1 Malagicho gya Musa ndi muwano va kinyigi kya njowo nofu dachechikwacha na sechiwana na njowo chila cha undakyene, matambiko galagala gegigitwa mwaka kwa mwaka, segiwesa ng'odo kuvang'alicha vanu vala vevakumgundamikila Nguluvi, 2 ngita avo vanu vevakumgundamikila Nguluvi ngavavang'alichwe sambi chawo ndakyene, ngasevayiwene kangi kuva vagehe na sambi na matambiko gala gyevakagahumiche ngavalekile. 3 Ila matambiko ago gigitwa kila mwaka kuvawiwusa vanu sambi chawo. 4 Kwakuva, danda lya likambako na mene seiwesa kuvahechela vanu sambi.

5 Ndeni kilisito peakali ikwacha muinyi, akamlongiye Nguluvi,

"Seukasakile litambiko vala usembe,

ila ukandindalila muvili.

6 Veve sewikeleswa na litambiko,

awu usembe va kuhecha sambi.

7 Baho ndikalongile, ‘Ndigehe baha,

eve Nguluvi, kugita gala gyeukela,

ngita pendisimbilwe nene mukiganulo kya malagilicho gya Musa.’" 8 Akavangile kulonga, "Seukakeliye vala seukeleswa na litambiko vala usembe, tambiko cha kunyanywa na kuhecha sambi." Akalongile ndeni ata ngita matambiko ago gyonda gakahechilwe kuwana na malagilicho ga Musa geagavilwe na Nguluvi. 9 Baho akalongile, "Ndigehe baha, kugita kyeusaka veve Nguluvi." Ndeni, Nguluvi akaligalambule litambiko lya pamwandi na kuvika litambiko limwi. 10 Kwakuva Yesu Kilisito akagitile gyeikela Nguluvi, nefwe tung'alichwa sambi chetu kwa yila litambiko lya muvili vake mwene yeahechile mala yimwi hela.

11 Kila mtekechi Muyawudi igita kasi lyake lya kiutekechi kila kigono na kuhecha matambiko galagala mala chongofu, ila matambiko ago segiwesa kuhecha sambi cha vanu. 12 Ila Kilisito ihechile litambiko limwi kwakuva lya sambi, litambiko lya mbepali, ndeni akalile lubali lwa luwoko lwa ndewo lwa Nguluvi, 13 kuvangila chipindi icho akuchindila mbaka vachundwama vake avavike panyi lya magulu gyake ngita kinu kya kuvikila magulu gyake. 14 Suwe, kwakuva Kilisito ahichile kuva litambiko mala limwi, avang'aliche sambi chenu na kuvagita vanu vake mbepali.

15 Muhe va Nguluvi ndeni ndeni akutulongela njowo ichi. Tandi ilonga,

16 "Iyi ndi lyagano lyedandigita na vao figono fyefikwacha.

Dandivika malagilicho gyangu munumbula chawo,

na kuchisimba malagilicho gyangu muluhala chawo."

17 Baho akalonga, "Dasendiwiwuka kangi sambi chawo vala magito gyawo mawofu." 18 Suwe, sambi pechihechwa, kuhela kangi kuhecha litambiko lya kuhecha sambi.

19 Ndeni vakolo vangu, kwa danda lya Yesu tugangamichwe kwingila Pono Pang'alile ngajila wogofi. 20 Mwene katudindulile ng'asi miya, ng'asi yeikulongacha muwumi, kuchumbila lila lipasiya akagitile ndeni kwa kuuhecha muvili vake. 21 Ndeni, tugehe na mtekechi mkomi yeihimilicha mukaye lya Nguluvi. 22 Suwe, tumuhegelele Nguluvi kwa numbula nofu na kwa ludikilo lwa undakyene, tukivecha na numbula cheching'alichwe kuhumila na natilo njanganifu na mivili gyetu giwogofechwe kwa malenga manofu. 23 Tulikolele luhuvililo lwetu lwe tukuuidikila na lye tukulilonga kwa milomo gyetu, kwakuva Nguluvi yeavikile lyagano lyake nde va undakyene. 24 Tung'ang'wa kugangamilichana numbula neke tukelane na kwigitila manofu nefwe kwa nefwe. 25 Tubihile kuleka kutang'ana pamwi, ngita ndeni vangi pevalekile kutang'ana. Ila tung'ang'wa kutangana, ngita pemulola kigono kya Mtwa kigehe pepi. 26 Ngita tukwendelela kugita sambi kwa dadi hela kuno tuchela undakyene, suwe kuhela litambiko lyelivecha kuhechwa kangi kwajili lya kuhecha sambi cha vanu. 27 Ila kyekisigala ndi kuchinda kwa wogofi kuhigwa na Nguluvi kwa lyoto daukuvadocha vonda vevakumkana Nguluvi. 28 Munu yeyonda yekana malagilicho ga Musa geagavilwe na Nguluvi, udochwa ngajila kuwonelwa lusungu ikiva kugehe na vaswida va vanu vavili awu vadatu. 29 Mulola wuli, munu yula yeakumbeba Mwana va Nguluvi na kuilola danda lya lyagano lya Nguluvi yeimung'aliche sambi se kinu na daipatila lihigo liki? Na yeamulige Muhe va Nguluvi daipatila lihigo liki? 30 Kwakuva, tuchela kuva Nguluvi akalongile, "Kasi lya kupilusa ndi lyangu, dandipilusa kila kyevagitile, nene dandikuvapilusila vao." Ndeni ndeni akalongile, "Daakuvahiga vanu vake." 31 Ndi lukani lwa kogofya hilo kutang'ana na lihigo kuhuma kwa Nguluvi yeagehe wumi!

32 Muwiwuke gyegahumie figono fila fya pamwandi pemudikile Kilisito ata ngita mkagudile hilo, ila nyenye mukahuvilile. 33 Kigono kingi mukaligilwe na kubedelwa pautalo lya van, kwa chipindi chingi mukavatangile vala vevagudiswe ngita nyenye. 34 Mukavawonela lusungu vala vevakali mukiwopo, mkaidikile kwa lukeduko pemkanyagilwe finu fyenu, kwakuva mukali mwichela munumba chenu mugehe na finu finofu hilo, dafivecha mbepali. 35 Ndena, mubihile kuyagicha ukakatima venu kwa Mtwa, kwakuva likuvaletela fupo ngomi kuhuma kwa Nguluvi. 36 Mwing'ang'wa kuvecha na luhuvililo neke mugite gala gyeing'ang'a Nguluvi na kwanuka gala gyeavalongiye. 37 Kwakuva, isimbilwe Mumasimbo gya Nguluvi kuva,

"Kisigiye chipindi kidodo hela,

na uyo yeikwacha, daikwacha,

na seikawiya.

38 Ila munu vangu yeigita gyegikunikelesa daakwikala kwa kunidikila nene,

ila ngita ikogofya,

nene sendikeduswa na mwene."

39 Suwe, nefwe setugehe ngita vanu vevileka kumfwatila Nguluvi na kuyaga, ila tugehe pamwi na vanu vevidikila na kulowolwa.