1 Kumudikila Nguluvi ndi kuvecha na undakyene kuva makani gegituhuvilila dagigitwa. Kangi ndikuhuvilila hilo makani ambago segatugalola nondee. 2 Kwa ng'asi ilyo lya kumdikila Nguluvi, vagogolo vetu vakamkelesa hilo Nguluvi.

3 Kwa kudikila tuchela kuva inyi ikawumbilwe kwa luchowo lwa Nguluvi, ndeni finu fyefiwoneka fiwumbilwe kuhuma mufinu sefiwoneka.

4 Kwa kudikila kwa Abeli akamhechela Nguluvi litambiko lyelikali linofu hilo kuchumba yila lya Kaini. Kwa kudikila kwa mwene, Nguluvi akamdikile kuva msanzi pautalo lyake. Nguluvi yumwene akachidikile litambiko lyake. Ila kwa kudikila kwake, ata ngita Abeli afuwe. Kudikila kwa mwene, iendelela kuvecha mufano mnofu kwa nefwe mbaka neng'uli.

5 Kwa kumudikila Nguluvi kukamugitile Enoki anyamuliwe kuhelela kuluhano, ndeni seafuwe. Seakawonike kangi kwakuva Nguluvi akamnyamuwe kuhelela kuluhano. Masimbo ga Nguluvi giwonesa peave seanyamuliwe kuhelela kuluhano kwa Nguluvi, Enoki akali munu yeakumkelisa Nguluvi. 6 Kwihela yeyonda yeiwesa kumkelesa Nguluvi ngajila kumudikila Nguluvi. Kwakuva munu yeyonda yeakumuheleliya Nguluvi ing'ang'wa adikile kuva Nguluvi poyuli na kuvagavila fupo vala vevakumsaka kwa kugangamala.

7 Kwa kudikila kwa Nuhu ikamugitile kupulikicha, pealakilwe na Nguluvi kutigila makani gala dagikwacha pambele, gala gesegiwoneka. Baho akagelaniche safina, neke Nguluvi avalowe mwene pamwi na vakolo vake. Na kuvahiga vanu muinyi vevakali sevamwidikile Nguluvi. Kwakuva lya ilyo, Nuhu akagitilwe kuva msanzi pautalo lya Nguluvi. 8 Kwa kudikila kwa mwene Ibulahimu ikamugitile amupulikiche Nguluvi pala peamulongile ahege muinyi lyake, ahele muinyi daakumgavila iveche lyake. Na akahegile muinyi lyake na seakachelile peakuhelela. 9 Kwa kudikila kwa mwene Ibulahimu akakalile ngita mgenji mu inyi yealongilwe daigavilwa na Nguluvi. Akakalile ukoya mukyama ngita pevakalile Isaka na Yakobo, avo navo vakawanuke gala gala gealongile Nguluvi. 10 Kwakuva, Ibulahimu akali ichindila mwani ambalyo kitamiko lwake kichengilwe na Nguluvi, mwani ambago Nguluvi yumwene akahochile na kuuchenga.

11 Kwa kudikila kwa mwene Ibulahimu akali Daada ata ngita akali mgogolo hilo, ndeni ndeni Sala akali mgumba. Ibulahimu akamdikile Nguluvi kuva daigita kila kyealongile dakumgavila. 12 Ndeni, Ibulahimu akali mgogolo ngita munu yeafuwe, ndeni kuhuma kwa munu uyu yumwi vakababilwe vanu volofu vesevivalilwa ngita nondwa cha kuluhano na muhanga va mung'umbu muinyinza.

13 Vanu ava vonda vakafuwe kuno vakwimdikila Nguluvi. Vakafuwe kuno vave sevawanuke gala gevalongilwe na Nguluvi, ila kwa utali vakagawona vakahekelela na kudikila wachi kuva vao vakali vagenji na vevagehe muligendo muinyi iyi. 14 Vanu vevilonga makani ngita aga, viwoneka visaka inyi lyawo vavene. 15 Ngita ngavivecha vihocha inyi yevahumile dahila, vangepatile fwasi lwa kuwuya kuko. 16 Ila nondee vakuikela inyi inofu hilo, inyi lya kuluhano kwa Nguluvi. Ndeni, Nguluvi seiwona nyoni pevakumkemela Nguluvi vao, kwakuva mwene avaandalile mwani vao.

17 Ibulahimu kwa kumudikila Nguluvi, ikamugitile adikile kumuhecha litambiko mwana vake Isaka peagechilwe na Nguluvi. Ibulahimu yumwene nde yeakawanuke kila kyealongilwe na Nguluvi, ila ata ndeni, akadikile kumuhecha litambiko mwana vake vaweka, 18 ila Nguluvi akali amulongile Ibulahimu, "Kuchumbila Isaka daupata ulelo." 19 Ibulahimu akadikile kuva Nguluvi iwesa kuvachulubucha vanu vevafuwe, iyi ngita fila Ibulahimu akamwanuka Isaka kuhuma kwa vanu vevafuwe.

20 Kwakuva kwa kudikila kwa Isaka ikamugitile avanemele Yakobo na Esau, vawanuke lunemelo lwelukwacha pambele.

21 Kwa kudikila kwa Yakobo peakali pepi kufuwa, kukamugitile avanemele vana vavili va Yusufu na kumgundamikila Nguluvi kuno asagamiye lusaga lwake.

22 Kwa kudikila kwa Yusufu peakali pepi kufuwa, kukamugitile alonge njowo cha Vaisilaeli kuhuma ku Misili, akavalagiche vaigite liki michege gyake.

23 Kwa kudikila kwa vasasi va Musa kukavagita vakamfyamile Musa kwa myechi gidatu kuhuma peababilwe. Vakamwene kuva akali mwana mnofu, vala sevakaogwipe malagilicho ga ng'achale va ku Misili.

24 Kwa kudikila Musa kukamugitile peakulile, akakanile kukemelwa mwana va mhinja Falao. 25 Akawene ndi ngiba kugudika pamwi na vanu va Nguluvi kuchumba kukedukila sambi kwa chipindi chidodo. 26 Achele kuva kumgudikila Kilisito ndi umosi mkomi hilo kuchumba umosi vonda va inyi lya Misili, kwakuva akali ichindila fupo daigavilwa na Nguluvi.

27 Kwa kudikila kwa Musa kukamugita ahege kuhuma inyi lya Misili ngajila kogofya luvipo lwa ng'achale na seawuyile kumbele kwakuva akali ngita munu yeamuwonile Nguluvi yeseawoneka. 28 Kwa kudikila akagitile lihungu lya Pasaka, akalagiliche danda imichwe pamisimbili, neke Ndumindumi va kuluhano kwa Nguluvi yeidocha abihile kuvadocha vababwa va ulongola va Isilaeli.

29 Kwa kudikila, vanu va Isilaeli vakahagime inyanza lya Shamu ngita inyi ng'afu, ila Vamisili pevakagechile kuhagama vakafuwe mumalenga.

30 Kwa kudikila lukanji lwa mwani va Yeliko chikaguwe, pevachichungutile vanu va Isilaeli kwa figono saba. 31 Kwa kudikila kwa Lahabu mkidala yeakali mgoni kukamugitile, seakadochilwe pamwi na vala vevakali vamulemile Nguluvi, kwakuva akavawanuke vala vevalagichwe kulolesa inyi lyao.

32 Wuli, ndilonge liki kangi? Ndihela muda va kuhumulila makani gya Gidioni na gya Balaka na gya Samusoni na gya Yafita na gya Dawudi na gya Samweli na gya vavichi va Nguluvi. 33 Kwa kudikila vonda avo vakatovine na vang'achale na vakavatova. Na vakagitile makani gya usanzi, vakawanuke gala gyeavalongie Nguluvi. Vakadindile milomo gya simba, 34 vakachimile myoto ming'ali, vakananile kudochwa kwa mipanga. Pevakali vasosuvafu vagavilwe ludali, vakali na ludali mufita, vakavatova vapuga vagenji. 35 Na vadala yevidikiye vakawuyisilwe valongu vawo vevachulubuchwe.

Vamonga vawo vakalimile kuvopolwa, vakagudiswa mbaka kufuwa neke vachulubuke na kwingila muuwumi veugehe nofu hilo. 36 Vangi vakabedilwe na kutovwa ndomondo, vangi vakawopilwe ndegeyi cha kyuma na kutagwa mukiwopo. 37 Vakafuwe kwa kutovwa maganga, vakabachuliwe fipande fivili kwa sege, vakadochilwe kwa mipanga. Vakachungutile kuno na kuno vakiva vafwalile gwembe cha ng'ondolo na gwembe awu cha mene, vakali vanu vahangala, vagudiswe na kugitwa makani manjanganifu. 38 Vanu va inyi seavakuvakela kuvecha na vanu vasanzi ngita ava. Kwa ndeni, vanu avo vakali vichunguta chunguta mudasi na fidunda, vakalile mumanga na mulilindi.

39 Vanu ava vonda vakampendesile Nguluvi, kwakuva kwa kudikila kwa vene. Ila kwihela ata yumwi yeawanuke gala gegajangilwe na Nguluvi, 40 seavapatile ago, kwakuva Nguluvi atuvikile makani manofu hilo, neke nefwe pamwi na vene, tugawanuke ago ambagyo Nguluvi agajangile kuva daakutugavila.