1 Suwe, lyagano lya kwanja likali na malagicho gyake gyakugundamila na kyama kyekichengilwe na vanu kya kugundamila. 2 Pakagelanichwe kyama, kyumba kyake kya kwanja kikakemeliwe pono pang'alile hilo, mumo kukali na kindangavala kya kuvikila chibatali na mesa yeikali na mibumunda yeikavikilwe pautalo lya Nguluvi. 3 Kumbele lya lipasiya lya uvili, kukali na kyumba kyekikemeliwe pono pang'alile hilo. 4 Mumo kukali na kindangavala kya sahabu kwa kunyanyila manung'ililo na lisanduku lya lyagano, lyelikali libakilwe sahabu lubali chonda na mugati lyake mukali na kiviya kya sahabu kyekikali na kyakula kyekikemelwa mana na lusaga lwa Haluni yeikali ihomuwe mahamba na fila fibawo fyefisimbilwe malagilicho. 5 Pakyanya lya lila lisanduko kukali na fiwumbe fivili fyefigehe na mapapatilo veviwonesa ukomi va Nguluvi, mapabatilo gyao gagubike kukyanya lya lugubikilo va sanduku. Ila nondee setuwesa kugahumulila kukyanya ga makani ago.

6 Ndeni, nde fivikilwe finu ifyo, ndeni vatekechi nde vakali vakwingila mukyumba kya kwanja na kuhecha usembe va kunyanya kila kigono. 7 Ila mtekechi mkomi hela nde yeikwingila mukila kyumba lya uvili na mwene igita ndena mala yimwi hela kwa umwaka, akali ikwingila na danda yeakumhechela Nguluvi kwajili lya sambi chake na kwajili ya sambi chevagitile vanu. 8 Kuhumila na makani ago, Muhe va Nguluvi iwonesa wachi kuva, ng'asi lya kuhelela pono pang'alile hilo yave kudinduliwa kwa vanu vangi, kwakuva kyama kya pamwandi likali lyave. 9 Njowo ichi ndi uwano va chipindi cha nondee, ambapo fupo na usembe va kunyanya chihechwa sechiwesa kumuhechelela sambi, 10 ila ifi fyonda figagitilwe hela na fyakuliya na finywaji pamwi na malagicho gyonda gya kwiwogofecha kwa mvili ng'ani, ludali lwake wisila pala Nguluvi peakuvigita finu fyonda kuvecha.

11 Ila Kilisito achile suwe na akivecha mtekechi mkomi va njowo manofu, gegiachile. Mwene igita kasi mukyama lingi, lyeligehe linofu hilo kangi ndi likamilifu kuchumba lila lya pamwandi. Kyama ilyo selichengilwe na vanu, ndeni kyama ilyo se lya inyi iyi. 12 Kilisito akaingiye pono pang'alile hilo mala yimwi hela. Seakaigiye na danda lya mene awu danda lya senga lya kuheche usembe va kunyanya, ila akaingiye kwa danda lyake yumwene, akatugaviye ulowola va mbepali. 13 Kwakuva, danda lya mene na likambako na kifu lya gwada vevamichilwe vala vanu sevadikilwe mukumgundamila Nguluvi, ung'alicha na kuvahechila uhafu va mivili gyao, 14 ila kwa danda lya Kilisto, igita makani makomi hilo! Kwa ludali lywa Muhe va Nguluvi, Kilisito ihechile yumwene litambiko kwa ludali lwa Muhe va Nguluvi yeagehe wumi, figono fyonda ifyo danda lyake ihogofecha numbula chetu chiveche nofu hilo kuhuma mumagito gyetu mawofu neke tumkumbanikile Nguluvi yeagehe wumi.

15 Kilisito ndi mnjengakaya va Lyagano limiya, neke vala vevakemeliwe vaveche kwanuka lyagano, kwakuva mwene akafuwe neke avakombole vanu musambi chevakagitile vanu mulyagano lya dahila.

16 Kwakuva, figono fyonda baluwa yeisimbilwe lya kuhala igita kasi pala hela yeasimbile afuwe. 17 Gala geagalagiche givecha na ludali ngita lyagano lya kuhala lihela ludali ngita munu yealongile ave wumi. 18 Ndeni, ata lila lyagano lya kwanja selikavikilwe ngajila danda. 19 Kwanja Musa akavalongiye vanu lagicho gyonda ngita pegikalongile. Baho akanyamule danda lya ngwada na mene na malenga, makwati gya libiki lya likongela na wusi mdung'u, akimichila kila kiganulo kya malagicho na akavamichile vanu vonda. 20 Musa akalongile, "Iyi nde danda yeiwonesa kuva lyagano ilyi ndi lya undakyene yeavalagiliche Nguluvi mulidikile." 21 Ndeni ndeni Musa akamichile yila danda mukyama na mufinu fyonda fya kumfunyila Nguluvi. 22 Ndakyene kwa malagilicho gya Musa ngita fila kila kinu kogofya kwa danda na sambi chihechwa pala danda peisukuka.

23 Finu ifi nde kimanyilo kya finu fya undakyene va kuluhano, ving'ang'wa fiwogofwe kwa danda. Ila finu fya kuluhano fing'ang'wa litambiko linofu hilo. 24 Kwakuva Kilisito seakaigie pono pang'alile hilo pepachengilwe kwa mawoko gya vanu, pepagehe ngita uwano pono pipene hilo. Mwene ikaingiye kuluhano kwa Nguluvi mwene, nondee akaimile pautalo lwa Nguluvi kwajili lya nefwe. 25 Mtekechi mkomi va Vayawudi ikwingila pono pang'alile hilo kila mwaka kuno agehe na danda lya mng'oko, ila Kilisito seakaingiye umo neke ayiheche yumwene mala cholofu, 26 ngita ngaivecha ndeni Kilisto ngaagudiswe mala chongofu kuhuma inyi peiwumbilwe kwakuva ngaiveche ndeni Kilisito ngaing'ang'ilwe kugudika mala chongofu. Ila nondee chipindi ichi cha mwiso, mwene ahumiye mala yimwi hela kuhecha sambi kwa litambiko va mvili vake. 27 Ngita munu ufuwa mala yimwi hela, pambele ihigwa na Nguluvi, 28 ndeni ndeni Kilisito ihechile litambiko mala yimwi hela neke kuvahechela sambi vanu volofu peikwacha kangi seikwacha kwajili lya sambi ila ikwacha kuvakombola vala vevakumhuvulila.