1 Bwedi nii kimpwanza ko e? Nii ntumwa ko e? Nayena Yesu-Klisto Mfumu eto ko e? Yeno ludi ndandu yi kisalu kyani mu Mfumu ko e? 2 Tala ti bahiika bana bisa ti meno ntumwa nidi, kansi mwanki kuu yeno ntumwa nidi, mu dyambu ti yeno kimbangi kyani kina lonka kisalu kyani ki kintumwa mu Mfumu.

3 Mvutu ani ku yobobo bana mfundanga, ni eyi: 4 Bwedi, tuu na luve mudya na munwa mu kisalu kyeto ko e? 5 Bwedi, tuu na luve ko mu nata mu nzyetolo mpangi yi mukento muklisto, yaaba bonso mukazi eto, bonso bukwe sanga zintumwa zihiika, na zimpangi zi Mfumu na Sefase e? 6 Bwedi, yeto kwandi, Banabase na meno, tu lembolo ba na luve mu lembolo sala mu baka bye dya e? 7 Nani kwe salanga kisalu ki kimbulu-mbulu nakwe kifutanga yandi bende e? Nani kwe salanga mfuba yi vinu nakwe lembolo dya mbutu e? Nani kwe kenganga kamba di bibulu nakwe lembolo nwa mamvumina ma bibulu e?

8 Kadi mu kimuntu kwandi nina teela musamu bewuwu e? Misiku mina ta bo ko e? 9 Mu dyambu ti wuu wusonama mu misiku mi Mose ti: «kukangandi munwa wu ngombe yina kwe dyati mbutu mwanki zi keloka.» Bwedi luna banzila ti Nzambi kwe kikwamisanga mu dyambu di zingombe e? 10 Ka mu dyambu dyeto ko kazonzila bobo e? Ninga, mu dyambu dyeto basonikina musamu bewuwu. Bika yondowo wuna fundumunu butoto na yondowo wuna tuta bele (mu hambula mbutu na bititi) basala na kivuvu kye baka kikunku kyawu ki nyonzokolo. 11 Tala ti yeto tukuna mbutu zi kimpeve ha kati dyeno, kadi musamu wuwunene wudi mu tambula ndambu bima mu bimvwama byeno e? 12 Tala ti bantu bahiika baa na luve mu bonga bima ku yeno, yeto tuvudidi mu ba na luve lwe bonga bima ku yeno e?

Kansi yeto tusadila luve belolo ko. Tukwe vibidilanga mimvimba mwanki tulembolo sa kikaku mu Musamu Wumbote wu Klisto. 13 Yeno luzebi ko ti bantu bakwe salanga mu kati di nzo-Nzambi, mu nzo-Nzambi mpe bakwe diilanga, mpe yobobo bakwe salanga ha ziku di bakwe yokilanga minkayulu, kikunku kyawu ha ziku bakwe bakilanga kyo e? 14 Bumosi mpe, Mfumu wuhaana ntumunu ku yobobo bakwe samunanga Musamu Wumbote ba bakilanga bindya mu Musamu Wumbote.

15 Kansi meno, nalombidi nakani kima kii naani luve mu sadila ko, mpe nsonikini musamu bewuwu ko, mwanki lumpidikila bo, mu dyambu ti buvudidi bumbote bu nafwidi kwani na bu bankatudi musamu bewuwu we sila mayama. 16 Ndendi kitumpidika ko, bu nina samuna Musamu Wumbote. Mu dyambu ti kisalu bekiki kukwika bansa kyo. Kyadi kuu meno tala ti nina samuna Musamu Wumbote ko! 17 Tala ti mu mutima wumosi nina sadila kyo, buna naatambula musendo, kansi tala ti nina sadila kyo mu kukwikisa, buna kyeka kizitu bantwikidi. 18 Buna bwabu mufutu ani ni nki e? Ni kyese kye samuna mumpamba Musamu Wumbote, wulembolo sadila luve lwani mu baka bima bu nina samuna Musamu Wumbote bewowo.

19 Kimpwanza nidi, mpe nii mundongo wu muntu ko, kansi nakisiidi mundongo wu bantu bamvimba, mwanki natoma baka bantu babingi mu Klisto. 20 Ha kati di Bayudayo, naba bonso Muyudayo, mwanki nabaka Bayudayo. Ha kati di yobobo baa ku nsye misiku mi Mose naba bonso muntu wuu ku nsye misiku, mpeleko mebende nii ku nsye misiku ko, mwanki nabaka yobobo baa ku nsye misiku. 21 Bumosi mpe, ha kati di yobobo balembolo ba ku nsye misiku, bonso yawu, naba ti nii na misiku bemyomyo ko, mwanki nabaka yobobo balembolo baa ku nsye misiku. Bu nata ko ti, nakwe tumiminanga misiku mi Nzambi ko, mu dyambu ti meno mpe nii ku nsye misiku mi Klisto. 22 Ha kati di yobobo baa balebakana mu kiminu, naba bonso muntu wulebakana, mwanki nabaka balebakana. Nahidika misamu mimvimba mifwanakani na bantu bamvimba, mwanki navuukisa mwa ndambu yi bantu. 23 Mpe nakwe hidikanga misamu mimvimba bemyomyo, mu dyambu di Musamu Wumbote, mwanki nabaka musendo wu bansila nsilulu.

24 Yeno luzebi ko ti yobobo bakwe nookanga ntiinu ha kibuka ki bakwe nookinanga ntiinu, yawu bamvimba bakwe nookanga, kansi wumosi kwandi kwe nunganga. Nookeeno mwanki lununga. 25 Yobobo bamvimba bakwe nookanga ntiinu, nzengolo bakwe bonganga mu lembolo bwesa hidika misamu mihiika. Bakwe silanga bobo, mwanki babaka mpu yi nungunu yikwe bebanga (bihanga), kansi yeto tunookeeno mu baka mpu yi nungunu yikwe lembolo bebanga (bihanga). 26 Ni hahoho, meno nkwe nookanga bonso-bonso ko, nii bonso kinwani mu nkome, mpe nkwe windanga nkome honso-honso ko. 27 Kansi, nitu ani ya nkwe toma yenisanga mpasi, mpe ya nkwe yaalanga, mwanki mebende nalembolo hungulu bu namanisi mu samuna Musamu Wumbote ku bahiika.