1 Suwe, kwakuva gala gealongile Nguluvi, makani ga kwingila pono pakutulula, gave gagehe, tugangamale neke munu yeyonda mugati lyenu abihile kulemuwa kwingila pono pakutulula. 2 Kwakuva Njowo nofu idalikilwe kwa nefwe ngita fila peidalikilwe kwa avo vanu va dahila. Ila unanzi ugo seukavatangile kinu, kwakuva vakaupulike ila sevakauwanuke kwa kwidikila. 3 Ila nondee, nefwe yetudikiye tukwingila pono pakutulula. Ngita pealongile Nguluvi,

"Vakandivipise na ndikalapile,

‘Sevikwingila ng'odo pono lyangu pakutulula.’"

Nguluvi akalongile ago peasindile kasi lya kuwumba inyi yonda. 4 Kwakuva, pono tunga Mumasimbo gya Nguluvi gilonga kutigila kigono kya saba, "Nguluvi akamalile kasi chake chonda na kutulula kigono kya saba." 5 Pono baho pasimbilwe kangi, "Dasevikwingila pono pangu pakutulula." 6 Suwe, vanu vala pevapulike Njowo nofu pamwandi sevaingiye pala pono pakutulula, kwakuva vakakanile kwidikila. Ila jangila lya kwingila pono pakutulula yave igehe. 7 Nguluvi akavikile kigono kingi kyekikemelwa, "Neng'uli." Akalongile kangi njowo icho pambele, kuchumbila Dawudi ngita Masimbo gya Nguluvi pegilonga.

"Ngita neng'uli mupulika lichwi lwa Nguluvi,

mubihile kuvecha na kidada." 8 Ngita Yoshuwa ngaavalongocha vanu avo pono pa kutulula ngita pealongiye Nguluvi, suwe Nguluvi ngasealongile makani gya kigono kingi kya pambele. 9 Ndeni, kwave kusigaliye kigono kya kutulula kwa vanu va Nguluvi. 10 Kwakuva kila yeakwingila pono pakutulula pa Nguluvi daatulula kuhuma mukasi lyake ngita Nguluvi peatulule peamalile kasi lyake. 11 Suwe, tugangamale kwingila pono baho pakutulula, neke abihile kuvecha munu yeyonda mugati lyenu abihile kuyaga kwa kukana kwidikila ngita pevagitile vao.

12 Luchowo lwa Nguluvi ligehe na wumi na ludali, ndi ling'ali kuchumba lipanga leligehe na mang'ali lyeliwesa kudumula kuno na kuno, na kwingila na kunengecha numbula na muhe, mbaka pale pefitang'anila fiwungo fya muvili na uloto. Luchowo ulo ugubutula natilo na mahocho gya numbula cha vanu. 13 Ndeni, kuhela kiwumbe kyokyonda kyekifyamila pautalo lya Nguluvi, ila kila kinu kigehe wachi pautalo lyake na kwa mwene datung'ang'wa kulonga gyonda gyetugitile.

14 Kwakuva tugehe na Mtekechi Mkomi yeingile kuluhano kwa Nguluvi, uyu nde Yesu Mwana va Nguluvi. Suwe, tung'ang'wa tukolele hilo ludikilo lwetu. 15 Uyu Mtekechi Mkomi vetu akutuwonela lusungu usosuvafu vetu, mwene akagechilwe ngita nefwe kwa ng'asi cholofu ila seakagitile sambi. 16 Suwe, tuhegelele ngajila wogofi kigoda kya ung'achale kya Nguluvi yeagehe msanzi, neke twanuke lusungu na usangi va kututanga chipindi cha utatala.