1 Suwe, njowo chikomi chechitulonga nde ichi, nefwe tugehe na mtekechi mkomi yeikaliye luwoko lwa ndewo lwa kigoda kya ung'achale kya mkomi ukoya kuluhano. 2 Ukoya kuluhano mwene igita kasi lya Utekechi Ukomi, mukyama lya ukoya kuluhano ambako ndi pono pang'alile hilo, ndi kyama lyelichengilwe na Mtwa na se vanu.

3 Kila mtekechi mkomi ahaguliwe kumhechela Nguluvi fupo na usembe va kunyanya. Ndeni mtekechi vetu mkomi ing'ang'wa aveche na kinu kya kuhecha. 4 Ngita mwene ngaavechile baha painyi, ngaseavechela mtekechi ng'ono, kwakuva vagehe vatekechi vangi vihecha usembe va kunyanya ngita peging'ang'a malagilicho ga Musa geagavilwe na Nguluvi. 5 Kasi chevakuchigita vatekechi ava chiwana na linyigi lya makani gegagehe kuluhano. Ndena, Musa pegehe igalanicha kyama, Nguluvi akamlongiye, "Lole ugelaniche kila kinu ngita peuwenesilwe peukali kukidunda." 6 Ila nondee Yesu agavilwe kasi lya kitekechi yeigehe ngiba hilo kuchumba lya vene, ngita fila mnjengakaya va lyagano ngiba hilo kuchumba lila lyagano lya dahila, kwakuva lihimile nofu mulitamiko va jangila ngiba hilo.

7 Ngita lila lyagano lya dahila selikali na livifyi, setung'ang'a kuvecha na lyagano lya uvili. 8 Ila Nguluvi akawene nongwa lya vanu, akalongile,

"Figono fikwacha,

dandigita lyagano lyangu limiya na vanu va Isilaeli na vanu va Yuda.

9 Lyagano ilyi selivecha ngita lila lyendikagitile na vagogolo vao,

kigono kila pendikavalongocha unofu kuhuma muinyi lya Misili.

Kwakuva sevakalikolela lyagano lyangu,

na nene ndikavalekile.

10 Ili ndi lyagano dandigita na vanu va Isilaeli figono fyefikwacha,

dandikuvagita vahoche malagicho gyangu,

na kuchisimba munumbula chawo.

Nene dandivecha Nguluvi vawo,

na vao davivecha vanu vangu.

11 Kuhela munu yeyonda dayeakumuwulanicha muyage,

vala munu dayeakumlongela lukolo lwake,

‘Mchele Mtwa.’

Kwakuva vonda davakunichela nene

kuvangila mdodo mbaka mkomi.

12 Dandikuvahechela uwofu chawo,

dasendiwiwuka kangi sambi chawo."

13 Nguluvi peakulikemela lyagano limiya, iwonesa kuva lyagano lya kwanja ndi lya dahila na kyokyonda kya dahila kivecha kusakala na kigehe pepi kuyaga.