1 Melikisedeki uyu akali ng'achale va mwani va Salemu na mtekechi va Nguluvi Mkomi. Ibulahimu akali ihuma kufita peakavadochile vang'achale vatai akatang'anile na Melikisedeki na mwene akamunemele, 2 baho Ibulahimu akamgaviye pono yimwi lya chumi lya finu fyonda fyeakali nafyo. Mana lya kwanja lya litawa lya Melikisedeki ndi, "Ng'achale yeigita gyeisaka Nguluvi," Ndeni ndeni akalii ng'achale va Salemu, mana lingi lya litawa lyake ndi, "Ng'achale va lutengamaso." 3 Melikisedeki akali ihela daada vala maye, vala seakali na lukolo seikali kwihela munu yeichela ababilwe pandili awu akafuwe pandili. Melikisedeki ndi ngita Mwana va Nguluvi, kwakuva daivecha mtekechi mbepali.

4 Suwe, muhoche munu uyu peakali mkomi hilo. Kuuku vetu Ibulahimu akamgaviye pono lya kyumi lya finu fyonda fyeakanyagile kufita. 5 Suwe, tuchela kuva kuhumila na lulagilicho lwa Musa, valelo va Lawi vakali vatekechi, ikuvasaka kunyamula pono yimwi lya chumi kuhuma kwa vanu va Isilaeli ata ngita vene vihuma muulelelo va Ibulahimu. 6 Ila Melikisedeki seakali ulelo va Lawi, ila akawanuke pono lya chumi kuhuma kwa Ibulahimu, kangi akamnemele Ibulahimu, munu yeawanuke jangile kuhuma kwa Nguluvi. 7 Ndi undakyene kuva munu yeakumunemela yungi, ndi mkomi kuchumba yula yeinemelwa. 8 Kangi, vatekechi avo vevawanuka pono lya chumi, ndi vanu hela vevifuwa, ila Melikisedeki akawanuke pono lya chumi kwa Ibulahimu yeagehe wumi mbepali. 9 Suwe, tuwesa kulonga kuva ata Lawi ambalye vanu va lukolo vake uwanuka pono lya chumi na mwene akahumiche pono lyake lya chumi kwa Melikisedeki kuchumbila Ibulahimu. 10 Kwakuva, Melikisedeki pevatang'anile na Ibulahimu, Lawi akali ave mumvili va Ibulahimu kuuku vake.

11 Kwakuva, Vaisilaeli vakagavilwe malagilicho ga Musa geagavilwe na Nguluvi, malagilicho ago gigahumile na utekechi va Lawi. Ila ata ndeni utekechi ugo seukakamilike, ndeni ikang'ang'ilwe wache utekechi wungi ngita va Melikisadeki, ambavo seuwana na utekechi va Haluni. 12 Kwakuva, utekechi peuseduka ndi ying'ang'wa na lagilicho nalyo liseduke. 13 Njowo chechilongwa ndi cha Mtwa vetu, akali va likabila lingi na vala kuhela ata yumwi va likabila lyake yeakagitile kasi pakindangavala akiva mtekechi. 14 Ichelwa wachi kuva mwene akababilwe mulikabila lya Yuda ambalyo Musa seakalitambuche peakali ilonga njowo cha vatekechi.

15 Kangi njowo ichi ndi wachi hilo, mtekechi yungi yekali ngita na Melikisedeki suwe ahumiye. 16 Mwene seakagitilwe mtekechi kwa malagicho na malagilicho gya vanu, ila akali mtekechi kwa ludali lwa uwumi vake weuhela mwiso. 17 Kwakuva, isimbilwe Mumasimbo gya Nguluvi kuva, "Veve dauvecha mtekechi mbepali, ngita peakali Melikisedeki." 18 Suwe, yila lugilicho lwa dahila lwa utekechi ikatigilichwe kwakuva ikali sosuvafu na seikawesile kututanga. 19 Kwakuva, malagilicho ga Musa geagavilwe na Nguluvi seikatukamilise. Ila nonde tugehe na luhuvililo linofu, kuchumbila luhuvililo ilyo twiwesa kumuhegelela Nguluvi.

20 Chipindi Valawi pevavikwa kuva vatekechi, sekukali na kilapo, ila nondee muutekechi ugu kugehe na kilapo kya Nguluvi. 21 Ila Yesu akagitilwe mtekechi kwa kilapo, pala Nguluvi peamlongiye,

"Mtwa alapile,

na mwene daseisedusa natilo lyake,

‘Veve ndi mtekechi mbepali.’"

22 Kwa kwilapa ukoya, Yesu yeiwonesa undakyene lyagano linofu hilo kuchumba lila lya pamwandi.

23 Kangi, avo vatekechi vangi vakali vanu hela, ndeni chipindi chawo cha kufuwa, pechifikile vakafuweu, ndeni sevawesile kwendelela na kasi lyawo lya utekechi, ndeni nde ikagitile vaveche volofu. 24 Ila Yesu akwikala mbepali na utekechi vake uhela mwiso. 25 Ndena, mwene agehe na ludali chakuvalowa vonda vevakumuhelelela Nguluvi kuchumbila mwene, kwakuva mwene akwikala mbepali na kuvasukila kwa Nguluvi.

26 Suwe, Yesu nde Mtekechi Mkomi yetukumung'ang'a, mwene ihela lupwemuko lyolyonda, yeihela sambi vala nongwa lolonda, Nguluvi akamnengile kuhuma kwa vene samabi na akamkang'iche kuluhano. 27 Mwene akali seiwana na vatekechi vangi, mwene sekahechile litambiko kila kigono, akivanga kuhecha litambiko lya sambi chake, kangi kwa sambi cha vanu vangi. Mwene akagitile ndeni mala yimwi hela kwakuva lya vanu vonda pala peayihechile yumwene ngita litambiko na iyi itosa kwa chipindi chonda. 28 Ila kwa kufwatila Malagilicho ga Musa geagavilwe na Nguluvi vanu vakali vivikwa vatekechi vakomi ingava vakali vigita sambi, ila pambele Nguluvi akagitile kwa kilapo akamuhagule Mwana aveche Mtekechi Mkomi, ambalye yesepwemuka na kinu kyokyonda mbepali.