1 <<Sak na atomaza afɛ́ itusung bafi ikuus aYeso fɛ́ ba se na aSardis:

Ifɛ̀ deng yet ifɛ́ aYɔng fɛ́ a bereng nabik kanakataat na fɛ́ Adakunom, na ádat kanakataat bà. Imi rēn ntomong yin; banet fɛ́ ngɔn yet atset, ashit awish i yet kukom e. 2 Shemeng! Di barang agap ikyɛng fi i kyɛk fɛ́ ngmash ni iku, nek in mi sɛ ntomong ngɔn mi shining ashon Adakunom hom awo. 3 Nek anɔng, yiring ni ifɛ́ fi i kin sɛ ni idɔng fi i kin fok; di kuus ide, tirik won anɛn ngɔn. Awɛt ki i rangɔn dang shemeng, in da bɛ́ tɛ akpatang, ngɔn da rēn izen fi in di ki bɛ́ awo.

4 Ngma ne anɔng, ishɛrɛp banet di se gyet na aSardis fɛ́ da ba mi gbiridik ares bá awo. Ba bi tsees ni imi, ba bi tes nkpiin nkan, nek in ka ba di ba kyem. 5 Ngma ayɔng fɛ́ a ya imara me, ba bi ku te kukpin kukan ti iba ba. Imi bi fuut iyerek wu ni kufumung ayerek bafi kutset awo, tit in bi tak iyerek wu ayet anaan ashon Ada hom nɛ batomaza wu. 6 Ngma ayɔng fɛ́ a bɛ́ kuto, won na a fok ifɛ́ fɛ́ Kabik Adakunom tsin taas bafi ikuus aYeso ne.

7 <<Sak na atomaza bafi ikuus aYeso fɛ́ ba se na aFiladelfiya:

Ifɛ̀ deng yet ifɛ́ aYɔng fɛ́ a yet ajɛrɛ nɛ atsak, iwu fɛ́ a bereng amakuli aDauda. Ikyɛng fɛ́ a tarak, vit anet fɛ́ a kyem ifam me, ikyɛng fɛ́ a fam, vit anet itarak e. 8 In rēn ntomong ngɔn. Di, in mi da won katitu piyot fɛ́ vit anet ifam e. In rēn fok agap ngɔn se gyeet, ngma na anɔng, ibereng ifɛ̀ hom, ira nanan iyerek hom awo. 9 In da sak bayɔng fɛ́ ba yet bafi karɔ iya aShetan ntong, fɛ́ ba nye fok iba yet baYahuda awɛt i se anɔng awo, tit bafi mbɔɔs. Imi da ka ba sak na men pak ashon ngɔn, na ba fɛ̀ ey imi da shim. 10 Nek ngɔn bereng ifɛ̀ ayɛt akabɔk, imi bi da bereng ni izen imara fi i bi kpa kazatse ngma kusum, nek imara bayɔng fɛ́ ba se azatse.

11 Imi yɔng ngmash ni in bɛ́. Bereng ikyɛng fi imi sɛ, kɔn akak bi shan abong igwɔm ngɔn. 12 Ngma ayɔng fɛ́ a ya imara me, in bi ku sak na sot itsik karɔ iya Adakunom hom ntong. Da a da tɛ won ika awo. In bi jɛk iyerek Adakunom hom natoon wu, ni iyerek kuwɔp Adakunom hom, aRushelima afas, fɛ́ bi ne azanɛn narɔ Adakunom hom, imi bi jɛk iyerek hom ifas natoon wu. 13 Ngma ayɔng fɛ́ a bɛ́ kuto, won na a fok ifɛ́ fɛ́ Kabik Adakunom tsin taas bafi ikuus aYeso.

14 <<Jɛk sak na atomaza bafi ikuus aYeso fɛ́ ba se na aLaudikiya:

Ifɛ̀ deng yet ifɛ́ aYɔng fɛ́ ba ku yes Anɔng, ayɔng fɛ́ a tak na shining, afi icɛɛt atsak, afi iya igwɔm azaton nkyɔrɔk fɛ́ Adakunom nye. 15 In rēn ntomong ngɔn, da i se cɛre ke mɔɔ awo. Kaa! Ki i fi se cɛre ke mɔɔ ayi. 16 Nek ngɔn se tungut anɔng, da i se cɛre ke mɔɔ awo, ngmash ni da cik nanu hom. 17 Ngɔn nye fok, <Imi yet arum; in mi tusung kurúm, in tin tsɛt ikikak awo.> Awɛt ngɔn rēn fok ngɔn sɛ kpɛt-kpɛt, ikyɛng angmishish, akan, akpatɔn, i se kpiip. 18 In tsin da nɔɔk itabak, shan kutsɔm kuseng ni mi fɛ́ ba mi ruk iko ni rong, nɔng i da bin sot arum; na ares akan fi i da tes, nɔng i di ki fam nsum kusot kpiip ngɔn, shan ikan ayisi, nɔng i di ki yɛrɛ yɛɛt.

19 Banet fi i mi shim, iba ba in kaba kɔrɔng ni in kaba tabak. Nek anɔng, tonong atsak, tirik, won anɛn ngɔn. 20 Imi yong ni inyeseng atitu, in tsin tsot ika. Ngma ayɔng fɛ́ a fok kutɔ hom, a tarak ika, in da nɔ ayɛt e, in da yas ni iwu ni iwu yas ni imi.

21 Sak na ayɔng fɛ́ a ya imara me, in da ku nɔk irèn isonong ni kuta igwɔm hom ni imi, kyɔn ti imi kin di ya awɛng in sonong gung na Ada hom ni ita igwɔm wu. 22 Ngma ayɔng fɛ́ a bɛ́ kuto, won na fok ifɛ̀ fɛ́ Kabik Adakunom tsin taas bafi ikuus aYeso>>.