1 Ama anɔng, in fok iwɔng ikikak ti iwɔng kudyɛng banet azanɛn, ba nye,

<<Halleluya!

Isheshek, ni ízɔk,

nɛ agap yet afɛ́

Adakunom yit,

2 nek ishɔt wu se tabat,

nɛ atsak.

<<A mi mees kugbat

kunyak-agwɔm e.

Ayɔng fɛ́ a beseng kazatse

ni kujang wu.

A mi tarang

nasok basam wu.>>

3 Ba tɛ ba tarak ntɔ ye,

<<Halleluya!

Atseng fɛ́ a ne ni iwɔp e,

ngarak sak naton

ayɛ na ayɛ.>>

4 Bashɔn nsɔk nfaa na anaas, ni nkyɔrɔk ntset nnaas e, kpa aben, ba ya Adakunom ntong, iwu fɛ́ a sonong ni ita igwɔm me. Ba nye,

<<Anɔng, Halleluya!>>

5 Wat kutɔ ne nita igwɔm e ye,

<<Tere yin Adakunom yit,

ngma yin basam wu,

iyin bayɔng fi

ifoos yin nnyim wu,

baratek nɛ babane!>>

6 Wat in fok kutɔ ti iwɔng kudyɛng banet, ti iwɔng ashi fɛ́ a tsin tisik, ti itasak íza, ni ntɔ,

<<Halleluya!

Nek aTisa Adakunom yit

fɛ́ a wat kaakyɛ,

tsin ya igwɔm.

7 Won ni in feng yit,

ni iyɛ ikan in ku

nɔk yit iratek!

Nek kuweneng

Kitsamang e, mi bɛ́,

agwol e mi kana nye

gyat mok iwu.

8 Ba mi ku nɔk alinɛn atek,

fɛ́ a gyɛs cɛ́l,

na a te ni irɔm.>>

(Alinɛn atek e nyeseng naton nggɔn ntabat nfɛ́ banet Adakunom.)

9 Atomaza me fɛ́ ni imi, <<Jɛk: <Awɛng se na bayɔng fɛ́ ba ka ba rini sak ni kuweneng iyak Kitsamang e!> >> Atomaza e, bang fɛ́, <<Ifɛ̀ deng yet ifɛ̀ Adakunom ifɛ́ atsak.>>

10 Ni ifok anɔng, in kpa natak wu, in da ku ya ntong. Awɛt iwu fɛ́ ni imi, <<I bi nye anɔng awo! Imi yet afi ifiri ni ngɔn ayɛt isam, nɛ barunyining fɛ́ ba bereng ifɛ̀ aYeso. Ya Adakunom ntong! Nek kucɛɛt fɛ̀ banet taas gbɛngɛrɛng naton aYeso nes na abik Adakunom.>>

11 In di kazanɛn piyot, azɔng ashon hom, in di itsaap ikan, ayɔng fɛ́ a se naton e, ba ku yes aFi iTak ni iShining, Anet aTsak. Na atsak, a ras ishɔt, ni iras itsom. 12 Ica ayisi wu se ti ilem irong, ice wu bɛ́ ábong igwɔm dot. A bi iyerek fɛ́ ba jɛk natoon wu fɛ́ vit ayɔng fɛ́ a rēn ide, tit iwu aziwu. 13 A te kukpin fɛ́ ba te iko ayɛt nasok, iyerek wu yet Ifɛ̀ Adakunom. 14 Batsom azanɛn ku kuus mo ama, ba ngarak ítsaap ikan, ba tes ares alinɛn atek, akan cɛ́l. 15 Ítsot fi iya votot, wuru nanu wu, iyɔng fɛ́ ba di ki kperek mben azatse. <<A bi ya igwɔm natoon ba, ni ishɛn kutsɔm.>> A bi shesh ica anap naman Ada, Adakunom. 16 Ba jɛk iyerek wu ni nkpiin, ni ishitak wu,

AGWƆM BÁGWƆM, NE ATISA BÁTISA.

17 Ama anɔng, in di atomaza, ni nyeseng ayɛt kunom. A ta kutɔ na agap a di yes nanon aton aza ye, <<Bi kana tusung yin, nek amok aratek afɛ́ Adakunom, 18 nɔng i da ya yin inam bágwɔm, nɛ agbat batsom, ne agbat banet, ni ifi ítsaap, nɛ bafi ingarak e, ni inam banet ngma, bawashak e, nɛ basam, nɛ babaan e nɛ baratek e.>>

19 Wat in di kukyɛng ashi, nɛ bágwɔm azatse, nɛ batsom bà, kana tusung nek ira itsom na ayɔng fɛ́ a se naton itsaap ikan e nɛ batsom wu. 20 Awɛt ba tekap kukyɛng ashi me, gung nɛ atan mbɔɔs wu fɛ́ a ras ntomong ajingjing akuce kukyɛng ashi me. Ni ntomong wu me fɛ́ a di sɔ ice bayɔng fɛ́ ba shan izizɔ ko, ba di ya kubannom ntong. Ba barak kukyɛng ashi me ni atan mbɔɔs e, ni kutset ayɛt kubong árong fɛ́ a turung abing-irong-iruk. 21 Ba fɛɛs ishɛrɛp ba ni itsot fi ines nanu ayɔng fɛ́ a se naton itsaap e, ngma nanon e tse na ya ikyɛng fɛ́ na da kyem na ya kyɛk.