1 Ni izen fɛ́ aYeso se ni iwuruk ni itu iya Adakunom ntong, a se ni itseng, wɛt bafi imɛɛs wu tse ni wu, ba ku tonong nzam-nzam inok kutu iya ntong e. 2 Iwu fɛ̀ ni iba, <<I di yin inok e deng a? Won in ki tak yin atsak, vit kuta kuzining azeng fɛ́ ba bi won iko naton kufidang, fɛ́ da ba bi yirik iko sak aben.>>

3 Ni izen fɛ́ aYeso se ni isonong ni Ihwyanang Ifat, bafi imɛɛs wu tse ni wu ni nɛt. Ba kpa ku risim fok yɛ, <<Ki tak yit, ikyɛng e deng bi te azik ɛ? Akyɛ bi yet ikyɛng fi i bi ki tonong yit izen kubɛ́ ngɔn, ni izen igang azatse me yɛ?>>

4 AYeso shim, a fɛ̀ ni iba, <<Bɛ́ yin ni nhwyɛ yin bakat, kɔn akak bi ki wɔrɔk yin! 5 Nek banet dot bi bɛ́ ni iyerek hom, wɛt kaangan ba bi nye, Imi wu in yet Anet-Isheshek e. Ba bi wɔrɔk banet dot. 6 I bi foos yin ncɛɛt naton itsom ni iwoot-ncɛɛt itsom. Ngma na anɔng, i bi fok yin nnyim awo, nek i se gbing-gbing nkyɔrɔk e ni in te anɔng, awɛt igang e mi nye ninyen awo. 7 Banet ba, bi dorok itsɔm na ba yá. Igwɔm idè da dorok itsom ni igwɔm idá. Ba bi nye nzong ni izuut mben ne narɔ zizɛɛt. 8 Ngma nkyɔrɔk e yɔng yet itumung irus kurɔ ites.

9 <<Ba bi ki yisik yin, ba bi ki nasap yin ni bɔk banet na ba ki nesek yin izot, na ba ki fɛs yin. Kazatse ngma ka bi ki rayin, nek iyerek hom. 10 Ni izen e yɔng, banet dot bi bun kama ayɛt inɔɔk atsak bá, ba bi rɛs bafidang bá, ba bi raba bafidang bá. 11 Batan nbɔs dot bi wuru, ba bi tes banet dot na ba wey irèn. 12 Nek banet anyas bi se dot makiyi, ishim fɛ́ banet bɛ̀ sak na bafidang, bi shirim. 13 Awɛt ayɔng fɛ́ a kyem a nyeseng sak ni igang e, ba bi ku sheshek. 14 Wat ba bi shara ifɛ̀ itek ifi igwɔm deng kaakyɛ azatse, i bi sot kanu icɛɛt naton banet kusum, ama anɔng, ni igang e bɛ́.

15 <<Wat i bi fi di yin, <Na ba mi nye aduk nkyɔrɔk> narɔ kaJɛrɛ, idɔng fɛ́ atan aDaniyɛl kin di cɛɛt naton e (won anet fɛ́ a tsin fa na a rēn). 16 Won banet fɛ́ ba bi se na aJudiya, na ba teng sak na ahwyanang. 17 Da ayɔng fɛ́ a se naton agubuk itu, bi fɛ̀ fok iwu tik aben a tsɛ sok ikikak ayɛt itu awo. 18 Da ayɔng fɛ́ a se ni ikɔ, bi fɛ́ fok iwu tɛ bun ari a tsɛ sok ikyɛng ifam irɔm awo.

19 <<Kawɛy naton banyining afa, nɛ bayɔng fɛ́ ba tsin ngasa nnon ni izen e yɔng! 20 Ra yin awon sak na Adakunom, kɔn ikyɛng deng bi te ni izen abolosh kɛ Atuk Ifɔɔn baYahuda, fɛ́ ka yet aSabat awo. 21 Nek izen e yɔng, ba bi nye aduk mgbang, kuri yɔng fɛ́ ba ki mang nye ina neme ni itumung kazatse kang awo, ba bi tɛ ba nye kuri na kong awo. 22 Kɛ da nek Adakunom wu a kyɛk nnom e yɔng awo, kɛ vit anet azining fɛ́ a da kyem a hwyet. Awɛt nek bayɔng fi iwu mi tsang myak fi i sak a kyɛk nnom e. 23 Ni izen e yɔng, kɛ akak fɛ̀ ni iyin, <Di, Anet-Isheshek e yo!> kɛ <Di, a kya!> I bi nɔɔk yin atsak ni ifɛ̀ wu awo. 24 Nek banet-Isheshek mbɔɔs, nɛ batan nbɔs, bi bɛ́s na ba ras ntomong abes nratek, ni nkyɔrɔk ajingjing nɔng ba bin di wɔrɔsɔ banet, pet na bayɔng fɛ́ ba mi tsang ka ba myak, ki i da kyem ite anɔng. 25 Di yin! In mi ki tak yin gyam dang ni ite.

26 <<Nɔng kɛ banet fɛ̀ ni yin, <A kya ayɛt ayit,> i bi tse yin awo; kɛ na ba fɛ̀, <A yo ayɛt itu ayɛt e!> I bi nɔɔk yin atsak ni ifɛ̀ ba awo. 27 Nek kubɛ́ Arim Anet bi se gobok kpaf ti adɛbɛt iza nkum abatin sak abace. 28 Karɔ fi kukom di se, azɔng fi ájɛrɛwɛsh da kana tusung mo.

29 <<Zɛng-ngɛ-ziri, ama mgbang nnom e yɔng,

<Kunom bi wat ku te ngmalak,

kufɛn bi rako dang nɔɔk mgbɛy ko.

Ádat bi kpas aben,

nkyɔrɔk azanɛn bi zuut.>

30 <<Ni izen e yɔng, banet bi di naton aza, ikyɛng fi i bi tonong kubɛ́ Arim Anet e. Ngma banet azatse bi tos nek nnyim, ni izen fɛ́ ba bi di Arim Anet naton anɔk aza ni kukyem ni ízɔk iratek. 31 A bi tom batomaza wu na ba fɛɛp kugba gbɛrɛy, ba bi tusung ngma bayɔng fɛ́ ba myak na atsok anaas, nkum kubat azatse kaa sak ni ku yá.

32 <<Won mɛɛs yin ikikak naton atin-akon atafo. Ni izen fɛ́ ahwyang e kpa turup, nɛ afumung e kpa tang, ni wat irēn yin, ikos bɛ́ bakat. 33 Idɔng kpaf anɔng, ki iyin di yin ngma nkyɔrɔk nang fi imi tsin fɛ̀ ni yin, ni wat rēn yin fok izen e bɛ́ bakat, a se natitu. 34 Atsak fi in tsin ki tak yin, kuzam ku kang da tsang got awo, ma nkyɔrɔk nang te ngma. 35 Kazanɛn nɛ kazatse bi gang, awɛt ifɛ̀ hom bi gang awo.

36 <<Vit anet fɛ́ a irēn atuk e ki izen e ayi, pet nɛ batomaza nɛ Arim e*, ma Ada me aziwu kyɛk fɛ́ a rēn. 37 Kpaf ti fi i kin te ni izen aNuhu, kubun Arim Anet yɔng ku bi se kpaf anɔng. 38 Nek ni izen aNuhu me, dang ashi abes e na a bɛ́, ba se ni iyas ni isɔ, bamatek se ni ira nweneng, na ba nesek bangas ni nweneng sak atuk fɛ́ aNuhu di nɔ ayɛt kukyɛ ashi me. 39 Iba kin rēn ikyɛng fi i tsin tseng awo, ashi abes e bɛ́ a ka ba ya ngma kusum. I bi se anɔng, ni izen fɛ́ Arim Anet bi bɛ̀. 40 Banet bafaa bi se ni ikɔ; ba bi sok azining, na ba won azining. 41 Banyining bafaa bi se ni ku kɔɔ; ba bi sok azining, na ba won azining.

42 <<Nek anɔng, bɛ́ yin ni nhwyɛ yin bakat, nek da iyin rēn yin atuk e ki izen e, fɛ́ aTisa yin bi bɛ́ awo. 43 Rēn yin ane: Ke atekari fɛ́ a rēn izen fɛ́ akpatang di ki nɔ ari wu, ke arɔ na ayisi wu nda, ke a won ba ku nɔ ari awo. 44 Nek anɔng, i se gbing-gbing ni kana nye yin, nek Arim Anet bi bɛ̀ ni izen fi i mi di te yin iyɛ awo.

45 <<Angan wu fɛ́ a yet asam afi kutsitsɛng yɔng fɛ́ ba di te iyɛ yɔng ɛ? A yet ayɔng fɛ́ atekari wu ku sak na a kuyɛrɛ kari, na a nesek ishɛrɛp basam e kuyak kpaf ni izen e. 46 Awɛng bi yet a fɛ́ asam e yɔng fɛ́ atekari wu bɛ́ a ku sɛ na tsin ra ikyɛng fi i se yɛɛt. 47 Atsak fi in tsin ki tak yin, atekari me, bi ku sak na a kuyɛrɛ ngma kurúm wu. 48 Awɛt ke asam e yet afɛ́ anyas, fɛ́ a fɛ̀ ni ice wu, <Kye! Atekari hom ma tsɛ a sha wu narɔ kutseet e.> 49 Wat a kpa tsosok ishɛrɛp basam e, na yas na sɔ na bafi sɔ. 50 Atekari me bi bɛ́s wu atuk fɛ́ asam e di te iyɛ awo, ni izen fɛ́ da a rēn awo. 51 Atekari wu bi ku nye iduk itsot, na ma ku moon nɛ bafɛ́ nanu nafifaa, azɔng wu fɛ́ a bi tos na ros anyi.