1 Zimpangi, meno nalendidi mu luzonzila ko bonso bantu baa na Mpeve yi Nzambi, kansi bonso bantu baa ha nza, bonso baala bafyoti mu kiminu mu Klisto. 2 Naluheeni mamvumina, kansi ka bindya bikoba ko, mu dyambu ti luketi lenda mu kindila byo ko. Kaati mu ntangu beyiyi, lwalendeeno mu kindila byo ko, 3 mu dyambu ti lwakidi bonso bantu ba nza beyiyi. Mpila mosi ti, lwakidi na musoki na mpaka ha kati dyeno, luna yena ko ti yeno lwakidi muntwadusulu yi bantu ba nza beyiyi, na luna dyatila mu ndyatulu yi kimuntu ko e? 4 Wumosi wuna ta ti: «Meno muntu wu Pawuli nidi», wuhiika ti: «Meno muntu wu Apolose nidi», luu kwandi bonso bantu bana dyatila mu kimuntu ko e?

5 Bwedi, Apolose nani kadi e? Na Pawuli nani kadi e? Bisadi binaani bi Nzambi tudi, bi kasadila mwanki lukwikila. Kadi muntu wuna sala kisalu kyandi bonso Mfumu kamuhaanina kyo. 6 Meno nakuna, Apolose wubondikila, kansi Nzambi kwandi kwe kudisanga. 7 Buna, yondowo wuna kuna na yondowo wuna bondikila, baa mfunu ko, kansi Nzambi kwandi kwe kudisanga wuu mfunu. 8 Yondowo wuna kuna na yondowo wuna bondikila kidede badi. Nzambi mbo kahaana ku kadi muntu musendo andi bonso buu kisalu kyandi. 9 Mu dyambu ti, yeto tukwe salanga kintwadi na Nzambi. Yeno mfuba yi Nzambi ludi na nzo yitungu ku Nzambi.

10 Bonso buu munkayulu wumpana Nzambi, meno natunga lufulu bonso kitungi kimbote. Bwabu, muntu wuhiika wuna tunga ha yulu lufulu. Kansi, bika kadi muntu kakikenga bonso bu kana tungila. 11 Mu dyambu ti kunaani muntu wulenda tunga lufulu luhiika, tala ti ka lo lutungu mu Yesu-Klisto ko. 12 Bahiika mbo batungila mu wola, palata hoti matadi mantalu. Bahiika mbo batungila mu bitungu, mu bititi hoti mu nyanga. 13 Kisalu ki kadi muntu kyaatoma yenika mu kilumbu ki mfundusu. Mu dyambu ti, kilumbu bekyokyo, tiya twaayenikisa kyo, mpe tiya twaalonkisa kisalu ki kadi muntu bonso bu kidi. 14 Tala ti kisalu kitunga muntu ha yulu lufulu, kihidi ku tiya ko, muntu wutunga kyo, waatambula musendo. 15 Kansi, tala ti kisalu kyandi kihidi ku tiya, yandi kaatambula musendo ko. Yandi bende waavulusu, kansi bonso muntu hyokidi mu milaka mi tiya.

16 Luzebi ko ti, yeno nzo-Nzambi ludi, mpe Mpeve yi Nzambi yikwe zakalanga mu kati dyeno e? 17 Tala ti muntu mwangisi nzo-Nzambi, Nzambi waamumwangisa. Mu dyambu ti nzo-Nzambi yilongo yidi, mpe, ni yeno luu nzo-Nzambi andi.

18 Muntu kakihunandi yandi bende ko: tala ti wumosi mu yeno wuna banzila ti ndwenga zii nandi bonso buu nza beyiyi, bika kakituka kilahuki, mwanki kaba muntu wundwenga. 19 Mu dyambu ti ndwenga zi nza beyiyi ni bulahuki ha ntadisi yi Nzambi. Mu dyambu ti wusonama: «Nzambi kwe bakanga bantu mu mutambu mu madyela mawu mambi.» 20 Wusonama dyaka ti: «Nzambi zebi mabanza ma bantu bandwenga, mpe zebi ti maa mfunu ko.» 21 Ni hahoho, muntu kalendi kisiika mu bantu ko. Mu dyambu ti, bimvimba byeno bidi. 22 Pawuli, Apolose hoti Sefase, nza, luzingu, lufwa, ntangu beyiyi hoti ntangu yina kwiza, bimvimba byeno bidi. 23 Kansi yeno luvwihulu ku Klisto mpe Klisto vwihulu ku Nzambi.