1 AYeso tɛ nye banet igorok icɛɛt, a fɛ̀, 2 <<Igwɔm azanɛn se tɛ agbat agwɔm akak fɛ́ a moon amok iweneng nek ari wu. 3 A tom basam wu na ba tse sak na bayɔng fɛ́ ba mi ka ba rini nek amok e, na ba ka ba yes na ba bɛ́, awɛt banet e raba dang tse.

4 <<A tɛ tom basam e bakak sak na bayɔng fɛ́ ba ka ba rini me yɛ nɛ ba ka ba tak fok, <In mi gang inye kaakyɛ ifɛ́ amok e: Ba mi tsɛk ámung ni ínyak fi i nɔ makiyi, ba mi gang kaakyɛ. Bɛ́ yin amok kuweneng e.>

5 <<Wat bayɔng fɛ́ ba ka ba rini me di te nhwyɛ ba ni ifɛ̀ me awo, ba ya kashon ni inye ikyɛng fi i se ashon ba kyɛk: Akak tse ni ikɔ wu, akak tse narɔ ijik wu. 6 Wat ishɛrɛp ba, yisik basam e, ba tsosok zii, ba fɛs iba. 7 Agbat agwɔm e nye kafa kawe makiyi. Nek anɔng, a tom batsom wu, ba tsɛ ba fɛs bafi ifɛs banet yɔng, ba di kas árong ni wɔp bá me.

8 <<Ama anɔng, agwɔm e fɛ̀ na basam wu, <Ba mi gang inye nayak amok iweneng e, awɛt bayɔng fɛ́ ba ka ba rini me, bi ízɔk e awo. 9 Nek anɔng, di kuus yin agbat irén, yes yin ngma bayɔng fi i kyem i sɛ yin.> 10 Basam e wuru, ba kuus agbat irén, ba tusung ngma banet fɛ́ ba kyem ba sɛ, ngma batek e nɛ aduk e, nek anɔng kutu amok iweneng e shining na batsen.

11 <<Awɛt izen fɛ́ agbat agwɔm e nɔ, nɔng a da bin di batsen e, a di anet akak azɔng fɛ́ da a te ares fɛ́ a yet afɛ́ amok iweneng e awo. 12 A ku rip yɛ, <Arɔ, ngɔn tsa anɛ fi inɔ azeng, dang te ares fɛ́ a yet afi iweneng ɛ?> Anet e di wey yuu.

13 <<Wat agwɔm e fɛ̀ nɛ banet itomong wu, <Ku rosom yin, mbɔk nɛ atak, da barak yin iwu ni rin amatse, azɔng fɛ́ ba da tos ni ros anyi.>

14 <<A yet banet dot fɛ́ ba rini, awɛt gyet fɛ́ ba kasa.>>

15 Ama anɔng, BaFarasi tsɛ ba tɔ ikyɛng fɛ́ ba da nye ba di yit aYeso ni ifɛ̀. 16 Ba tom bakak ayɛt bafi ikuus bà nɛ banet-aHiridus na ba tse ni wu, wɛt iba fɛ̀ ni wu, <<Anet itees, iyit irēn yit ngɔn yet anet fi i bɛ̀ atsak na anu. Ngɔn tees banet kucɛɛt Adakunom kufɛ́ atsak. Vit ngɔn ni ishim ice, nek banet ngma kusum ba yet ikyɛng izining ashon ngɔn. 17 Ki tak yit ikyɛng fi ngɔn di i se kpaf. Ni ku di ngɔn, ntsi yit fɛ̀ ni in tarasa yit aKaisar agwɔm aRoma itsɔm mben a? Ke Awɛy ɛ?>>

18 Wat aYeso mi rēn kuyiring anyas bà, a fɛ̀ ni iba, <<Iyin bafɛ́ nanu nafifa, akyɛ sak fi i di tsɛt yin ni inɛn ni ifɛ̀ hom ɛ? 19 Di tonong yin itsɔm fi i di tarasa yin itsɔm mben e.>>

Ba ku bɛ́ ni ica itsɔm aRoma me, 20 a ka ba rip yɛ, <<Nawu angan, ni iyerek angan de fɛ́ ba di te naton itsɔm e yɛ?>>

21 Ba fɛ̀ ni iwu, <<Na fɛ́ aKaisar.>>

A fɛ̀ ni iba, <<Nɔk yin aKaisar ikyɛng fi iyet ifɛ́ aKaisar, ni nɔk yin Adakunom ikyɛng fi iyet ifɛ́ Adakunom.>>

22 Ni izen fɛ́ ba fok anɔng, ikyɛng e wɛt i ka ba te kpɔrɔk, ba ku won, ba tseng.

23 Atuk e yɔng, BaSadusi tse na aYeso. Iba wu ba nye fok vit idoro bafaben. 24 Ba tsɛ ba ku rip yɛ, <<Anet itees, aMusa kin fɛ̀, <Ke akak ku dang tes nnon, i se gbing-gbing arunyining na bereng abining e, a ku tsɛt mo izit.> 25 Fok, barɔ bakak kanakataat nin nggɔ bá kin se azeng ni yit, afi imɛsɛng e bɔ abining, a bɛ́ a ku dang nggon, nek anɔng, arunyining bɛ́ a sok abining e. 26 Iwu tɛ a di ku anɔng bà dang nggon. Afɛ́ ataat sak afɛ kanakataat bɛ́ ba di sot nɛ abining e, ba di kus anɔng vit kutes. 27 Ama me, abining e nɛ a ku. 28 Wat ni izen idoro bafaben, abining e bi yet afɛ́ angan ayɛt banet kanakataat yɔng ɛ? Nek kaangan bá mi sot ni wu.>>

29 AYeso fɛ̀ ni iba, <<Iyin wey yin irèn nek vit iyin ni irēn ikyɛng fi kufumung Adakunom fɛ̀ ni kukyem wu. 30 Nek izen idoro bafaben, bamatek bi tɛ ba ras nweneng awo, banyining bi tɛ ba tsees nweneng awo. Ba bi sot tɛ batomaza. 31 Naton idoro bafaben, iyin ki mang fa yin ikyɛng fɛ́ Adakunom kin fɛ̀ ni iyin awɛ? Ba kin jɛk yɛ, 32 <Imi wu in yet Adakunom aIbrahim, Adakunom aIshaku, nɛ Adakunom aYakub.> Idɔng tonong yɛ, a yet Adakunom bafi kutset, da afɛ́ bafaben awo.>>

33 Ni izen fɛ́ kudyɛng banet e fok itees wu me, ikyɛng e ka ba te kpɔrɔk.

34 Ni izen fɛ́ BaFarasi di aYeso mi mees BaSadusi ni kucɛɛt, iba tsɛ ba kana tusung. 35 Azining ayɛt ba, fɛ́ a yet agwɔm irēn ntsi aMusa, tsɛ a ku mara ni irip yɛ, 36 <<Anet Itees, akyɛ agbat-ifɛ̀ fi iwat iratek ngma ayɛt ntsi aMusa yɛ?>>

37 AYeso fɛ̀ ni iwu, << <Shim Adakunom ni iyɛ ngɔn ngma, ni kutset ngɔn, ni kuyiring ngɔn ngma kusum.> 38 Ntsi nang na fi in yet nfɛ́ ashon e, ni in yɔng fi in wat ni iratek. 39 Nfɛ́ afaa fi in se ti iyɔng e yet: <Shim afidang isot ngɔn ti ice ngɔn.> 40 Ngma ishɛrɛp ntsi ni ijɛk afumung batan e, nye shɛɛt naton nfaa nang.>>

41 Ni izen fɛ́ BaFarasi me mi kana tusung, aYeso ka ba rip yɛ, 42 <<Iyin di yin tɛ Anet-Isheshek e yet angan ɛ? A yet arim angan ɛ?>>

Ba fɛ̀ ni iwu, <<A yet arim aDauda.>>

43 A fɛ̀ ni iba, <<Wɛt akyɛ sak Kabik te aDauda ku yes aTisa yɛ? Nek aDauda kin fɛ̀ yɛ,

44 <ATisa fɛ̀ na aTisa hom:

<<Sonong aze ni ibɔk iyak hom,

ma in sak bafi fa ni ngɔn

na ba kpa natak ngɔn.>> >*

45 Ke aDauda kin ku yes <ATisa,> nɛ anɛ fɛ́ Anet-Isheshek e da sot arim aDauda kong ɛ?>> 46 Vit anet fɛ́ a kyem a fɛ̀ na aYeso ikikak. Nkum atuk e yɔng, vit anet fɛ́ a tɛ bɛ̀ agap iyɛ a tɛ a ku rip ikikak.