoka nɛ nɔɔ ɛ.

9 Yɛ ɛ́ dáa? Ye kabɛ ɛ́ náá, menabɛlka bot ɛ mbyak eYuda eedhaa bot ɛ membyak mɛ sis é? Ààbɛ! Mɛ naazeloolyaal náá, bot djas, ye nakoozodi bot ɛ mbyak eYuda nɛghu bot ɛ mbyak eGhɛlɛk, bɔɔ djas ɛ́ si bhel mesyem. 10 É di’enek, Ekwyala lɛɛ ɛ́ náá:

«Ye tok nɛ mot di piki,

ààkobɛ-bɛak mot ngɔt,

11 ye tok nɛ mot di etselal,

ye tok nɛ mot di esaa Zɛɛb.

12 Deenek, bɛ tokapɛ é tɛtɛ ze,

bɔɔ djas eezewo ze.

Ye tok nɛ mot di esa enɛm esa,

ààkobɛ-bɛak mot ngɔt.

13 Egheŋel-gheŋel bɔɔ moo ɛ́ dáa ɛvit ɛ di náá, yɛ ɛ́ mbek ɛ,

edjem bɔɔ kagu ɛ́ mɛkɔŋ,

sa di ewyis kɔ ekwood e enuub bɔɔ moo ɛ́ dáa neya ɛgel,

14 enuub bɔɔ moo ɛ́ tɔɔɔ nɛ ekɛlok, nɛ embee mɛkpa àànyɔ.

15 Bɛ nɛ kwyɛs ɛ́ mɛko étɛp ɛgó ɛ bot.

16 É edi djas bɛ di edhaŋ ɛ, yɛ ɛ́ puluk,

tin bɛ ɛpewa bot tɔ tsik mezuk.

17 Bɛ ààkwyɛl ɛdi tɔ ɛgwakel nɛ bɔn-nyɛɛg bɔɔ.

18 Bɛ ààkaab Zɛɛb*3.18 Étɛp mɛlaŋel 10-12: Mɛd 14.1-3; 53.2-4; Ye nɔŋel ɛ́ tɔ mɛkana mɛ namwa tɔ lii eGhɛlɛk. Étɛp ɛlaŋel ɛ 13: Mɛd 5.10. Ye nɔŋel ɛ́ tɔ mɛkana mɛ namwa tɔ lii eGhɛlɛk. Mɛd 140.4. Étɛp ɛlaŋel 14: Mɛd 10.7 Ye nɔŋel ɛ́ tɔ mɛkana mɛ namwa tɔ lii eGhɛlɛk. Étɛp ɛlaŋel 15-17: Eza 59.7-8. Étɛp ɛlaŋel 18: Mɛd 36.2..»

19 Bis nɛ gu náá, esa djas Etsi di elii ɛ, ye lii ɛ́ nɛ bot ɛ di si etsi ɔ. Etɛɛ náá, bot needi ààbɛɛ nuub étɛp ɛtaŋal. Deenek, étɛp bot ɛ bɔs djas needi nɛ ndjɛ é mis ɛ Zɛɛb. 20 Etɛɛ náá, ye tok nɛ mot aadi piki é mis ɛ Zɛɛb kɔ ɛsu ɛlooba nɛ etsi, bela náá, etsi lyaal ɛ́ esyem mɛ mot di esa ɛ.

21 Nenak yak, Zɛɛb eezetel mena dáa nyɛ di esa náá, mena dika bot ɛ epiki é mis mɛ, ààbɛ náá, yɛ ɛ́ kɔ ɛsu ɛ etsi ɛ. Bɛmɛkana mɛ etsi dɔɔ nɛ bɛngoolel ɛ Mɛkpa ɛ Zɛɛb naazeloolɛɛ yɛ. 22 Zɛɛb sa náá, mot di piki é mis mɛ ɛ, kɔ ɛsu ɛ ɛdum koŋ ɛ lɛ nɛ Yezu Klisto. Tin, nyɛ sa yɛ ɛ́ nɛ bot djas di edum koŋ nɛ Klisto ɔ, etɛɛ náá, ye tok nɛ mbɛk pak bot, 23 tin, bot djas naazesyem, duma ɛ Zɛɛb tokapɛ tɔ lɔɔ. 24 Tin, Zɛɛb tɔ enɛm nɛ embɛɛ bɛ, nyɛ eesa náá, mot di piki é mis mɛ, kɔ ɛsu ɛ Yezu Klisto mot di epɛk bot tɔ mesyem, ààbɛ nɛ efute ɔ. 25 Nyɛy ɛ́ mot Zɛɛb nasɛ́ɛ étɛp ɛka nyɛ buwa, etɛɛ náá, ghiya yɛ needis bot ɛ di edum koŋ nɛ Zɛɛb ɔ tɔ mesyem. Nyɛ nasa deenek ɛ́ étɛp ɛlyaal epiki bɛ. É ghɛŋ sok, nyɛ nabɛ ɛ́ ààbis mesyem mɛ bot, etɛɛ náá, nyɛ ɛ́ nɛ ɛmaad lyem. 26 Zɛɛb eelyaal epiki bɛ tɔ mɛlu mɛ mena dika mos’aak. Etɛɛ náá, nyɛ ɛ́ mot epiki, nyɛy ɛ di esa náá, mot di edum koŋ nɛ Yezu ɔ, di pe mot epiki.

27 É di’enek, bot ɛ́ waabaadi nɛ gham ɛghɛɛ nyel é? Ààbɛ, haaa! Étɛp yé? Yɛ ɛ́, etɛɛ náá, sa di wak ɛ, ye tokapɛ dum nɛ ɛlooba nɛ etsi, yɛ ɛ́ dum nɛ ɛdum ɛ koŋ nɛ Zɛɛb. 28 Mena ɛ́ nɛ ghwyil ɛke náá, Zɛɛb bee mot piki ɛ́ kɔ ɛsu ɛ ɛdum ɛ koŋ ɛ lɛ nɛ Zɛɛb, ààkabɛ etɛɛ náá, nyɛ ɛpelooba nɛ etsi djas. 29 Deenek, Zɛɛb ɛ́ yii bot ɛ mbyak eYuda bɔɔ bɛmet é? Nyɛ tok nɛ ghwyil ɛbaadi Zɛɛb bot ɛ di ààbɛ bot ɛ mbyak eYuda ɔ? Tsɛɛtsɛ, nyɛ pe ɛ́ Zɛɛb bot ɛ di ààbɛ bot ɛ mbyak eYuda ɔ, 30 etɛɛ náá, Zɛɛb ɛ́ ngɔt. Zɛɛb aasa náá, bot ɛ mbyak eYuda di bot ɛ epiki kɔ ɛsu ɛ ɛdum ɛ koŋ nɛ Zɛɛb. Yɛ ɛ́ nyɛy ɛ aabaasa náá, bot ɛ di ààbɛ bot ɛ mbyak eYuda ɔ, bɛ di pe bot ɛ epiki kɔ ɛsu ɛ ɛdum ɛ koŋ nɛ Zɛɛb. 31 Ye kakwyɛl ɛlɛɛ ɛ́ náá, bot ɛ di edum koŋ nɛ Zɛɛb ɔɔ, etsi ààkaval é? Yɛ aanàkwaasael deenek, yɛ ɛ́ náá, bis ɛpedjɛ etsi boo mɛtaŋ.