1 Ndeni, vakolo vangu yemukemeliwe muveche vana va Nguluvi, muhochele Yesu yealagichilwe na Nguluvi, aveche mnjagila na mtekechi mkomi va ludikilo lwetu. 2 Mwene akali mdikilwa kwa Nguluvi, yeamhaguwe kugita kasi lyake, ngita Musa peakali mdikila kuvakumbanikila vanu vote va Isilaeli, avo nde kaye lya Nguluvi. 3 Ila Yesu ing'ang'wa uginyange mkomi kuchumba Musa ngita fila mgelanicha peinjumwa hilo kuchumba kaye yene. 4 Ndakyene kila kaye igelanichwa na munu tunga ila Nguluvi ndi mgelanicha va finu fyonda. 5 Musa akali mndakyene va kila kinu ngita mchulila kwa vanu vonda va Isilaeli mukaye lya Nguluvi na akalongile njowo dailonga Nguluvi pambele. 6 Ila Kilisito, mwene ndi mwana mndakyene va kila kinu, yeakuvalongocha vanu va kaye lya Nguluvi. Na nefwe nde vanu avo kaya lya Nguluvi, ngita hela datukwendelela mbaka mwiso kuva vagangamala na kwidumbila mumakani gala getuhuvilila.

7 Ndena, ngita peilonga Muhe va Nguluvi mumasimbo,

"Ngita, mukipulika lichwi lyake neng'uli,

8 mubihile kuvecha na kidada ngita vagogolo venu pevamkanile kumginya Nguluvi,

ngita kigono kila pevakali vakunigecha ukoya kudasi.

9 Ukoya nde vagogolo venu vakali vakundigecha na kundilola,

ata ngita vakalolile magito gyangu kwa miyaka alubaini.

10 Kwa ndeni, vakandigitile ndivipe na ndikalongile,

‘Vanu ava ndivanjanganifu figono fyonda,

na valema kudikila malagilicho gyangu.’

11 Ndeni, ndikavipile na kwilapa ndikalongile,

‘Dasevikwingila ng'odo muinyi yeandikuvagavila vatulule!’"

12 Vakolo vangu, mwilolele abihile kuvecha munu pagati lwenu yeagehe na mahocho manjanganifu, yesedikila na kuvagita vanu vayinenge na Nguluvi yeagehe wumi. 13 Ila mwigangamiche mwavene kila kigono neke kubihile kuvecha na munu mugati lyenu yeigitwa mkangafu kwa kuchangwa na sambi. 14 Kwakuva nefwe tuvechile kinu kimwi mkwa kwiwunga na Kilisito, ikiva ngita twikolela luhuvililo lyetu lyetukali nalyo pamwandi mbaka mwiso.

15 Ngita pegilonga masimbo gya Nguluvi

"Ngita neng'uli mukuipulika lichwi lwa Nguluvi,

mubihile kugita numbula chenu kuvecha ng'angafu,

ngita pevakagitile vagogolo pevamukanile Nguluvi."

16 Ndi va ani avo yevapulike lichwi lwa Nguluvi na vakamkanile? Wuli, sevala vonda vevakalongochwe na Musa kuhuma ku Misili? 17 Wuli, ndi vaani vevamuvipise Nguluvi kwa miyaka alubaini? Ndi vala vevakagitile sambi na kufuwa ukoya kudasi? 18 Nguluvi pealapile, akalapile ndeni, "Dasevikwingila pono pangu pakutulula" Akavalongile va ani? Akali akuvalongela vala vonda vevakakanile kumwidikila. 19 Suwe, twilola sevawesile kwingila pono pakutulula kwakuva vakakanile kudikila.