1 Meno Pawuli, ntumwa yi Yesu-Klisto, wutambula mbokolo yi Nzambi mu luzolo lwandi na mpangi ani Sositeni.

2 Tuna sonika mukanda ku yeno dibundu di Nzambi dii ku mbanza Kolinto, yobobo bavwihulu ku Nzambi mu Yesu-Klisto, bakatumisa mu zinga nandi kintwadi na bamvimba bakwe sambilanga mu bibuka bimvimba nkumbu yi Yesu, wudi Mfumu awu na Mfumu eto. 3 Bika Nzambi Tata dyeto na Mfumu Yesu Klisto kalusakumuna na kaluhaana kiyenge!

4 Tukwe tatamananga mu vutula matondo ku Nzambi eto mu dyambu dyeno mu mulemvo wu kalusila mu Yesu Klisto. 5 Mu dyambu ti, mu Yesu lutambudi bimvwama bimvimba bi minkayilu, sungula munkayulu we longa na wu nzayilu. 6 Kimbangi ki Klisto ki balusamunina, kya luna toma kwikilanga mu ngolo zimvimba, 7 buna, kuu na munkayulu wuhaana Nzambi wulembolo ba neeno ko, ku yeno luna kingila kilokola kyaayenika Mfumu eto Yesu-Klisto. 8 Yandi waalusyamisa natee ku nsukunu, mwanki lulembolo ba na dyambu dye lusembila mu kilumbu ki Mfumu eto Yesu-Klisto. 9 Nzambi yandi bende wulutumisa mu zinga mu kintwadi na Mwana andi Yesu-Klisto Mfumu eto: Yandi wukwikama kadi mu nsilulu zandi.

10 Mpangi zani, nina lubombidila mu nkumbu yi Mfumu eto Yesu Klisto: yuwasaneeno, lubandi na nkabani ha kati dyeno ko. Kansi, tomeeno ba bakangama mu kintwadi na beeno na mpeve yimosi mpe mayindu mamosi. 11 Mpangi zani, bantu baa mu kanda di Kolowe bantedidi ti mbakani zii neeno yeno na yeno. 12 Nina kwe yuwingi ha kati dyeno ti: ewu wuna ta: «Meno muntu wu Pawuli nidi», wuhiika wuna ta ti: «Meno muntu wu Apolose», wuhiika dyaka ti: «Meno muntu wu Sefase», wuhiika dyaka ti: «Meno muntu wu Klisto nidi!» 13 Luna banzila ti Klisto wukabuka kadi e? Nganunu ni Pawuli wufwa ha kulunsi mu dyambu dyeno e? Nganunu mu nkumbu yi Pawuli lubotokolo e?

14 Nakwe vutulanga matondo ku Nzambi bu nalembolo botika nakani muntu, tala ti ka Kilisipusi na Ngayusi ko. 15 Mu dyambu ti, kuu muntu ko lendi ta ti mu nkumbu ani lubotokolo. 16 Ninga, nabotika dyaka kanda di Sitefanasi, kansi nazebi muntu wuhiika wu nabotika ko. 17 Meno Klisto kamfidisa mu botika ko: wumfidisa mu samuna Musamu Wumbote, ka mu sadila ndwenga zi kimuntu ko, mwanki lulendo lu lufwa lu Klisto ha kulunsi lulembolo ba bonso kima kimpamba.

18 Kedika, ndongosolo yi lufwa lu Klisto ha kulunsi yidi buzengi ku yobobo bana zimbala, kansi ku yeto tuu mu nzila yi mpulusu, tuna yena momo lulendo lu Nzambi. 19 Wudi wusonama:

«Nina zimbisa ndwenga zi bantu baa na ndwenga,

mpe nina sukisa madyela ma bantu baa na madyela.»

20 Muntu wundwenga kwedi kadi e? Mulongisi wu misiku kwedi kadi e? Nzonzi yi ntangu beyiyi yitomini zaba mu zonza kwedi yidi e? Nzambi wulonkidi ti ndwenga zi nza beyiyi ni bulahuki!

21 Kedika, bantu na ndwenga zawu zimvimba, balembakani mu zaba dyaka Nzambi hoho ha kedi yenikisa ndwenga zandi. Ni hahoho Nzambi kabongila nzengolo ye vuukisa yobobo bana sa kiminu mu ndongosolo beyoyo yi bana yena ti yi bulahuki. 22 Bayudayo bana lomba bidimbu bingitukulu, na bangeleke bana sosa ndwenga, 23 kansi yeto, tuna samuna Klisto wu bakoma ha kulunsi: wudi musamu wuna tesisa Bayudayo masakuba na bulahuki ku balembolo ba Bayudayo. 24 Kansi ku yobobo Nzambi bakatumisa, ni haba ti Bayudayo hoti yobobo balembolo ba Bayudayo, Klisto ni lulendo na ndwenga zi Nzambi. 25 Kedika, bulahuki bu Nzambi buhyokidi mu ndwenga na ndwenga zi bantu, na lebakani ku Nzambi kuvudi lulendo na ngolo zi bantu.

26 Zimpangi, tomeeno yindula banani ludi yeno Nzambi ba katumisa: mu kimuntu, ha kati dyeno mwa ndambu yi bantu yii na ndwenga, mwa ndambu yii na lulendo, mwa ndambu yi bantu yii mu makanda ma buzitu. 27 Kansi, Nzambi wusoola myo mii mi bulahuki ha luse lu butoto, mu fwisa baa na ndwenga nsoni. Wusoola myo mii milebakana ha luse lu butoto, mu fwisa nsoni yobobo baa na ngolo. 28 Nzambi wusoola bima bilembolo ba na mfunu na byo bi bakwe yinanga, hoti bilembolo ba kisalu ha luse lu butoto mu mwangisa byo bi bakwe yenanga mfunu. 29 Ni hahoho, kuu muntu wumosi wulendi kitumpidika ha ntadisi yi Nzambi ko. 30 Kansi Nzambi wutuvuka kintwadi na Yesu-Klisto, na wusa ti Yesu kaba ndwenga zeto: Ni Klisto kwe tukitulanga balunungu ha ntadisi yi Nzambi, na kwe sanga ti tuzinga mu dyambu di Nzambi, mpe kwe tukuulanga mu masumu. 31 Ni hahoho bonso buna ta masonama: «Tala ti muntu tiidi mu kisiikisa, kakisiikisa mu misamu mihidika Mfumu.»