1 Nefwe tuchungutilwe na lipinga likomi lya vaswida. Ndeni kuheche kila kinu kyekitukanila na sambi yila yetung'ang'anila, tunyile kwa luhuvililo mumasindano gyetuvikilwe. 2 Tumfutuliye meho Yesu yetumdikila kuhuma pamwandi mbaka kumwiso. Kwakuva lya lukeduko yeikali ikumchindila akahuvilile kipindilihicho, seakawonile nyoni kipindilihicho na nondee akalile lubali lwa liwoko lwa ndewo lwa kigoda kya ung'achale kya Nguluvi.

3 Muhoche njowo chechimpatile Yesu, peahuvilile kuhigwa na vanu vene sambi, suwe mubihile kufwahila na mubihile kudenyeka numbula. 4 Ingava mkwitasa semwitovile kwa nyenye na sambi, nyenye semugudike mbaka kudochwa. 5 Wuli musemwile makani aga ga kugangamicha numbula gyealongile Nguluvi kuva nyenye ndi vana vake?

"Mwana vangu, ubihile kubeda Mtwa peakulakilila,

Baho peakulakilila bihile kudenyeka numbula.

6 Kwakuva Mtwa humulakalila munu yeyonda yeakumkela mwene,

na kumukanila munu yeyonda yeakumdikila kuva mwana vake."

7 Muhuvilile pala pemukanilwa Nguluvi akuvagitila nyenye ngita vana vake. Wuli ndi mwana liki yeseikanilwa na daada vake. 8 Ila Nguluvi akuvahiga vana vake vonda, ngita Nguluvi dasevakuvahiga muchele kuva nyenye se vana vake, ila ndi vana va mung'asi. 9 Kangi kuhumila na ago, nefwe vonda tugehe na vadaada vetu vevatubabile vevakutukanila na nefwe tukuvadikila. Suwe, setung'ang'wa kumuginya hilo Daada vetu va kuluhano neke tuwese kwikala mbepali?. 10 Vadaada vetu yevatubabile vakutukanila kwa figono fidodo ngita pevawona vene ndi unofu. Ila Nguluvi akutukanila kwa kututanga nefwe na tuveche vang'alila ngita mwene. 11 Kwihela munu yeakukedukila kutovwa, ila liletila lusugwimo. Ila vanu vevayiwulaniche kuva na kyanda nofu kwa ng'asi lya kutovwa, vakwikala kwa lutengamaso na kugita makani gegidikilwa pautali lwa Nguluvi.

12 Suwe, mugangamiche mawoko gyenu gyegifwahile na mafugamilo gyenu gasosovafu. 13 Mwendelele kugenda mung'asi yeigolike na yeagehe mtenda abihile kusilila ludali, ananichwe.

14 Mwigangamale kwikala kwa lutengamaso na vanu vonda na kwikala kutali na sambi kwakuva kuhela munu dayeakumwona Mtwa ngajila kwikala ndeni. 15 Mwigangamale hilo munu yeyonda abihile kupwemuka usanzi va Nguluvi. Mwilolele munu yeyonda abihile kuwana na lidede kwa lya libiki lng'ali na kulembula na kuvagudisa vangi kwa sumu lyake. 16 Mwilolele neke mugati lyenu pabihile kuvecha na munu mgoni awu munu yeseamkogopa Nguluvi ngita Esawu yeakaguchile uhala va ubabwa va ulongolo kwa kyakuliya kimwi. 17 Nyenye mwichela kuva ata pambele peasakile kupata kangi wula lunemelo weukali vake akakanilwe, kwakuva seweseile kugalambula kwa kila kyeagitile ata ngita akasakile hilo kwa mahochi.

18 Nyenye semukafikile kidunda Sinai ngita pevafikile vanu va Isilaeli. Kidunda kyekiweswa kukolelwa kuno wikwaka lyoto wene lifunde lisito na kisi na lukala lwelupuga hilo, 19 na kyowo kya lingalapi na vakapulike Nguluvi akilonga. Vanu vala vevampulike Nguluvi akilonga, vakasukile vabihile kuywanga nave kwa ng'asi ilyo, 20 sevawesile kuwanuka malagicho geihechilwe, "Dayeikolela kidunda iki, ata ngita ndi mng'oko, daitovwa na maganga mbaka afuwe." 21 Ago gyonda gavagitile vakogope hilo, mbaka Musa akalongile, "Ndikogopa hilo na kuhilima."

22 Ila nyenye mfikile kidunda cha Siyoni mumwani va Nguluvi yeagehe wumi, mufikile Yelusalemu mumwani va kuluhano kwa Nguluvi pamwi na vandumindumi volofu seviweswa kuvalilwa. 23 Mufikile mulipinga lya vanu vevamdikile Nguluvi va kwanja, matawa gyawo gasimbilwe kuluhano. Mwachile kwa Nguluvi yeihiga vanu vonda na muhe cha vanu vevamukelesa Nguluvi vevagitilwe vang'alila. 24 Mwachile kwa Yesu mupatanisi vanu na Nguluvi mudanda yeisukwike kuchumba yila lya Abeli.

25 Suwe, mwilolele mubihile kukana kumpulikicha uyo yeilonga. Ngita vanu vala vevalemile kumpulikicha yula yeavalakile baha painyi sevalowike, nefwe twiwesa wuli kulowoka ngita tukana kumpulikicha yula yeakutulakila kuhuma kuluhano kwa Nguluvi? 26 Chipindi kila lichwi ikahogoseka inyi chipindi kila, ila nondee atulongiye, "Dandihogosesa kangi mala yimwi inyi, neke kutuwonesa finu fyonda fyefiwumbilwe muinyi dafihongesekwa na kufihecha ila fisigala fila sefihongeseka." 27 Luchowo ulu ambalyo likalongile kangi, liwonesa kuva finu fyonda fyeawumbile Nguluvi muinyi dafihogoseka na kuhega kuyaganika neke fisigale fila seviwesa kuhogosekwa.

28 Ndena, nefwe tuhongeche, kwakuva tuwanuke ung'achale weseuhogoseka. Tuveche na luhongecho na kumgumbanikila kwa kumkelesa na kumpulikicha na kwa kumukogopa, 29 kwakuva Nguluvi vetu ndakyene ndi lyoto mkali weuhanangicha.