1 Mu misamu mi lunsonikini, bumbote ti bakala kalembolo kwela mukento. 2 Kansi mu lembolo sadila kindumba, bika kadi bakala kaba na mukento andi, mpe kadi mukento kaba na bakala andi. 3 Bika bakala kalungisa nsatu zi mukento andi, bumosi mpe mukento, fweti lungisa nsatu zi bakala andi. 4 Mukento kaa mfumu yi nitu andi ko, kansi ni bakala andi. Bumosi mpe, bakala kaa mfumu yi nitu andi ko, kansi ni mukento andi. 5 Lubisandi mu kabasana nitu, tala ti lutekidi yuwasana ha kimosi ko mu lukiyekola mwa ntangu yifyoti mu minunu yi nsoki na mu lusambulu. Ku manima mbo lubwesa vukana, mwanki Satana kalembolo lutonta, tala ti luyedi nitu zeno.

6 Nina zonzila bobo ka mu luhaana misiku ko, kansi mabanza kwandi nina luhaana. 7 Natiidi ti bamvimba baba bonso bu nidi meno, kansi kadi muntu wutambula munkayulu ku Nzambi, wumosi tambudi munkayulu wu ebu, wuhiika tambudi munkayulu wu buhiika.

8 Ebu nina ta ku yobobo balembolo ba bakwela na ku bamafoola, buu bumbote ku yawu muba bonso bu nidi meno. 9 Kansi tala ti balendi kukiyaala ko, bika bakwela, buvudidi bumbote mu yawu mu kwela na muba na mitima mi nalungula mu nsatu zi nsuni.

10 Ku yobobo baa bakwela, ntumunu eyi na luheeni, yifumini ku meno ko kansi ku Mfumu: Mukento kahambanandi na bakala dyandi ko, 11 - tala ti hambani na bakala dyandi, ka bwesandi kwela hoti ka wawasana na bakala dyandi - mpe bakala kahambanandi na mukento andi.

12 Ebu nina ta ku bahiika (mebende nina ta bo, kansi ka Mfumu ko): tala ti mpangi yi mu Klisto yimosi wuu na mukento wulembolo ba munkwikidi, mpe ti mukento tambudi mu zakala nzo yimosi nandi, kabika mu hambana nandi. 13 Bumosi mpe, tala ti mukento wuu na bakala di lembolo ba munkwikidi, mpe bakala tambudi mu zakala nzo yimosi nandi, kabika mu hambana nandi. 14 Mu dyambu ti, bakala di lembolo ba munkwikidi waaba muntu wu vwihulu ku Nzambi mu dyambu di mukento andi, bumosi mpe ku mukento wulembolo ba munkwikidi waaba muntu wu vwihulu ku Nzambi mu dyambu di bakala dyandi. Tala ti ka bwabobo ko, baala beno baketi ba bavedila ko, mpeleko balongo badi. 15 Tala ti yondowo lembolo ba munkwikidi tiidi mu hambana, ka hambana kwandi. Munkwikidi, wu bakala hoti wu mukento ka wukangama mu musamu bewowo ko, mu dyambu ti Nzambi wulutumisa mu zinga mu kiyenge. 16 Ngeye mukento bwedi lendi zabila ti waavuukisa bakala dyaku e? Hoti ngeye bakala bwedi lendi zabila ti waavuukisa mukento aku e?

17 Dyambu dihiika edi, bika kadi muntu katatamana mu zinga bonso buu munkayulu wu muhaana Mfumu, mpe bonso bu kaba mu ntangu Nzambi yi kamutumisa. Yoyoyo ni ntumunu yi nina haana ku mabundu mamvimba. 18 Tala ti ku na muntu wuba wuzengoso bubakala mu ntangu Nzambi yikamutumisa, ka sosandi mu sweka ko. Tala ti muntu wuba wulembolo zengoso bubakala mu ntangu Nzambi yikamutumisa, kabika mu zengoso bubakala. 19 Kuzengoso na kulembolo zengoso bubakala kuu mfunu ko, kansi dyambu dii mfunu, ni kuntumama mu mina mi Nzambi. 20 Bika kadi muntu katatamana mu zinga bonso bu kaba mu ntangu Nzambi yi kamutumisa. 21 Kadi mundongo wuba mu ntangu Nzambi yi kakutumisa e? Kunyonginandi wo ko, kansi tala ti beki hwahwa mu ba kimpwanza, landa nzila beyoyo. 22 Mu dyambu ti, mundongo Mfumu wu katumisa, wuhika kimpwanza mu Mfumu, bumosi mpe, muntu wuu kimpwanza Mfumu wu katumisa wudi mundongo wu Klisto. 23 Nzambi wulukuula mu ntalu yiyingi, lubandi mindongo mi bantu ko. 24 Zimpangi, bika kadi muntu katatamana mu zinga bonso bu kaba mu ntangu Nzambi yi kamutumisa.

25 Ku bantu balembolo ba bakwela, nii na ntumunu yi Mfumu ko, kansi mabanza kwandi nina luhaana bonso muntu wu bafweti siila kivuvu, muntu wutambudi mulemvo ku Mfumu.

26 Nina banza ti, mu dyambu di mpasi zi ntangu beyiyi, bumbote ti: muntu kaba kwandi bonso bu kadi. 27 Mukento wuu naku e? Kusosandi mu hambana nandi ko. Wudi aku na mukento ko e? Kusosandi mu ba na mukento. 28 Tala ti kwedidi, siidi masumu ko, mpe tala ti ndumba yikwedidi, kasiidi masumu ko. Kansi, bantu baa bakwela, baakwamusu mu luzingu lwawu, mpe ntiidi ti lulembolo yena mpasi bezozo.

29 Zimpangi, ebu nina ta: ntangu yeka lukufi. Bwabu, bika babakala baa na bakento baba bonso ti baa na bakento ko, 30 yobobo bana dila baba bonso ti bana dila ko, yobobo bana yangalala baba bonso ti bana yangalala ko, yobobo bana sumba baba bonso ti baa na kima ko, 31 na yobobo bana sadila bima bi nza beyiyi baba bonso ti bana sadila byo ko. Mu dyambu ti, nza beyiyi bonso bu yidi, yaahyoka.

32 Meno ntiidi ti lulembolo kikwamisa. Yondowo lembolo ba wukwela katuula mayindu mandi mu misamu mi Mfumu, kasosa bwedi kalendi yangidikila Mfumu, 33 kansi, bakala bedyodyo dii dikwela, kwe sanga mayindu mandi mu misamu mi nza beyiyi, kwe sosanga bwedi kalendi yangidikila mukento andi. 34 Mpe diswasani dihoho ha kati di mukento wulembolo kwela na ndumba: yawu balembolo ba bakwela, bakwe sanga mayindu mawu mu misamu mi Mfumu, mwanki baba balongo mu nitu na mu mpeve, kansi mukento wuu wukwela, kwe sanga mayindu mandi mu misamu mi nza beyiyi, kwe sosanga bwedi kalendi yangidikila bakala dyandi.

35 Nina zonzila bobo mu dyambu di bumbote bweno, kansi ka mu lukwikisa ko, ntiidi ti luhidika misamu mifwanakani, mu ba bakangama mvimba mu kisalu ki Mfumu.

36 Tala ti toko dina yena ti bumbi kana sa mu lembolo kwela ndumba yi bawawasani makwela, tala ti nsatu zina muyaala, mpe wuna yena ti bumbote bakwelana, bika bakwelana kwawu, bonso bu katiidi, bana sa masumu ko. 37 Kansi, tala ti toko bongidi nzengolo ku nsye mutima andi, wulembolo kwikusu, mu lembolo kwela. Tala ti wuu na lulendo lwe yaala nsatu zandi, mpe bongidi nzengolo yandi bende mu lembolo vuka mfulu na ndumba yi bawawasani makwela, musamu wumbote kahidikidi. 38 Buna, yondowo kwedidi ndumba andi yi bawawasani makwela, musamu wumbote kahidikidi. Kansi, yondowo bisidi mu kwela hidikidi musamu wuvudidi bumbote.

39 Mukento wuu wukangama ku mulumi andi ntangu zimvimba bu kakidi wumoyo. Kansi, tala ti mulumi andi fwidi, beki kimpwanza mu kwela wonso wu katiidi, mpasi bakala bedyodyo diba dikangama mu Mfumu. 40 Kansi, mu mayindu mani, yandi wavula ba mu kyese tala ti bedi kwandi bobo. Meno mpe nina banza ti, Mpeve yi Nzambi yii naani.