1 Yeso a tre ri,<<Me layi kpunji tre nji riwa a ran gra ri tra ho ntɨma dzu ku nkon tra ran, ran dzu ku ŋɨma ri nkan a he nji ri yɨbi nga nji ri vi nji kpi ra. 2 Inji riwa a gra dzu ku nkon tra wawu he nji ri kɨshu ntɨma. 3 Inji ri gben ri nkon tra ho ntɨma ari bu nkon ri wu intɨma-a wa wo raan wan riwa ari yo wa ntɨma wan ri nde mba nga ran kɨshu wa zhi ri raa. 4 Ka a kɨshu wa zhu ri ran ari hi kusi mba nga intɨma-a wa ran hu kugon ritu wa to raan wan. 5 Wa ran hu njo ri nkan ran tsede wa ran klu-u ritu wa ran to raan wan ran.>>

6 Yeso a la wa kɨbu tre nye ama wa ran to tu wan ran.

7 Imba Yeso ka bru tre nganga ri,<<Me la yi kpunji tre, me he nkon riwa ntɨma wa gra dzu. 8 Wawu wawa wa gbuchi ye ri mo wa he wa yɨbi nga wa vu kpi ra ama intɨma wa ran wo wa ran. 9 Me he nkon, wawa wa hu ri me gra wa fe kpachuwo wa gra rimi nga wari zhu raa hi wa kya ri ri. 10 Inji ri yɨbi ri ye ritu ran yɨbi ran wuu nga ran kpa kongye time. Ame me ye ritu no ko ngaa no fe viri riwa a ran kre ran.

11 <<Yeso a tre ri ame me he nji ri kɨshu ntɨma dindi riwa ari wa ran kuu ritu ntɨma wan. 12 Ka nji riwa a ran he nji riwa wa ban wu no kɨshu ntɨma nga a ran he ri ntɨma ran ka a to yawu ri ji ri ye ari tsutsu ran ka ntɨma wan don yawu ri ji ri vu ntɨma ri ran kpa mgbron mba pisi. 13 Inji riwa wa ban wu ritu wa ban wu ban nye nga a ran taka ritu nɨma-a ran. 14,15 Me he nji ri kɨshu ntɨma dindi. Bibi riwa A ti to wen ame me to A ti ngawen, ngamba nye ngawen me to ntɨma won nga wawa ngawen wa to wen nga me wa miri kuu ritu mba. 16 Imgbron ntɨma won wari wa he riwa wa ran he ri tra ho nyi ran me hi ngɨzhi wa ye no wa he igbu riri nga nji ri kɨshu riri.

17 <<A ti nyɨme wen ritu me wa miri ka vri won de ritu riwa me bru kpa nganga. 18 Inji ran ban vri won hi ngawan ran me ka-u de ri su son won nga me he ri mgbemgbrn riwa me bru kpaa rinyi nye he kya riwa A ti won la wen me ti-u.>>

19 Isron wa nji Yahuda ka bru ga ti hari ritu tre wan nyi. 20 Wari kigbu mba wa ran tre ri,<<A he ri bɨzhi! Ari sra ritu ngye ko ki sren ton ri wu?>>

21 Ama mgbron mba wa ran tre ri,<<Inji riwa a he ri bɨzhi ran ri tre nganyi ran wa ti ri se ko ibɨzhi ri no nji ri mfyen no to tsu?>>

22 A he ri vi riwa isi a ran ti nga wa ran roro ri tika vi riwa wa ka tra ibreran no Izhi ri Urushalima. 23 Yeso a ran zrenri ri tra nkon ri wa solomu ri tra bre, 24 Inji waka kagon wan wa ri miyen ri,<<Hi shitan nye wu sondu kata dzi ri sron hari? La ta kpunji tre a wu nye wu he Kristo>>

25 Yeso ka nyɨme ri,<<Me gbuchi la yi ama bi ran kpanyɨme ri me ran kyawa riwa me ti ri gbengbren A ti won a tre ritu won, 26 ama bi ran kpanyɨme ri me ran ritu bi ran he rimi wa ntɨma won ran. 27 Intɨma won wa wo raan won nga wari hu wen. 28 Me no wa vɨri riwa a ran kre ran nga wa ran kuu ran, injo ran kpa wa riwo won ran. 29 Ikya riwa A ti won no wen a han kongye, nga injo ran ri kpa wa ri wo wan ran. 30 A ti won nga ame ki he riri.>>

31 Imba wa nji Yahuda-a wa bru vu tita riwa wa ta Yeso. 32 Yeso ka la wa ri,<<Me ti kyawa wa dindi bran ri si mbi riwa A ti won no wen me ti, ko ritu ritan nye rimi mba bi wa bi ri ta wen ri tita ritu wan?>>

33 Waka nyime ri,<<Ki ran ri wa kiri ta-u ri tita ritu kya ndindi riwa wu ti nye ran ama ritu tretre meme ritu Izhi. A wu wu he nji nye ama wu wa wuri kɨma ngawen he ka Izhi!>>

34 Yeso ka nyɨme ri wa,<<A he rimi ngan rimi Doka mbi ri, Izhi tre ri,<<Bi he zhi wawa bi ran to wa ran nye.> 35 Ki to ri ikya riwa imbe Izhi tre a he kpunji nga Izhi yo nji wamba ri izhi riwa wana to wa ran nji wawa wa ka tre wan no wa. 36 Ama A ti chu wen nga ran ti wen ndu hi ri mgbumgblume, ko ari he se ko bi tre ri me tretre meme ritu me tre ri me he vren Izhi? 37 Ran kpanyɨme ri me ran, ka me ran ri ti kya riwa A ti won wa me ti ran. 38 Ama ka me ti wa ko bi ran kpanyɨme ri me ran bi kpanyɨme ri ndu won ritu bi ri to ri A ti won he ri me nga ame ngawen me he ri A ti won.>> 39 Nganga wa bru ran wa wari vu Yeso ama ka jɨbu ri wo mba.

40 Yeso ka bru kɨma rugran hi ri Ba Yodan ri bubu riwa Yohana a ran son nji tu ri ima ri gbuchi ran son ri bubu wan. 41 Inji kɨgbu waka ye ri wu wari tre ri,<<Yohana ran ti kya ri de sisiri ran, ama ko ngye riwa a tre ritu nji nyi a he kpunji.>> 42 Ngha nji kigbu ri bubu wan waka kpanyɨme ri Yeso.