1 Mpangi zani, mu myo mitadidi misamu mi kimpeve, natiidi ko luba ku nsye bunzimbu. 2 Lutomini zaba ti, buna lwabedi minkwikidi ko, luba ku nsye luntwadusulu yi zinzambi zi biteki zikwe lembolo zonzanga. 3 Ni hahoho nina we luteela ti: kuu muntu ko wuna twadusu ku Mpeve yi Nzambi lendi ta ti: «Yesu wusingu kadi!» Mpe kuu muntu ko lendi ta ti: «Yesu Mfumu kadi!» Tala ti kana twadusu ku Mpeve Yilongo ko.

4 Minkayulu miswasana midi, kansi Mpeve yimosi kwandi yikwe haananga myo. 5 Bisalu bibingi bidi, kansi Mfumu yimosi kwandi tukwe sadilanga. 6 Nsadulu zizingi zidi, kansi Nzambi yayoyo kwandi yikwe salanga ku bamvimba mu mimvimba. 7 Kansi, kadi muntu wutambula munkayulu wu Mpeve mu dyambu di bumbote bu bantu bamvimba. 8 Mpeve wuhaana ku wumosi mpova yi ndwenga, mpe Mpeve beyoyo kwandi wuhaana ku wuhiika mpova yi nzayilu. 9 Mpeve wuhaana ku wumosi kiminu, mpe Mpeve beyoyo kwandi wuhaana ku wuhiika minkayulu mye nyakisina zimbevo. 10 Ku wumosi lulendo lwe sa bimangu, ku wuhiika munkayulu we bikula, ku wuhiika dyaka munkayulu we swasisa zimpeve, ku wuhiika munkayulu we zonza zindinga zi mumpila-mumpila, ku wuhiika lulendo mu bangula zindinga. 11 Kansi Mpeve yimosi kwandi yikwe hidikanga misamu bemyomyo mimvimba, kwe haananga ku kadi muntu munkayulu wuswaswana bonso bu yitiidi.

12 Nitu yimosi kwandi yidi, kansi yii na binama bibingi, mpeleko binama bi nitu bibingi bidi, kansi nitu yimosi kwandi bikwe tunganga, bwabobo mpe buu Klisto. 13 Mu dyambu ti, yeto bamvimba mu Mpeve yimosi tubotokolo mu tunga nitu yimosi: Bayudayo hoti Bangeleke, mindongo hoti bantu bakimpwanza, bamvimba tuu bafuluka mu Mpeve yimosi.

14 Nitu yii na kinama kimosi kwandi ko, kansi na binama bibingi. 15 Tala ti kuulu kuteedi ti: «Bu ndembolo ba kooko, navwihulu ku nitu ko», kadi mu bobobo, kasidi dyaka kinama ki nitu ko e? 16 Tala ti kutu diteedi ti: «Bu ndembolo ba diisu, navwihulu ku nitu ko», kadi mu bobobo, kasidi dyaka kinama ki nitu ko e? 17 Tala ti nitu yimvimba diisu kwandi didi, bwedi muntu kalendi yuwila e? Tala ti nitu yimvimba kutu kwandi didi, bwedi muntu kalendi yuwila mfuku e? 18 Kansi Nzambi wutuula kadi kinama mu nitu bonso buu luzolo lwandi. 19 Tala ti binama bimvimba bii kwandi kinama kimosi, bwedi nitu yiketi beela e? 20 Buna, binama bibingi bidi, kansi nitu yimosi kwandi yidi.

21 Diisu dilendi ta ku kooko ko ti: «nii naaku nsatu ko», hoti mutu kata ku maalu ti: «nii neeno nsatu ko!» 22 Bumosi mpe, bitini bi nitu bikwe yenikanga ti bilebakana bidi, mfunu bidi, 23 mpe byo bi tukwe yenanga ti bii mfunu yiyingi ko, bya tukwe toma haananga buzitu. Mpe binama bi tukwe yenanga nsoni ha meso ma bantu, bya tukwe vulanga mu sweka, 24 kansi byo bilembolo ba nsoni ha meso ma bantu, bii mfunu mu sweka ko. Nzambi bo kahidikila nitu mu toma haana nzitusu ku binama bi nitu, bilembolo ba mfunu yiyingi, 25 mwanki nitu yilembolo ba na nkabani, kansi binama bisalasana byawu na byawu. 26 Tala ti kinama kimosi kina yena mpasi, binama bimvimba bina yena mpasi ha kimosi nandi. Tala ti kinama kimosi kina zitusu, binama bimvimba bina yangalala ha kimosi na yandi.

27 Yeno nitu yi Klisto ludi, mpe kadi muntu kinama ki nitu beyoyo kadi. 28 Nzambi wutuula ntete mu Dibundu zintumwa, ha nzole mimbikudi, ha tatu milongisi, mboki bakwe sanga bimangu, baa na minkayulu mye nyakisa zimbevo, mye sadisa bantu bahiika, na mye twadisa, mye zonza zindinga zi mumpila-mumpila. 29 Nganunu bamvimba zintumwa zidi e? Bamvimba mimbikudi midi e? Bamvimba milongisi midi e? Bamvimba bimangu bakwe sanga e? 30 Nganunu bamvimba minkayulu mye nyakisa zimbevo mii nawu e? Bamvimba zindinga zi mumpila-mumpila bakwe zonzanga e? Bamvimba zindinga bakwe bangulanga e? 31 Ni hahoho, beeno na nsatu yi minkayulu mi vudi mfunu. Kansi nina lulonka bwabu nzila yivudidi zimvimba.