1 Ama fɛ́ aYeso mi gang kucɛɛt nɛ bafi imɛɛs wu kusɔk abe afaa me, a won azɔng, a ya kashon ni itees, ni ishara ifɛ̀ ni nwɔp bà.

2 Ni izen fɛ́ aYohana anet abatisma fɛ́ a se ari inyang, fok ikyɛng fɛ́ Anet-Isheshek se ni ira me, a tom bafi imɛɛs wu sak azɔng, 3 na ba ku rip yɛ, <<Ngɔn wu i yet ayɔng fɛ́ ba kin fɛ̀ fok, a bi bɛ́ me yɛ, kɛ ni in tot yit akak ɛ?>>

4 AYeso ka ba bun ni ifɛ̀ yɛ, <<Ti bun yin, i da tak yin aYohana, ikyɛng fi i mi di yin, ni idɔng fi i fok yin: 5 Bakpatɔn tsin sɛɛs ayisi, bakun tsin tsees, ba tsin tes bakparong cɛ́l, bakpey tsin foos kucɛɛt, bayɔng fɛ́ ba mi kus tsin doro, ba tsin shara ifɛ̀ itek sak na bakan. 6 Awɛng se gung na ayɔng fɛ́ da a te gbɛrɛk ni ikuus awo.>>

7 Ni izen fɛ́ bafi imɛɛs aYohana tsin bun, aYeso kpa kucɛɛt naton aYohana sak ni kudyɛng banet fɛ́ ba se azɔng yɛ: Akyɛ de fi i tse yin idi me na tse yɛ? I tsi di yin ki shishot agam fi kuwun fɛsɛm aze sak aza yɛ? 8 Akyɛ de fi i tse yin idi me ka yɛ? Ke anet fɛ́ a kana zem na ares fɛ́ a gyɛs ɛ? Awɛy, bayɔng fɛ́ ba kana zem na ares anɔng, ba ka ba sɛs ne nasa bágwɔm! 9 Won in ki rip yin, akyɛ de fi i tse idi yin ne yɛ? I di atan ɛ? Ey anɔng, won in ki tak yin, i tsi di yin ayɔng fɛ́ a wat atan. 10 Naton aYohana wu fɛ́ ba kin di jɛk yɛ,

<<Di atom hom e yong,

in tsin ku tom ashon ngɔn,

na a nye irèn nek ngɔn.>>

11 Won in ki tak yin, vit anet fɛ́ ba mang tes azatse kang, fɛ́ a wat aYohana anet abatisma ni iratek. Ngma nɛ anɔng, ayɔng fɛ́ a dung yet awosong ayɛt igwɔm azanɛn, ku wat ni iratek. 12 Neme nkum izen itomong aYohana anet abatisma sak atut, ba tsɛsɛk igwɔm azanɛn ni ifa, bafi ifa me se ni kuren ni ide. 13 Nek ngma ijɛk batan, nɛ afumung ntsi aMusa a kin cɛɛt naton igwɔm e, dang ku bɛ́ aYohana. 14 Ki iyin shim ishan yin ifɛ̀ hom e, aYohana me wu a yet aIliya fɛ́ ba kin di cɛɛt naton wu fok, a bi bɛ́. 15 Ngma anet fɛ́ a bɛ̀ kuto, won na a fok!

16 Na akyɛ fi in di ki mara banet nnu nang ɛ? Ba se kpaf ti nnon fɛ́ na kana tusung narɔ ijik, nɛ na yes bafidang yɛ,

17 <<In ki ra yin ihwyɛrɛ,

i rayin dang to yin.

In ki ra yin abom iyɔm,

i rayin dang tos yin.>>

18 Nek aYohana kin bɛ̀, a rawu dang yas nayak, na rawu dang sɔs ashi anap, wɛt ba fɛ̀ yɛ, <<A bi itsɛ́ng!>> 19 Fɛ Arim Anet bɛ́, in yas, ni in sɔs, wɛt banet tɛ ba fɛ̀ yɛ, <<Di yin kudayak kang wɔn kuyak kyɛk, ni ifeng, afidang bafi ishashang itsɔm mben nɛ bafi inɛn.>> Ngma nɛ anɔng, ba yɛrɛ kutsitsɛng Adakunom ayɛt ntomong bafuu.

20 Ama anɔng, aYeso kpa di tisik naton nwɔp yɔng fi iwu kin di ras kudot ntomong abes wu, nek banet kin raba dang wosong anɛn bá. 21 <<Ye kukuu! Kawɛy se naton ngɔn aKorazin! Kawɛy se naton ngɔn aBatseyida! Ke ba kin fɛ́ ba ra ntomong abes yɔng fi in kin ras ayɛt yin, ni nwop aTiya nɛ aSidon, ke ba ki mang tes agyɛɛt ares, nɛ ba korok ntong nkan na ace bá, ke ba man wosong anɛn bá neme. 22 Won in ki tak yin, atuk fɛ́ Adakunom bi bɛ́ ira ishɔt, a bi wat ifok angmishish banet aTiya nɛ aSidon aza yin. 23 Wat ngɔn, aKafarnahum, ngɔn di tɛ ba bi da sok terere sak azanɛn ɛ? Awɛy! Ba bi da barak tsik ari-irong! Ke ba kin fɛ́ ba ras ntomong abes fɛ́ ba ras ayɛt ngɔn, ni wɔp aSodom, ke kuwop e ren di se mo sak atut. 24 Won in da tak, atuk fɛ́ Adakunom bi bɛ́ ira ishɔt, a bi wat ifok angmishish banet aSodom aza ngɔn.>>

25 Ni izen e yɔng, aYeso fɛ̀ yɛ, <<Ada, ngɔn fi i yet aTisa azanɛn nɛ kazatse! Imi da feng, nek ngɔn nɛt banet kutsitsɛng nɛ bafi irēn nkyɔrɔk nang, ngɔn tarak ayisi naban nnon ni ide. 26 Ey Ada, nek ikyɛng fi ngɔn kin nye, i da sas anɔng.

27 <<Ada hom mi di nɔk kaakyi ikyɛng ni bɔk in. Vit anet fɛ́ a rēn Arim e, tit Ada me aziwu, vit anet fɛ́ a rēn Ada me, tit Arim e aziwu nɛ bayɔng fɛ Arim e shim a ka ba tonong.

28 <<Bɛ́ yin ni imi, ngma yin fi i se yin gbɛrɛk, fɛ́ acet yin ki se yin diring; imi da ki nɔɔk yin ifɔɔn. 29 Moon yin ice ni imi, imi da ki tonong yin irèn, nɔng i da mɛɛs yin ni imi, nek imi bi nhwyɛ, in bi imen ice makiyi, wɛt iyin da sɛ yin ifɔɔn na ayɛ yin. 30 Nek acet anaan se fakam, ntsi hom se bɛgɛlɛk.>>