1 Bə nɔ nə bí Jiso Bɛtələhɛŋ ndə i bɛ mu Judia ndʉʉ ndə Hɛlo kə́ sɔ́ʼ fɔŋ. Ndʉʉ-ghɔ̄, bʉəbɛʼbə ndə b̃ɔ̂ŋ yétə bəlɔʼɔ, gwè hə kwii ndə chichi sɔ́ʼ chɔ, gwè dàa Jɛlosalɛŋ, 2 kə́ bíʼtə mbɔ, "Mbʉ vaa ba ndə bə kə kie ndə məbí ɔ ndə fɔŋ bʉə-Juu le? Bʉʼka baʼa nɔ nə nyíɛ lɔʼ-ɛ ndʉʉ ndə i kə fyú yuo, baʼa kə́ gwè ndə mələ̀ʼtə ɔŋ." 3 Ndʉʉ ndə Hɛlo mbʉ fɔŋ kə yʉ́ yɔ̄ŋ-yə, i chɔ́ŋhə ɔŋ, ghɔŋbə bʉə-Jɛlosalɛŋ bənchəŋ. 4 Ɔ kʉ̂ʉ tíi bətiefɛ̀ʼndɛŋNyii bənchəŋ, ghɔŋbə bʉə dàhə nuʼ-Mushi, bíʼtə yəŋkə tʉ bɔŋ ndə bə kə kie ndə məbí mbʉ Wo ndə Nyii Kùŋ Tə́ŋ chɔ. 5 Bɔ̂ŋ ghɔ̀ŋ tʉ ɔŋ mbɔ, "Mu Bɛtələhɛŋ ndə i bɛ mu Judia, bʉʼka nɔ bɛ nɔ ndə yʉkəŋgieNyii* nə nyɔ̀ʼ mbɔ:

6 ‘Bɔŋ mbəŋ-aŋ, Oo Bɛtələhɛŋ mu lɔʼɔ Judia,

a kaa ndyiʼtə-kəyəŋ-kə mu yəŋkwɛʼtəŋbə ndə i bɛ mu Judia fɛ,

bʉʼka ntəŋbəshʉ nɔ bu fyú hə mu aŋ ndə ɔ bu kə́ chìhə bʉə-bɔŋ, bʉə-Isilɛ.’ "*

7 Ndʉʉmɛ, Hɛlo tíi mbʉ bʉə yétə bəlɔʼɔ mu bəliinə tyúutə bɔŋ nə ndʉʉ ndə mbʉ lɔʼ kə fyú chɔ yuo. 8 Ɔ tə́ŋ bɔŋ Bɛtələhɛŋ ghɔ̀ŋ mbɔ, "B̈ii gɛ̀ bíehə tòʼ bíʼtə mbʉ vaa, ndʉʉ ndə b̈ii nyíɛ ɔŋ nɔ, b̈ii gwè shyíi mɔ, mbəŋ-ɔŋ chʉʼ leʼ gwè ghɔ lə̀ʼtə ɔŋ."

9 Ndʉʉ ndə bɔ̂ŋ kə yʉ́ nukə ndə mbʉ fɔŋ bʉ́, bɔ̂ŋ fyú fia ndə məgɛ̀. Kə nyíɛ, mbʉ lɔʼ ndə bɔ̂ŋ nɔʼ kə nyíɛ kwii ndə chichi sɔ́ʼ chɔ le, lɔ̀ kə́ gɛ̀ hə bəshʉ bɔŋ, tə gɛ̀ tə́nə kətʉ kəyəŋ ndə mbʉ vaa kə bɛ chɔ. 10 Ndʉʉ ndə bɔ̂ŋ nyíɛ mbʉ lɔʼ, tʉʉ-yʉə bʉ̀ʉ daa tə gɛ̀ kùu. 11 Bɔ̂ŋ kʉ̂ʉ kə́ sʉ́ʉ mu njaa, nyíɛ mbʉ vaa ghɔŋ Mɛli ŋkwê-i, bʉ́ʉnə sê lə̀ʼtə ɔŋ. Ndʉʉmɛ, bɔ̂ŋ chóʼ tɔŋbə-ʉə, fyúhə kɔ-bəfɔŋ-kə chɔ kɔ́ tʉ ɔŋ nə goo, ŋgwo-lùŋ-mə ndə bə kə́ tíi nə flaŋkisɛŋ* leʼnə məə.Bʉə yétə bəlɔʼɔ

12 Nyii kʉ̂ʉ shyùu tyunəkə-ʉə mu njəŋ mbɔ bɔ̂ŋ mə leʼ bʉ̀nə gɛ̀ tʉ Hɛlo fɛ, bɔ̂ŋ bʉ̀nə gɛ̀ lɔʼɔbə-ɔŋ tíŋ hə ndəŋ fia kədɔŋ.

13 Ndʉʉ ndə bɔ̂ŋ nɔʼ kə bʉ̀nə, kə kwɔnə nyíɛ, wontəŋTiekətʉ fyú tʉ Jɔsɛ mu njəŋ ghɔ̀ŋ tʉ ɔŋ mbɔ, "Lɔ̀ hə sê, lʉ̀ mbʉ vaa ghɔŋ ŋkwê-i, nyʉ́ʉ gɛ̀ Iji, gɛ̀ káa chɔ, tə mɔ yi shyíi a mbɔ a lɔ̀ hə chɔ, bʉʼka Hɛlo nɔ bɛ sêfia ndə məkʉ́ʉ mbʉ vaa yí ɔ."

14 Ɔ lɔ̀ hə sê, lʉ̀ mbʉ vaa ghɔŋ ŋkwê-i ndʉʉbətyuʼ nyʉ́ʉ gɛ̀ Iji 15 gɛ̀ káa chɔ, tə Hɛlo nə kwú. Yɔ̄ŋ-yə nɔ nə bɛ ndə məchìi nukə ndə Tiekətʉ nə ghɔ̀ŋ tíŋ hə bɔ̌ŋ mbʉ yʉkəŋgieNyii fyú shʉəŋ ndə i kə ghɔ̀ŋ mbɔ, "Mɔ nɔ tíi Vaa-ɔŋ Vaabələŋ ndə məfyú mu Iji."

16 Ndʉʉ ndə Hɛlo kə nyíɛ mbɔ mbʉ bʉə yétə bəlɔʼɔ nɔʼ yə̀ŋ bɔ̌ŋ ɛŋ, ɔ kie fyii chʉ́ʼnə, tə́ŋ bə yítə vâabələŋ bənchəŋ mu Bɛtələhɛŋ ghɔŋbə yəŋbə inchəŋ ndə i bɛ mbʉə ghɔ, vâa lʉ̀ hə ndə ŋgʉʼhə ibûu bʉ̀nə nə bɔ̌ŋ lʉ̀ hə ndə ndʉʉ ndə ɔ kə tyúutə mbʉ bʉə yétə bəlɔʼɔ chɔ. 17 Ndʉʉmɛ, i chìi nukə ndə Jelimia yʉkəŋgieNyii kə gìe i fyú shʉəŋ, ndə ɔ kə ghɔ̀ŋ mbɔ:

18 "Bə nɔ kə yʉ́ gyʉʉ mu Lama,

i kə́ gwía bɔŋleʼ tíi nə ghʉəʼkə,

Lashɛ kə́ gwía vâa-bi.

Ɔ tɛ́ŋ mbɔ b̈ə mə fʉ̀ʉtə ɔŋ fɛ,

bʉʼka bɔ̂ŋ nɔʼ kwútə."*

19 Bɔŋ ndʉʉ ndə Hɛlo kə kwú, kə́ nyíɛ, wontəŋTiekətʉ fyú tʉ Jɔsɛ mu njəŋ Iji, 20 kə́ ghɔ̀ŋ mbɔ, "Lɔ̀ hə sê, lʉ̀ mbʉ vaa ghɔŋ ŋkwê-i bʉ̀nə gɛ̀ lɔʼɔ Isilɛ, bʉʼka bʉə ndə bɔ̂ŋ kə́ kʉ́ʉ tʉ-mbʉ-vaa-kə nɔʼ kwútə."

21 Jɔsɛ lɔ̀ hə sê lʉ̀ mbʉ vaa ghɔŋ ŋkwê-i, gɛ̀ lɔʼɔ Isilɛ. 22 Bɔŋ ndʉʉ ndə ɔ kə yʉ́ mbɔ Achɛlu nɔʼ yú kʉə-Hɛlo-tie-e-kə kə́ sɔ́ʼ Judia, ɔ kə́ fàa ndə məgɛ̀ chɔ, bə kʉ̂ʉ shyùu tyunəkə-i mu njəŋ, ɔ lɔ̀ gɛ̀ mu bie-Galili. 23 Ɔ gɛ̀ kə́ chí mu yəŋkwɛʼtəŋbɛʼkə, bə kə́ tíi nə Nasalɛ, mbɔ nukə ndə bʉəyʉkəŋgieNyii nə ghɔ̀ŋ yi chʉʼ fyú shʉəŋ ndə i kə ghɔ̀ŋ mbɔ, "Bə nɔ bu nə tíi ɔ nə wo Nasalɛ."