1 Kugon rimba, Yeso ka hi ri Urushelima ritu roro ri tsitsri vi riwa nji Yahuda. 2 Ri Urushelima juju ima ri nyun nkon tra ri riwa wa yo wu ri nkon ntɨma riwa wa ti bru mgbɨreton kagon wan riwa inde wan ri rɨme Hibruniyawa a he Betazda. 3 Rimi bru nye wa lilo wa mfyen, wa mkpuzhu nga wa gblu kpa kigbu wasi kakru ri bubu wan. 4 Imiri ko Izhi wasi ye ri bubu wan ri vi ri vi wari ran chu ima-a nga nji riwa a ye gra rimi ima-a gbuchi ko bibi lilo bibitan riwa a he ri wu ari fe si. 5 Inji ri lilo ri a he riwa a ti se setra don tandra a ran to zren ran. 6 Riwa Yeso a to-u ka a kakru imba ran to ri a ti vi hari ri bubu wan,Yeso ka miyen-u ri,<<Wu wa wuri fe si?>>

7 Inji ri lilo-a ka nyɨme ri Yeso ri,<<A wu nji rinkon me ran he ri nji riwa ari dzon wen no wen me hi gra rimi juju ima-a ri vi riwa wa miri ko Izhi wa chu ima-a ran, ka me wa meri gra in jo ri nkan ri ye gra gbuchi ri moo.>>

8 Imba Yeso ka la-u ri,<<Wulunde kri nde wu ri ban blaa wen wuri zren.>> 9 Ri bubu wan nji-a ka fe sika ban blaa wan ran zren.

Ama chachu wan a he chachu sonvri riwa nji Yahuda. 10 Imba nji Yahuda-a waka tre ri nji riwa wa den kpa chuwo ri,<<Luwa he vi son vri bibi riwa doka Musa tre ri a ran tsra riwa wu ban blaa wen luwa ran.>>

11 Inji-a riwa wa den ka lawa ri,<<Inji kiwa a den wen nye la wen ri me ban blaa won meri hi ngawon.>>

12 Waka miyen-u ri<<Ingaa nye he nji mba riwa a tre ri no ban blaa wen wuri zren?>>

13 Ama nji-a ka ran to ran ritu Yeso a kado gra rimi jɨbu nji.

14 Ri vi ban kusi tsawen Yeso ka fe nji-a ri ko Izhi ran tre wu ri,<<To mba, wu to wu fe si-e, ka ti meme ti chuwo ritu no kya riwa a meme han rimba no ran fe wu ran.>>

15 Imba nji-a ka hi ran ka la wa rinkon wa nji Yahuda ri Yeso nye den wawu.

16 Imba wa rinkon wa nji Yahudan waka gra no Yeso yaa ritu riwa a ran den nji ri chachu vi sonvri. 17 Ama Yeso ka la wa ri,<<Bibi riwa A ti won ri sondu ti ndu ame ngawen me ti ngamba.>>

18 Itre Yeso ka no nji Yahuda-a wa wa wari wuu Yeso wa tre ri a ran ritu a ka wan ri hu doka ri vi sonvri katre ran ama a he ri Izhi he A ti wan nye ko a ka ngawan ri kabru ri Izhi nye mba.

19 Yeso ka tre wa ri,<<Me la yi kpunji ivven ran to ti kya ri tuwan ran ari ya kya riwa iti wan ti ri ko ran ti bibi wan. 20 A ti ri nyɨme vren ran ri tsro-u kya riwa wawu ri tu wan ri ti ari tsrou ndu wawa wa han wanyi ritu bi ri ti sisiri. 21 Bibi riwa A ti ri ta nji shɨme ri kuu ran no wa vri ngamba nye ivren ngawen ri de vri ri nyi riwa isron wan nyɨme-u. 22 A ti ran ri bla tre ri njo ran ama a no vren gbengbren wawu ri bla tre ri ko ngaa, 23 ritu no ko ngaa no vren wen mkpen bibi riwa wa no A ti nji riwa a ran no vren wan mkpen ran a ran no A ti riwa a ti vren wan ndu ye ran.

24 <<Me la yi kpunji tre nji riwa ari wo tre won nga ran ri kpanyɨme ri Izhi riwa a ti wen ndu ari fe vri riwa a ran kre ran, wa ran no yaa ran ritu a jɨbu ri kuu ran gra rimi vri. 25 Me la yi kpunji tre ivi ri ye riwa a ye-e riwa wawa wa kuu wa wo rann vren Izhi nga wawa wa wo wa son ri sii. 26 Bibi riwa A ti ri tuwan he nchi vri nye ngamba nye a no vren wan no he nchi vri ngawen. 27 Ngha Izhi no gbengbren ri bla tre-a ritu a he vren nji nye. 28 Ran ti sisiri ritu tre nyi ran, ritu ivi ri ye riwa wawa wa he ri bubu gru wa wo ran wan, 29 wari zhuu ri bubu gru ye, wawa wa ti kya ndindi wa tashɨme wari son ri si, ama wawa wa ran ti kya riwa a tsra ran wa tashɨme nga wa no wa yaa.

30 <<Ame ri tu won me ran to ti kyari ran me bla tre won bibi riwa Izhi la wen me bla. Ritu a ran ti won nye me hu ran, ama a he ti nji riwa a ti wen ndu nye me hu.

31 <<Ka me la tre ritu ngawon a ran he riwa a tsra ran. 32 Ama nji ri he riwa ari la tre ritu won nga me to ri itre-a riwa ari tre ritu won ri he kpunji. 33 <<Bi ti Yohana ndu nga a la tre ri kpuunji. 34 Kau ri ngamba me ran yosron ri la trenji ran me tre rimba ritu no nji no wa fe kpachuwo. 35 Yohana a he ka iwulu a ran gon ran ran kpan nga bi ran wa bi ri ri ro kpan wulu wan vi tsawen. 36 Ama me he ri nji riwa ari tre ritu won riwa a han riwa Yohana a tre ritu won: Ikya riwa me ti riwa A ti won no wen me ti rinyi he kya riwa ari tre ritu won nga ran tsro ri A ti won ti wen ndu. 37 Ngha A ti riwa a ti wen ndu wawu nga wen a tre ritu won. Bi ran wo wan zari to ran ko ka bi to si wan to ran, 38 nga bi ran ngɨzhi tre wan ri sron ran ritu bi ran kpanyɨme ri nji riwa a ti-u ndu ran. 39 Bi kra mbe Izhi ritu bi yonga bi fe vɨri riwa a ran ri kre ran. Ngha imbe-a tre ritu won, 40 Kau ri ngamba bi kambi ri ye ri me bi ri fe vɨri.

41 <<Me ran ri wa gbɨre riwa nji ran. 42 Ama me to bibi nji riwa bi he nga me to ri bi ran nyɨme Izhi ri sron mbi ran. 43 Me ye ri gbengbren A ti won ama bi kambi ri kpa wen; nma ka injo ri nkan ye ri gbengbren riwa ma bi kpa nji-a, 44 Bi wa bi ri kpa gbɨre ri ngambi ama bi ran ri wa bi ri kpa gbɨre ri nji riwa wawu ri nkanshi wan he Izhi ko, bi ti ri se ko bi ri kpanyɨme ri me, 45 <<Ran yonga ri ame nye me ngɨzhi tre mbi hi la A ti won ran Musa riwa bi yosron mbi ri wu wawu nye ri ngɨzhi tre mbi hi. 46 Wari tre ri bi kpanyɨme ri Musa, bi ri kpany;ime ri me ngawen r itu a ngan kyawa ritu won. 47 Ama riwa bi ran kpanyɨme ri kya riwa a ngan ran ko bi ti se bi ri kpanyɨme ri kya riwa me tre?>>