1 Ŋwɔʼnə-ɔ̄ŋ nɔ lɔ̀ hə kəghɔ-Bɔɔ ndə Nyii séʼ ɔ ndə ŋkʉʉnə-tʉʉ-i ndə məbɛ lɔntəŋ-Klai Jiso, leʼnə liŋ-yʉʼʉ Sɔtɛni.

2 Mɔ nɔ tʉʼ nyɔ̀ʼ tʉ chɔshi-Nyii ndə i bɛ Kɔlɛŋ, ndə bə nɔʼ chìi bɔŋ, bɔ̂ŋ bɛ tʉ́ʉnə tíŋ hə bɔ̌ŋ njunə-yʉəbə Klai Jiso, ndə bɔ̂ŋ tə́nə nə gyʉʉ imɔʼ ghɔŋbə bʉə bənchəŋ ndə yəŋbə inchəŋ ndə bə nɔʼ tíi bɔŋ ndə məbɛ ŋkʉʉ tʉ Nyii, leʼnə bʉə bənchəŋ ndə bɔ̂ŋ tʉʼ lə̀ʼtə Tiekətʉ-yʉʼʉ Jiso Klai ndə bɛ Tiekətʉ-yʉə bɔŋleʼ kə bɛ Tiekətʉ-yʉʼʉ.

3 Tə Nyii Tie-yʉʼʉ ghɔŋbə Jiso Klai Tiekətʉ, dʉ̀ʼ buuŋjyu ghɔŋbə fyiighʉ́ənə tʉ bii.

4 M̃ɔ nɔ kɔ́ ndɔ tʉ Nyii-ɔŋ təvɛʼtəvɛʼ te bii bʉʼka buuŋjyu-Nyii ndə ɔ dʉ̀ʼ tʉ bii tíŋ hə bɔ̌ŋ Klai Jiso. 5 Bʉʼka bii nɔʼ fúu ŋwɔŋ-yii bii bɔŋ, bə nɔʼ bìʼ bii ndə nubə inchəŋ nə ghʉəʼkə ndə məlɔ̀ʼ ŋgiekə-i ghɔŋbə ndaahə te nubə inchəŋ ndə i kie ndə məgɛ̀ ghɔŋbə Lyʉʉhəkə-i. 6 Yɔ̄ŋ-yə nɔ dʉ̀ʼ mbɔ bəsɔʼka ndə baʼa kə shyíi bii te Klai nɔʼ ŋíi mu fyii-bii jyujyu. 7 I chìi təmə bii mə byúu kɔ-Nyiibɛʼ-kə hə mu bii fɛ, ndə bii tʉʼ chyìi ndʉʉ ndə bə bu kɛ̀ʼ Jiso Klai Tiekətʉ-yʉʼʉ chɔ. 8 Ɔ bu tʉ́ʼ bii shʉ́əshʉ́ə tə gɛ̀ lìʼ, mbɔ bii mə yi kie kwɔtəkə ndə Chî-Jiso-Klai-Tiekətʉ-yʉʼʉ-kə fɛ. 9 Nyii nɔ bɛ Nyii gìe shʉəŋ, Nyii ndə ɔ tíi bii ndə məkie njunə biibə Jiso Klai Vaa-ɛ, ndə ɔ bɛ Tiekətʉ-yʉʼʉ.

10 Mɔ nɔ tʉʼ fʉ̀ʉtə bii, bəliŋ-bɔŋ, nə yie-Jiso Klai Tiekətʉ-yʉʼʉ, mbɔ b̈ii bənchəŋ dùʼ nə ŋgiekə imɔʼ. Kə ŋkʉʉŋkʉʉ mə bɛ mu bii fɛ. B̈ii kɛŋ fúu ŋwɔŋ-yii nə ŋkwɔʼtə imɔʼ ghɔŋbə luu imɔʼ gɛ̀ kùu. 11 Bʉʼka bʉəbɛʼbə fu-Kɔlɔ nɔʼ shyíi mɔ mbɔ chyuutə la bɛ mu bii, bəliŋ-bɔŋ. 12 Nukə ndə mɔ tʉʼ ghɔ̀ŋ nɔ bɛ mbɔ wo mu bii nɔ tʉʼ ghɔ̀ŋ mbɔ, "Mɔ nɔ tʉʼ gɛ̀ yɔŋ-yə bɔ̌ŋ Bɔɔ," ibɛʼ-yə ghɔ̀ŋ mbɔ, "Mɔ nɔ tʉʼ gɛ̀ yɔŋ-yə bɔ̌ŋ Abolo," ibɛʼ-yə ghɔ̀ŋ mbɔ, "Mɔ nɔ tʉʼ gɛ̀ yɔŋ-yə bɔ̌ŋ Bita," ibɛʼ-yə ghɔ̀ŋ mbɔ, "Mɔ nɔ tʉʼ gɛ̀ yɔŋ-yə bɔ̌ŋ Klai."

13 Bə nɔ̂ʼ gyʉ̀əhə Klai mɛ? Bə kə kwɛ̀ŋ Bɔɔ yi, bʉʼka bii mɛ? Byuunɔ, bə kə kɔ́ muu tʉ bii yie-e Bɔɔ mɛ? 14 Mɔ nɔ kɔ́ ndɔ tʉ Nyii mbɔ mɔ kə kɔ́ muu tʉ wo hə mu bii fɛ, yaʼkɛŋ Kilisɛbu ghɔŋ Gayo. 15 Bʉʼka wo mu bii mə yi ghɔ̀ŋ mbɔ bə nɔ kə kɔ́ muu tʉ bii ndə məgwè hə bɔ̌ŋ mɔ. 16 Mɔ nɔ kwɛ́nə ghɔ mbɔ mɔ nɔ kə kɔ́ muu tʉ Sitifana ghɔŋbə nchinjaa-ɛ. Mɔ bɔŋleʼ laa ibɛʼ-yə wo ndə mɔ kə kɔ́ muu tʉ ɔŋ fɛ. 17 Bʉʼka Klai kə tə́ŋ mɔ mbɔ m̈ɔ gwè kə́ kɔ́ muu fɛ, bɔŋ mbɔ m̈ɔ kə́ lɔ̀ʼ ntəŋjyujyu, kaa bə nə ŋgie-mukətʉ-súunə-bʉəməsʉʉ-bə fɛ, byuunɔ təmə tyʉntɔɔnə-Klai-kə bu bɛ́ ghʉəʼkə-i.

18 Bʉʼka bəsɔʼka te kwu-Klai ndəŋ tyʉntɔɔnəkə nɔ bɛ kwə́ʼ-bənɔ̌ʼɔ tʉ bʉə ndə bɔ̂ŋ bɛ ndə məkwú bɛ́, bɔŋ tʉ bʉʼʉ ndə bʉʼʉ nɔʼ kie ŋkwaaNyii, nɔ bɛ ghʉəʼ-Nyii-kə. 19 Bə nɔ nyɔ̀ʼ mu ŋwɔʼnə-Nyii mbɔ,

"Mɔ bu chìi mukətʉ-súunə-bʉəməsʉʉ fyú njʉnjʉ ndə bɔ̂ŋ kie ndaa,

mɔ bu byùutə ndaa-bʉə-ndaa-hə."*

20 Wo ba ndə ɔ kie mukətʉ-súunə? Wo dàhə nuʼ-Mushi ba? Wo ba ndə ɔ kínə mətúŋ bəŋʉʉ ndə mbi-ɔ̄ laa? Nyii chʉʼ chìi ndaa-kəwʉʉnəmbi-ɔ̄ bɛ bənɔ̌ʼɔ fe? 21 Bʉʼka Nyii nɔʼ chìi nə mukətʉ súunə-i mbɔ woməsʉʉ mə kínə ɔŋ nə yi-yə mukətʉ-súunə fɛ, tʉʉ-Nyii bɔŋ bʉ̀ʉ ndə məlʉ̀ ŋgie-bənɔ̌ʼɔ-kə ndə bʉʼʉ tʉʼ lɔ̀ʼ ndə məkwáa bʉə ndə bɔ̂ŋ bɛ́ŋ. 22 Bʉʼka bʉə-Juu nɔ tʉʼ bíʼtə nubəcheʼbə ndə məbɛ́ŋ shʉəŋ, bʉə ndə bɔ̂ŋ gòʼ təmə bɛ bʉə-Juu fɛ kə́ kʉ́ʉ mukətʉ-súunə. 23 Baʼa bɔŋ kə́ lɔ̀ʼ ntəŋ te Klai ndə bə kə kwɛ̀ŋ ɔŋ, ndə i bɛ yəŋkə tʉ bʉə-Juu ndə məwɔ̀tə chɔ gwù, kə bɛ bənɔ̌ʼɔ tʉ bʉə ndə bɔ̂ŋ gòʼ təmə bɛ bʉə-Juu fɛ.

24 Bɔŋ tʉ bʉə ndə Nyii nɔʼ tíi bɔŋ, kə bɛ bʉə-Juu, kə bɛ bʉə ndə bɔ̂ŋ gòʼ təmə bɛ bʉə-Juu fɛ, Klai nɔ bɛ ghʉəʼ-Nyii-kə ghɔŋbə mukətʉ-súunə-Nyii. 25 Bʉʼka bənɔ̌ʼɔ-Nyii, nɔ chàa mukətʉ-súunə-woməsʉʉ, məlʉʉtə-Nyii, shʉ́ə chàa ghʉəʼ-woməsʉʉ-kə.

26 B̈ii kwɛ́nə ntɛ-bʉə ndə bii kə bɛ yɔŋ Nyii buŋ tíi bii, bəliŋ-bɔŋ, mbɔ bii buŋmbi kə kie mukətʉ-súunə fɛ, kaʼ bə lʉ̀ fʉʼ hə ndəŋ mukətʉ-súunə kəwʉʉnəmbi-fɛ̄ŋ, buŋmbi kə kie ghʉəʼkə fɛ, bii buŋmbi kə lɔ̀ hə ndə lɔŋkwɛʼtəŋkə fɛ. 27 Nyii bɔŋ séʼ fɔ-bənɔ̌ʼɔ-bə hə mu kəwʉʉnəmbi ndə məmɔ̀ʼ tʉvyii-bʉə-kə ndə bɔ̂ŋ kie mukətʉ-súunə, leʼ séʼ fɔ-lʉ́ʉtə-bə mu kəwʉʉnəmbi ndə məmɔ̀ʼ tʉvyii-bʉə-kə ndə bɔ̂ŋ shʉ́ə. 28 Nyii nɔ séʼ bʉə ndə wʉʉnəmbikə lʉ̀ bɔŋ ndə fɔ-njəŋtə-bə, kə́ jɛ́ŋhə bɔŋ buŋ bʉə ndə bɔ̂ŋ bɛ fɔ-njʉnjʉ-bə ndə məchìi bʉə ndə bɔ̂ŋ bɛ fɔkə, bɔ̂ŋ bɛ njʉnjʉ. 29 Nɔ, woməsʉʉ kaa ghɔ ndə bəkɔ ɔ kwɛ̀ŋ fyii-i bəshʉ-Nyii fɛ. 30 Nɔ bɛ mbɔ Nyii nɔʼ chìi bii kie njunə biibə Klai Jiso, chìi ɔ bɛ mukətʉ-súunə-yʉʼʉ. Nɔ bɛ bʉʼka Klai ndə bʉʼʉ bɛ ndyʉndyʉ bɔŋleʼ bɛ ŋkʉʉ tʉ Nyii, Klai bɔŋ-kə́-leʼ bɛ chʉʼ-kətʉ-bə-ʉʼʉ hə ndəŋ bʉ̂ʼʉ. 31 Ndʉʉghɔfii, i bɛ haʼ ndə ŋwɔʼnə-Nyii ghɔ̀ŋ mbɔ, "Wo ndə ɔ kʉ̀ʉ ndə məŋàʼtə, ɔ̈ ŋàʼtə bə haʼ ndə nubə ndə Tiekətʉ nɔʼ fɔ̀ʼ."