1 Kila mtekechi mkomi ihagulwa pagati pa vanu vake na kumugumbanikila Nguluvi ngajila lya vanu, neke kuvahechela usembe na fupo neke Nguluvi avahogeche sambi chawo. 2 Mtekechi mkomi iwesa kuvatanga vanu pevagita sambi, ila mwene ndi msosuvafu, kwakuva mwene igita sambi. 3 Kwa ndena, yumwene ndi msosovafu ing'ang'wa kuhecha usembe sekwakuva lya vanu, ila kwakuva lya sambi chake mwene. 4 Kwahela munu yeiwesa kwigita mwene kuvecha mtekechi mkomi. Nguluvi mwene nde akumkemela munu kuva mtekechi mkomi ngita peakali Haluni.

5 Ndeni ndeni, Kilisito seakwigitile kuvecha mtekechi mkomi, ila Nguluvi akamlongiye,

"Veve ndi Mwana vangu,

neng'uli nene ndivechile Daada vako."

6 Ndeni ndeni pono pangi mumasimbo gya Nguluvi gilonga,

"Uvecha mtekechi mbepali,

mukasi lya utekechi va Melikisedeki."

7 Yesu peakali akwikala baha mu inyi, akamsukile Nguluvi na kumvembela kwa mahochi, kwakuva akali na umwimike va kumulowa mukufuwa, kwakuva akali akumginya hilo Nguluvi, ndeni Nguluvi akampulikicha. 8 Ata ngita akali Mwana va Nguluvi, akayiwulaniche kwidikila kwa ng'asi lya magudo. 9 Peamalile kasi yealagilichwe na Nguluvi, akali luvangilo lwa ulowa va mbepali kwa vala vevakumwidikila, 10 na Nguluvi akamhaguwe kuvecha mtekechi mkomi ngita peakali Melikisedeki.

11 Tugehe na gyolofu gya kulonga pakyanya lya utekechi ugu, ila seupefu kuvahumulila, kwakuva nyenye sevapefu va kuchela. 12 Kwa chipindi ichi mukang'ang'ilwe kuvecha vawulanichi, kwakuva figono fyolofu fikachumbile ila nyenye wave mkela munu avaulaniche mawulanichi gya pamwandi njowo cha Nguluvi. Nondee badili kuliya kyakula kingafu nyenye mwisaka kukong'a mavele. 13 Yeyonda yeikong'a mavele hela ave mwana, kwakuva seichela manofu vala manjanganifu. 14 Ila vanu vevakangie yende veviliya kyakulya kikangafu, kwakuva vanu avo vawulanichwe kuchela manofu na manjanganifu.