1 Tala ti wumosi mu yeno bakani na munandi, bwedi kalendi kwe mufundila ku bantu balembolo zaba Nzambi ha kibuka kye kwe mufunda ku balongo e? 2 Yeno luzebi ko ti balongo baafundisa nza e? Mpe tala ti ni mu yeno nza beyiyi yaafundusulu, bwedi luna lembinina kweno mu haana nzengolo mu mwa misamu mi fyoti-fyoti e? 3 Yeno luzebi ko ti yeto twaafundisa zimbazi e? Buna tulendi fundisa misamu mi luzingu belulu! 4 Bu lukwe banga na mbakani mu misamu mitadidi luzingu, mimfundisi mi lukwe bonganga, ni bantu bebobo dibundu kakwe yenanga ti bantu bampamba badi! 5 Nina zonzila bobo mu luyenisa nsoni. Bwedi, ha naani muntu wumosi wu ndwenga ha kati dyeno wulendi haana nzengolo ha kati di zimpangi zandi ko e? 6 Kansi bila nki mpangi kalendi fundisila mpangi nandi ha ntadisi yi balembolo ba minkwidi e?

7 Wukedika musamu wumbi wudi, bu lukwe fundasananga yeno na yeno. Bila nki lukwe lembolo vibidilanga bu bakwe luhidikanga misamu milembolo fwanakana e? Bila nki lukwe lembolo tambudilanga ti baluzyona kima e? 8 Kansi ni yeno lukwe hidikanga misamu milembolo fwanakana na lukwe zyonanga bima bi bahiika, mpe ku zimpangi zeno lukwe mye hidikanga! 9 Yeno luzebi ko ti bantu balembolo ba balunungu baabyadila fwa di kimfumu ki Nzambi ko e? Ka lukihunandi ko: yobobo bakwe sadilanga kindumba, bakwe sambilanga biteki, na bakwe sadilanga kinsuza, na babakala bakwe vukisanga nitu zawu yawu na yawu, 10 bamivi, bantu baa na nzinunu, minkolo mbungu, ba nga matoola, bakwe zyonanga bima bi banawu, baatambula fwa di kimfumu ki Nzambi ko. 11 Ni bwabobo mpe yeno bahiika luba ha kati dyeno. Kansi yeno baluvedisa, balusa ti luba bantu bavwihulu ku Nzambi na balusa bantu balunungu mu nkumbu yi Mfumu Yesu-Klisto na mu Mpeve yi Nzambi eto.

12 Lukwe tanga ti: «Nii na luve mu hidika misamu mimvimba!» Kansi mimvimba mii mfunu ko. «Nii na luve mu hidika misamu mimvimba», kansi naatambula muba ku nsye lutumu lu kani kima ko. 13 lukwe tanga dyaka ti: «Bindya bidi mu dyambu di moyo, na moyo mu dyambu di bindya», mpe Nzambi mbo kafukisa bya bibyole. Kansi nitu ka yihiduku mu dyambu di kindumba ko, yihiduku mu dyambu di Mfumu na Mfumu wudi mu dyambu di nitu. 14 Nzambi wufulukisa Mfumu mu bafwa, waatufulukisa yeto mpe mu bafwa mu lulendo lwandi.

15 Luzebi ko ti nitu zeno binama bi Klisto bidi e? Bwedi naabongila binama bi Klisto mu kitula byo binama mu sadila kindumba e? Kuba mpe! 16 Luzebi ko ti yondowo vukani na nsuza weka nandi nitu yimosi e? Wusonama ti: «Yababole baaba nitu yimosi.» 17 Kansi yondowo siidi kintwadi na Mfumu, weka mpeve yimosi nandi.

18 Tineeno kindumba! Masumu mamvimba malendi hidika muntu, madi mu kati di nitu andi ko, kansi yondowo sidi kindumba sumuni nitu yi yandi bende. 19 Yeno luzebi ko ti nitu eno nzo yi Mpeve Yilongo yidi e? Mpeve beyoyo ni Mpeve yiluhaana Nzambi. Lukivwidi yebende ko, 20 mu dyambu ti Nzambi wulusumba mu ntalu yiyingi. Buna kembisangeeno Nzambi mu nitu eno.