1 Kugon rinyi Yeso a zren rimi gbu Galili a ran wa ran zren rimi gbu Yudiya ran ritu wa rinkon Yahuda wa wa wari wuu-u. 2 Ivi ri roro wa nji Yahuda a ye hwɨre, 3 Imba imri vayi Yeso waka tre ri wu ri,<<Ka bubu nyi don wuri hi ri Yudiya ritu no miri ndu wen no wa to kya riwa wu ti. 4 Inji wa ran ri rii kya riwa wa ti ran ka wa wa no ko ngaa no to wa. Riwa wu ti kyawa wanyi no mgbumgblume wawu no wa to-u!>> 5 Kau ri miri vayi wan ngawen wa ran kpanyɨme ri wu ran.

6 Yeso ka tre ri wa ri,<<Ivi won ran ye rina ama riyi ko vi ritan tsra ri yi. 7 Mgbumgblume wa ran kamba ri yi ran, ama wa kamba ri me ritu me bibi meme ti riwa ari ti. 8 Biyi hi ri bubu ro-a me ran ri hi ri bubu ro-a ran ritu ivi won ran tsra rina.>> 9 Yeso tre tre-a ran son ri Galili.

10 Kugon riwa imiri vayi Yeso wa hi ri bubu ro-a Yeso ka hi ri bubu wan ngawen ama a ran hi ri rira ran a hi ri yayɨbi. 11 Wa rinkon wa nji Yahuda-a wa ran wa Yeso ri bubu ro-a waka miyen ri,<<A he minyi?>>

12 Rimi jɨbu nji-a nji wari wa ran tre ri yayɨbi ritu Yeso wari wa ran tre ri,<<A he nji dindi nga wari wa tre iri oon ari gyuru nji nye.>> 13 Ama injo a ran tre ritu wan zhu ran ran ritu wa ran ti sisiri wa rinkon wa nji Yahuda.

14 Iro-a a gon ran kre Yeso ka gra ri ko Izhi ran gra tsro. 15 Wa rinkon wa Yauawa waka ti sisiri bran wari tre ri,<<A he rise ko nji nyi he ri bibi ti nyi riwa a ran kra-u ran?>>

16 Yeso ka nyɨme riwa ri,<<Itsro won ran he wa mo ran. A zhu ri nji riwa a ti wen ndu. 17 Ka injo ri yo sron wan ran ti kya riwa Izhi ri wa ari to ri itsro won zhu ri Izhi nye ka me tre ri wa mo. 18 Inji riwa ari tre riwa wiwiri wan ari ti ritu ran kpa gbɨre ri ngawan no nji riwa a ti-u ndu wawu he nji ri kpunji ikyari ri che ran he ri wu ran. 19 Musa a ran no yi doka Izhi ran? Ama injo a ran hu doka wan ran ritu ngye ko bi wa bi ri wuu wen?

20 Ijɨbu nji-a waka nyɨme wu ri,<<Wu he ri bɨzhi Ingaa ri wa ran wuu-u?>>

21 Yeso ka tre riwa ri,<<Me ti kya ri de sisiri riri nga wawu mbi bi ti sisiri. 22 Ama ritu ngamba Musa a no yi fon nju ri miri mbi, rinyi a ran zhu ri wawu Musa nye ye ran ama a zhu ri wa ti watimbi bi fon nju ri miri mbi ronron ri chachu son vri. 23 Zizan ka wa fon vren nju ri chachu son vri ritu no wa ran ka hu doka Musa ran, ritu ngye ko bi ti fu ri me ritu me den nji ri lilo chachu son vri? 24 Ka bla tre ritu kya riwa bi to ri si chuwo bi ri bla tre ri kpunji.>>

25 A kri ri bubu ri nji Urushelima waka miyen ri,<<Rinyi ran he nji riwa wa wa wari wuu-u-a ran? 26 Ingye ngaa-u-en ari tre ri rira nga wa ran ri tre kya ri wu ran, nji Yahuda wa nyɨme iri a he Kristo? 27 Ki to bubu riwa nji nyi zhu ye, ama ka Kristo ri ye injo ran to bubu riwa a zhu ye ran.<<

28 Riwa Yeso a he rimi tsro ri tra bubu bre Izhi, ka tre mgbamgban ri,<<Een bi to wen nga bi ri to bubu riwa me zhu, me ran he rinyi ri tuwon ran ama wawu riwa a ti wen ndu a he kpunji biyi bi ran to-u ran, 29 ama ame me to-u ritu me zhu ri wu nye nga wawu ti wen ndu.

30 Ri bubu wan wa wa wari vu Yeso ama injo a ran to bre wu wo ran ritu ivi wan a ran keran, 31 Ka hu ri ngamba wari rimi jɨbu nji a waka yosron ri wu wari tre ri,<<Ka Kristo ye ari ti kya wa de sisiri han nji nyi?>>

32 Farisa wa wo kya riwa ijɨbu nji-a wa ran tre ritu wan. Rinkon wa sro yii nga Farisa waka tru nji ri gben ri tra bubu ibreiri no hi ran vu Yeso. 33 Yeso ka tre ri,<<Me he ri yi ri vi tsa wen gyen nga me hi ri nji riwa a ti wen ndu. 34 Bi wa wen ama bi ran fe wen ran nga bubu riwa me he bi ran to ye ri bubu wan ran.

35 Wa rinkon nji Yahuda waka ran tre ri ngamba ri,<<Ri minyi nye nji nyi ri hi riwa ari tre ri ki ran fe wawu ran? Ari hi ri bubu riwa wa nji mbu wa shan ka ki rimi Helenawa nga wari ri tsro wa nji Helenawa? 36 Ari tre ritu ngye nye iri,<Bi wa wen ama bi ran fe wen ran>Ngha <Bubu riwa me he bi ran to hi ri bubu wan ran?>>

37 Chachu vi ri kremkpen riwa wa kre ro-a Yeso ka kri ran tre ri raan mgbamgban ri,<<Ka ila ima ri ti njo no ye ri me ran ye so. 38 Inji riwa a kpanyɨme ri me bibi riwa imbe Izhi tre <Ibaa riwa ima ri de vri-a ri gmo kagon wan.>>> 39 Ri ngamba ara tre ritu wu riwa wawa wa kpanyɨme ri wu wa ye kpa ivi ri ti ri vi-a wa ran no wa Yuu ran ritu wa ran gbre Yeso rina.

40 Riwa ijɨbu nji wa wo tre Yeso, waka tre ri,<<Kpunji tre nji nyi he nji ri la tre Izhi nye?>>

41 Wari waka tre ri,<<A he Kristo nye.>>Wari waka bru miyen nganga ri,<< Kristo ran zhu ri Galili. 42 Imbe Izhi a ran tre ri Kristo ri zhu ri gɨzhi wa chu Doda nga ri Batalami igbu riwa Doda ri son nye ye ran?>> 43 Imba isron jɨbu nji-a ka ga ti hari ritu Yeso 44 Wari wa wa wari vu-u ama injo aran to bre wu wo ran.

45 Ri kre wan nji wawa wana gben ri tra bubu ibrewaka bru hi ri wa rinkon wa sro yii nga Farisa wari miyen wa ri,<<Ritu ngye ko bi ran ngɨzhi-u gra rimi tra ran?>>

46 Wa gben wa tre ri,<<Injo ran tre bibi riwa nji nyi tre zari ran.>>

47 Farisa waka miyen wa ri.<<Bi wa bi ri tre ri a gyuru yi ngawen?>> 48 <<Bi to rimi wa rinkon ko Farisa riwa a kpanyɨme ri wu zari? 49 Ijɨbu nji wanyi wa ran to doka Musa ran ilaa nyu Izhi a he ri wa.>>

50 Iri rimi Farisa inde wan a he Nikodemus riwa a hi ri Yeso ri sen. A tre ri mgbron mba ri, 51 <<Bibi riwa doka mbu he, ki ran ri no nji Yaa ko kiri wo tre wan ko ingye nye a ti ran.>> 52 Waka nyɨme ri,<<A wu nga wen wu he nji Galili? Kra mbe Izhi wu to ri nji ri la tre Izhi ran zhu ri Galili to zari ran.>>

53 Imba ko ngaa ka hi ko wan