1 Ni izen e yɔng, bafi imɛɛs aYeso bɛ́ ba ku rip yɛ, <<Angan wu a wat ni iratek ni igwɔm Azanɛn ɛ?>>

2 AYeso yes nggon kabaane sak ni wu, a ka ka te ka nyeseng ashon bá, 3 wɛt a fɛ̀ ni ba, <<Won in ki tak yin atsak, Ma nggɔn yin shesheng in sot ti in fi nnon, ke da anɔng awo, vit iyin ni inɔ ayɛt igwɔm Azanɛn. 4 Ngma ayɔng fɛ́ a ya kashon ni imen ice tɛ kaban nggon kà, iwu wu a wat ni iratek ni igwɔm Azanɛn. 5 Kaangan fɛ́ a shan nggon tɛ ka kang ni iyerek hom, imi wu a di shan.>>

6 <<Ke anet akak te kazining ayɛt nnon nabaane na, na kpa ayɛt ishan atsak na, i da wat got gyat na ba rosom kunyin kuta-ikɔɔ ni tɔ anet e, na ba ku barak rep ayɛt izek itsik.

7 <<Kawɛy se azatse kang, nek ka saas banet ba kpas ni inɛn, i se gbing-gbing banet na ba kpa ni inɛn! Awɛt kawɛy se naton ayɔng fɛ́ a tarak irèn ikpa me! 8 Ki kubɔk ngɔn, ki kutak ngɔn ayi da ka bɛ́ ni ikpa, tɛn iko, da barak. Kaduk ni inɔ ayɛt kutset vit igang ni kubɔk ke kutak kuzining ayi, aza fɛ́ ba da ka barak ari irong ni mbɔk nfa nɛ atak afaa. 9 Wat ke ayisi ngɔn da ka te ni ira inɛn, tun ide, barak. Kaduk ni inɔ ayɛt kutset vit igang ni iyisi izining, aza fɛ́ ba da ka barak ari irong nɛ ayisi afaa.

10 <<Nɔ yin nhwyɛ yin, i bi byɛs yin kazining ayɛt nnon nang awo. Nek in tsin ki tak yin, batomaza ba se ashon aDa hom ayɛt azanɛn kaaki izen.*18:10 Afumung akak afɛ́ ashon fɛ́ ba kin jɛk ni mbɔk bɛ̀ ibyat ifɛ́ 11 ane: Nek Arim Anet bɛ́ nɔng ka da tsɛt bayɔng fɛ́ ba mi wey.

12 <<Iyin di yin anɛ? Ke anet bɛ̀ ítsamang anakat azining, wɛt izining ayɛt de wey, akyɛ fɛ́ a da nye yɛ? A da won ishɛrɛp anakat vit azining e ni ihwyanang, na tsɛ na tsɛt izining e yɔng fi i wey awɛ? 13 Ama fɛ́ a sɛ iye, in ki tak yin atsak, a da nye iyɛ ikan naton yɛ aza ishɛrɛp de anakat vit izining yɔng fi da i wey dɔng awo. 14 Idɔng kpaf anɔng, Ada yin fɛ́ a se azanɛn, da a shim kazining ayɛt naban e nang na ka wey awo.

15 <<Ke arunyining da nye inɛn, ngɔn tsɛ ni wu, da ku tonong inɛn wu, nkum yin bafaa kyɛk. Ke a da fok, a sot ngɔn mi ti ibun na arunyining. 16 Awɛt ke a rawu dang na a da fok, ni ti ni tsɛ gung na anet azining ke bafaa ayi, <Nɔng kaakyi ite kukun, da sɛ itis nanu banet bafaa ke bataat ayi.>*18:16 Ban di yin: Iyɛrɛk Ntsi 19:15. 17 Ke arunyining e rawu dang ka ba fok, ni tse ni kucɛɛt e ashon bafi ikuus, ke a rawu dang ka ba fok gbak, ku sok in tɛ afi nhwyi, ke anet ishashang itsɔm mben ayi.

18 <<Won in ki tak yin atsak, ngma ikyɛng fi irosom yin azatse, ida sot ni irosom azanɛn. Ngma ikyɛng fi ibisik yin azatse, ida sot ni ibisik azanɛn.

19 <<Won in bang ki tak yin atsak, ke banet bafaa ayɛt yin azatse, ba fɛ̀ ey naton kaakyɛ fɛ́ ba rip ide ayɛt awon, Ada hom fɛ́ a se azanɛn da ki nye yin e. 20 Nek karɔ fɛ́ banet bafaa ke bataat ayi di nyim ni iyerek hom, imi se gung ni ibá.>>

21 Ba se nɛ anɔng, aBitrus bɛ́ a rip aYeso yɛ, <<ATisa, tɛ kamang fɛ́ aruneng di ki ras inɛn ni in ku fuut e yɛ? Te kanakataat ɛ?>>

22 AYeso fɛ̀, <<Won in da tak, da ite kanakataat awo, tit ite kanakataat nsɔk kanakataat.

23 <<Nek igwɔm Azanɛn se tɛ agwɔm akak fɛ́ a shim a fa kurúm wu fi ku se ni bɔk basam wu. 24 Ni izen fɛ́ a kpa ifá me, ba bɛ́ na anet akak fɛ́ agwɔm e ku kuus kuta atalen*18:24 atalen: Kudot atalen yet itsɔm itarang anet nfɛ́ ayɛ nsɔk nfa. Kudot ayɛ me fɛ́ ba ku kuus yet ayɛ (200,000). agup kusɔk. 25 Nek kuta me ku gaat itarang, atekari me sak na ba tsɛ ba rep anet e, nɛ abining wu, ni nnon wu, ni ikyɛng fɛ́ a bɛ̀ ngma kusum ba di tarang kuta me.

26 <<Asam e kpa kpeshek ashon wu, a woso ra awon, <Kabɔk, ban di nang kizen, in da tarang ngma ikyɛng fi i di kuus.> 27 Atekari asam e fok angmishish wu, a ku wosong kuta me, a ku won a tseng ari.

28 <<Awɛt izen fɛ́ asam e yɔng wuruk azɔng, a se ni kutseet, a wat a nyim nɛ anet akak ayɛt bafidang itomong wu fi iwu ku kuus adinari*18:28 adinari: Yet itarang anet itomong ifi kunom kuzining. anakat azining. A firik afidang kutɔ, a fɛ̀ ni iwu, <Di tarang ikyɛng fi in da kuus!>

29 <<Afidang e kpa a te akut aben, a ra awon ni wu yɛ, <Kabɔk, di nang kizen in da ka tarang.>

30 <<Awɛt a rawu, a tsɛ a tekpaf afidang e ari inyang, ma a tarang kuta me. 31 Ni izen fi ishɛrɛp basam itomong ari agwɔm e di ikyɛng fi ite, ikyɛng e ka ba beseng iyɛ makiyi, ba tsɛ ba tak atekari me ngma ikyɛng fi ite.

32 <<Nek anɔng, atekari me sak na ba ku yes asam e yɔng fɛ́ a nye ikyɛng e dɔng, a fɛ̀ ni wu, <Ngɔn agwɔm kutomong anyas! Imi da wosong ngma ikyɛng fi in da kuus, nek kanak fi ngɔn tos sak ni imi. 33 Ki i se gyat ngɔn ni i fok kanak afidang itomong ngɔn bà, kpaf ti fi imi di fok kafɔɔn bà.> 34 Iyɛ agwɔm e beseng makiyi, a wat a sok a nabak bafi itosok kari inyang e, na ba tsɛ ba ku nesek mgbang ma a tarang kaakyi ikyɛng fɛ́ ba ku kuus.

35 <<Kpaf anɔng fɛ́ Ada hom fɛ́ a se azanɛn da nye ni iyin, ki i rayin dang fuut yin bafidin anɛn bá ni iyɛ yin.>>