1 Wa ran yo nji ri ri Nikodimu, riwa a he rɨme gɨzhi Farisa, wawu a he rinkon rimi nji Yahuda. 2 Inji nyi a ye ri Yeso ri chu, ran tre ri wu ri,<<Inji ri tsro, ki to ri wu he nji ri tsro nye riwa Izhi tru-u ye. Kito injo ran to ti kyawa wa de sisiri nganyi ran tse nji riwa Izhi he riwu.>> 3 Yeso ka tre ri wu ri,<<Kpunji tre me la ri wu: injo ran ri to gra ri kpanchison Izhi ran tse wa bru ngiji-u.>>

4 Nikodimu ka miye-u ri,<<Wa tise ko wari ngɨzhi nji riwa a kunchon nganga?A ri bru gra rimi nne yi wan no wa bru ngiji-u ri mkpa ri hari?>>

5 Yeso ka tre riwu ri,<<Me la-u kpunji tre ri injo ran gra ri kpanchison Izhi ran tse wa ngɨzhi-u ri ima nga Yuu. 6 Ikya riwa nji ngiji-u a he nji, ama ikya riwa Izhi ngiji-u a he Yuu nye. 7 Ran ti sisiri ritu riwa me tre yi ri tse wa bru ngɨzhi yi wawu mbi ran. 8 Ngungu ri fu bubu riwa isron wan wa; wu ye wuka wo chu wan riwa ari chu, ama wura to bubu riwa a zhu ran, ko wu ri to bubu riwa ari hi ran. Nghamba nye a he ri ko ngaa riwa Iyu nye ngɨzhi.>>

9 Nikodimu ka miyen Yeso ri,<<Ari tise ko ran he ngamba?>>

10 Yeso ka nyɨme ri Nikodimu ri,<<A wu wu he rinkon nji ri tsro ri Israila, nga wu ran to kyawa wanyi ran? 11 Kpunji tre me la-u, ki tre kya riwa ki to ri si nye, kiri ri la yi kya riwa ki to, ka hu ri ngamba bi kambi ri kpa kya riwa ki la yi. 12 Me tre ri yi ritu bibi kyawa wawa wa ri mgbumgblume nyi, ama bi ran kpa nyɨme ran ko bi tise ko bi ri kpa nyɨme ka me la yi kyawa wawa wa ri shu? 13 Ngha njo ran hon hi shu dzari rina, ara ame vren nji ri kankshi won riwa me gɨzhi ri zhu ri shu mu ye.>>

14 Bibi riwa Musa a nzu kya riwa a zhu manzɨrama ban shu rimi ji, ngamba nye wa nzu vren nji, 15 ritu nji riwa a kpa nyɨme ri wu ari fe son riwa a ran ri kre ran. 16 Ritu Izhi nyɨme mgbumgblume bran a tanji ka vren wan wɨlo riri de, ritu ko ngan riwa a kpanyɨme ri wu no ran kuu ran, ama no fe vri riwa a ran ri kre ran. 17 Izhi a ran tru vren wan ye mgbumgblume ritu no ye bla tre ri wa ran, ama ritu no mgbumgblume no fe kpachuwo ritu wan. 18 <<Wawa wa kpanyɨme ri vren Izhi wa ran bla tre ri wu ran. Ama nji riwa a ran kpa nyɨme ri wu ran wa bla tre ri wu-e, ritu riwa a ran kpa nyɨme ri nde vren Izhi ngbɨreriri-a ran. 19 Ngye bibi riwa ibla tre-a he-en, ikpan gra ri mgbumgblume, ama nji wa kpanyɨme ri bu han kpan ritu ikya riwa wa ti iwawu wa he riwa bu nye. 20 Inji riwa ari ti kya riwa a ran tsra ran, ari kawan ri kpan tsu a ran ye ri tsu ri kpan ran ritu no meme ti wan no ran ngaran yo ri raa ran. 21 Ama nji riwa ari ti ndindi ti ari ye ri tsu kpan ritu no wa to ritu ikya riwa ari ti a he ri dzon Izhi nye.>>

22 Kugon rinyi, Yeso ri miri ndu wan wa hi ri meme Yudiya, a son ri wa ri bubu wan ri vi hari ran son nji tu ri ima. 23 Yohana a ran son nji tu ima ri Aino kusan Salimi ritu iima a he bran ri bubu wan. Inji wa ka sondu ran ye ri wu ka ran son wa tu ri ima. 24 Ikya nyi a ti ri ko wa yo Yohana rimi ko trenji. 25 Imba imiri ndu Yohana wari waka gra ri janyu ri nji Yahuda ri ritu tre ngla wa kpi nga tsiri. 26 Imba imiriko Yohana wa ye riwu wari tre ri,<<Inji ri tsro, nji riwa bi ran he imbi-u kugran nne ri Urdu ri wa a wu ri tu wen wu tre ritu wan? To ngye ngan ari son nji tu ri ima-on, kpunji ko ngan ri hi ri wu.>> 27 Yohana ka tre riwa ri,<<Injo ran ri fe kya ran tsede Izhi ka no. 28 Biyi kyumbi bi he to riwa me wa me ri tre ri,<A ran he ame nye me he Kristo ran ama wa ti wen ndu nye no wen me gbuchi ran ye riwu.> 29 Ri roo ri gran, ronron nye he ri waa sa-a ikpan ron waa riwa a he ri bubu gran ari son kpen ran wo kya riwa iron wasa ri tre. Ari ti kinklan sron inde iron waasa tre a wo ran wan, ri ngamba nye kinklan sron won ri tsra, 30 Wawu Yeso ri kri mgbemgben riwa ari sho ri mkpen nga ame me gɨzhi ri mkpen-won.

31 Yeso riwa a zhu ri shu a han ko ngan, riwa a zhu ri mgbumgblume, ritu ari tre tre wan riwa ri mgbumgblume nye.Ama wawu riwa a zhu ri shu a han ko ngaa. 32 Ritu wawu ri la kya riwa a wo ran to nye, ri ngamba injo ran he riwa a kpa tre wan ran. 33 Ama nji riwa a kpa tre wan, a tsro ri Izhi he ri kpunji tre. 34 Wawu riwa Izhi ti-u ndu ye, ari la tre Izhi nye ritu Izhi no Yuu wan riwa a ran he ri yitu ran. 35 A ti vren nyɨme-u ran ka ko ngye chuwo wu ri wo wan. 36 Inji riwa a kpanyɨme ri vren-a a he ri son riwa a ran kre ran; nji riwa a kawan ri vren-a a ran son ran tsede ifu Izhi ri he ri wu.>>