1 Mu dyambu ditadidi mbizi zi bakwe haananga ku nzambi zi biteki bonso minkayulu, tuzebi ti yeto bamvimba tuu na nzayilu. Nzayilu zikwe sanga ti muntu kaba na mayama, kansi luzolo lukwe tunganga. 2 Tala ti muntu wuna banza ti mwa kima kazebi, wakidi wulembolo zaba nakani kima bonso bufwanakani. 3 Kansi muntu ti tiidi Nzambi, Nzambi wumuzebi.

4 Ni hahoho, mu dyambu ditadidi kudya mbizi zi baheeni bonso minkayulu ku nzambi zi biteki, tuzebi ti nzambi zi biteki bima bi mpamba bidi mu nza, mpe Nzambi yimosi kwandi yidi. 5 Mu dyambu ti wukedika, kuu na byo bi bakwe tumisinanga ti zinzambi, ni kuba ku yulu, ni haba ha luse lu butoto, mpe wudi wukedika ti zinzambi na zimfumu zizingi zidi, 6 kansi mu yeto, Nzambi yimosi kaka yidi, yandi wudi Tata, na ku yandi bima bimvimba bikwe fumanga, mpe mu dyambu dyandi tudi bamoyo. Mpe Mfumu yimosi kwandi yidi, ni Yesu-Klisto, mu yandi bima bimvimba bikwe zinganga, na mu yandi tudi bamoyo.

7 Kansi, bamvimba baa na nzayilu beyoyo ko. Ndambu yi bantu bahiika batoma yuku na nzambi zi biteki, bakwe dyanga mbizi zi minkayulu, bonso ti zivwihulu ku nzambi zi biteki, mayindu mawu malebakana madi, mpe bakwe banzilanga ti mbizi beyoyo yikwe basumunanga. 8 Kansi ka bindya ko bikwe tusanga ti tuba bela-bela na Nzambi: Tala ti tudidi byo, hanaani kima kyaabwesama. Tala ti tudidi byo ko, hanaani mpe kima kyaakatuka.

9 Kayeeno meso kadi ntangu, mwanki kimpwanza kyeno ki lembolo ba ntesoso yi masakuba ku bantu balembolo ba na kiminu kisyama. 10 Tala ti muntu wulembolo ba na kiminu kisyama wukuyeni ngeye wuu na «nzayilu», wuna dya ha meza mu nzo yi nzambi zi biteki, nganunu kaabaka nsyamusu ko mu mayindu mandi, mu dya mbizi bezozo zi bakwe hananga minkayulu ku nzambi zi biteki e? 11 Ni hahoho, mpangi beyoyo yifwila Klisto, yilembolo ba na kiminu kisyamana, yaazimbala mu dyambu di nzayilu aku! 12 Bu luna hola masumu ku mpangi zeno, mpe bu luna fyetikisa mayindu mawu malebakana, ni ha ntadisi yi Klisto luna hola masumu. 13 Ni hahoho, tala ti bindya bina tesisa mpangi ani masakuba, naabwesa dya mbizi ko, mwanki na lembolo tesisa mpangi ani masakuba.