1 Zimpangi, natiidi lubambuka moyo, mu myo mi bwabwana zinkaka zeto mu ntangu yi Mose. Yawu bamvimba baba ku nsye lukengolo lu tuti, mpe bamvimba basabuka mubu. 2 Bamvimba babotoko mu Mose mu tuti na mu mubu, 3 bamvimba badya bindya bi kimpeve bi mutindu wumosi 4 mpe bamvimba banwa mamba ma kimpeve ma mutindu wumosi. Mu dyambu ti banwa mu tadi di kimpeve dyedi kwe yendingi nawu ha kimosi, mpe tadi bedyodyo diba ni Klisto. 5 Kansi babingi ha kati dyawu, baba bazolakana ku Nzambi ko, ni hahoho bafwila mu nsi yinkatu.

6 Misamu bemyomyo mi hidimina mwanki miba kifwani ku yeto, mpe tulembolo ba na nzinunu bonso ziba na zinkaka zeto. 7 Lukitukandi minsambidi mi nzambi zi biteki ko bonso bahiika ha kati dyawu. Mu dyambu wusonama ti: «Mukangu wuzakala mu dya na mu nwa, mpe wutelama mu sakana.» 8 Tusadilandi kindumba ko bonso busa bahiika ha kati dyawu, mpe mafunda makumole na tatu (23000) ma bantu mafwa mu kilumbu kimosi. 9 Tutontandi Klisto ko bonso busa bahiika ha kati dyawu, mpe bafwa nyoka bu zibata. 10 Luvungutandi ko bonso busa bahiika ha kati dyawu, mpe mbazi yi lufwa yi bafukisa.

11 Mpasi bezozo zi batudila mu lonka kifwani ku bahiika, mpe basonika myo mu tulwengisa, mu dyambu ti tuna zinga mu ntangu yi nsukunu. 12 Ni hahoho, yondowo wuna banza ti wutelama kadi, kakeba kwandi mu lembolo bwa.

13 Ku naani ntontolo zilubwididi zikwe lembolo bwidilanga bantu. Nzambi wukwikama kadi, mpe kaahaana luve ko ti ntontolo zihyoka ngolo zeno, kansi mu ntangu yi ntontolo, waalukubikila nzila yi lwaadukila, mwanki lulenda mu vibidila zo.

14 Ni hahoho, zimpangi zani zizola, tineeno mu sambila zinzambi zi biteki. 15 Nina luzonzila bonso bantu baa na madyela, fyongonineeno yebende mi nina ta. 16 Mbungu yi lusakumunu yi tukwe sakumunanga, yii kintwadi na menga ma Klisto ko e? Dimpa di tukwe bukunanga, dii kintwadi na nitu yi Klisto ko e? 17 Dimpa dimosi kwandi didi, yeto bamvimba nitu yimosi kwandi tudi, mu dyambu ti dimpa dimosi kwandi tukwe dyanga.

18 Taleeno ba-Isaeli: Yobobo bakwe dyanga bibulu bi baheeni bonso minkayulu, baa kintwadi ko na Nzambi wu bakwe yokilanga munkayulu ha ziku e? 19 Nki nalendi ta e? Mbizi yi baheeni munkayulu ku nzambi zi biteki mfunu yidi, hoti nzambi yi kiteki mfunu yidi e? 20 Kaani, ebu nina ta: bima bikwe haananga balembolo ba Bayudayo mu minkayulu mye yoka, ku mpeve zimbi bakwe bye haananga, kansi ka kuu Nzambi ko. Ntiidi ko ti luba kintwadi na mpeve zimbi. 21 Yeno lulendi nwa ha kimosi ko mbungu yi Mfumu na mbungu yi mpeve zimbi, mpe lulendi dya ha kimosi ha meza ma Mfumu na ha meza ma mpeve zimbi ko. 22 Hoti, yeto tutiidi mu sa ti Mfumu kaba na kimpala mu yeto e? Nganunu yeto tuvudi ngolo na yandi e?

23 «[Nii] na luve mu hidika misamu mimvimba!» Kansi mimvimba mii mfunu ko. «[Nii] na luve mu hidika misamu mimvimba», kansi mimvimba mikwe tunganga ko. 24 Muntu kasosandi ndandu yi yandi bende ko, kansi kasosa ndandu yi wuhiika.

25 Dyeeno bima bimvimba bi bakwe yadikanga ha zandu, kansi lukifulandi kyuhu kilendi fyetikisa mabanza meno, 26 mu dyambu ti wusonama: «Butoto na bima bimvimba bii ha butoto bivwihulu ku Mfumu.»

27 Tala ti muntu lembolo ba munkwikidi wulutumisi ku ndambisa, mpe tala ti lutambudi mu kwenda, dyeeno bimvimba bi bana luhaana, kansi lufulandi kyuhu mu lembolo fyetikisa mabanza meno. 28 Kansi tala ti muntu wulutedidi ti: «Mbizi beyiyi mbizi yi haanu ku nzambi zi biteki yidi», ludyandi ko mu dyambu di yondowo wulutedidi musamu na mu dyambu di mabanza meno. 29 Nina zonzila mabanza maku eha ko, kansi ma muntu wuhiika.

«Bila nki, kimpwanza kyani kyafundusu ku mabanza ma muntu wuhiika e? 30 Tala ti nina vutula matondo ku Nzambi mu byo bi nina dya, bila nki luna mvwezila mu bindya bi mvutudidi matondo e?»

31 Ni hahoho, ni ludya, ni lunwa hoti kima ni kima ki luna sa, seeno mimvimba mu kembisa Nzambi. 32 Lubandi bantu bakwe tesisanga masakuba ku Bayudayo, ku Bangeleke, mpe ku Dibundu di Nzambi ko. 33 Dyatileeno bonso meno: nina sa ngolo mu yangidika bamvimba mu bima bimvimba, nakwe sosanga mambote ma mebende ko, kansi mambote ma bantu babingi, mwanki bavuuka.