1 Ni nnom e yɔng, aYohana anet aBatisma ne, a shara banet ifɛ̀ ayɛt atse aJudiya 2 na nye na banet, <<Wosong yin anɛn yin, nek igwɔm azanɛn mi bɛ́ bakat.>> 3 Iwu yong fɛ́ atan aIshaya kun di cɛɛt naton wu yɛ,

<<Kutɔ anet fi ku nye

gbash iyes na tse yɛ,

<Nye yin irèn fɛ aTisa di ki got,

nabak yin naban irén tabat mok iwu.> >>

4 Ares fɛ́ aYohana tes ina, ba nye ina na akwoy itsaap-igung, kudun irosom awit wu kun yet kukpa. Nayak wu kun yet itsé ni itong nating. 5 Banet nes na aRushelima nɛ bafɛ́ abak aJudiya ngma kusum nɛ bafi nwɔp fi in se nasamang ikyɛk aJodan. 6 Ba taas anɛn bá, ni wu ka ba ras abatisma ni kukyɛk aJodan.

7 Ni izen fɛ́ aYohana di BaFarasi nɛ BaSadusi tseng sak ibɛ narɔ fi iwu tsin di ras abatisma, a fɛ̀ ni ba, <<Iyin áhyén! Angan ki tabak yin ni iteng yin ishɔt fi iwuruk ɛ? 8 Nye yin ikyɛng fi i da tonong fok i mi won yin anɛn yin sak ishan atsak. 9 I bi ka woso tsosok yin agwɔm ni inye yin yɛ, adakop yit yet aIbrahim awo! Won in ki tak yin, Adakunom bi ízɔk fɛ́ a da donong ata nà, na a sot nnon aIbrahim. 10 Yɔkɔnɔng ana ba mi sak kutɛm na áney atin-akon, ngma kakon fɛ́ ka raka dang korok kutes, ba da tɛmɛng ika, na ba ma barak ika ni rong.

11 <<Imi ki ras yin abatisma nɛ ashi nek iwosong anɛn yin sak ishan atsak. Awɛt ayɔng fɛ́ a da bɛ́ ama hom, di wat ni kukyem, imi rat ni in sok kukpatak wu. Iwu bi ki ra yin abatisma nɛ Kabik aJɛrɛ ni kurong. 12 Kube iwum kazu wu se ni bɔk wu, a da wum kazu wu, na ma tusung ica nayak sak ni imyɛ, na ma shosh ahwye me ni rong fi ku ya vit igang.>>

13 Ni izen e yɔng, aYeso ne na aGalili sak na aJodan nɔng aYohana bin ku ra abatisma. 14 Awɛt aYohana tsɛt kɛ a rawu, a fɛ̀ ni wu, <<Imi wu in tsɛt ngɔn ni i di ra imi abatisma, akyɛ sak ngɔn da bɛ́ ni imi yɛ?>>

15 Wat aYeso fɛ̀ ni wu, <<Won ni sot anɔng yɔkɔnɔng; I se yɛɛt ni in nye yit anɔng ba bin di shining ikyɛng fɛ́ Adakunom shim.>> AYohana anɛ shim a ku ra ne.

16 Nkum fɛ́ ba gang ira aYeso abatisma, a wuruk ayɛt ashi, ni izen izining kazanɛn wat ka tarak, a di Kabik Adakunom tsin tisik naton wu tɛ abɔp ka di nak ni wu. 17 Wat kutɔ ne azanɛn, yɛ, <<Ari hom yong, fi in kushim makiyi, in bɛ itɛrɛk iyɛ ni wu.>>Ba tsin ra aYeso aBatisma