1 Soseeno ntete luzolo. Beeno na nsatu yiyingi yi minkayulu mi Mpeve, sungula munkayulu we bikula. 2 Muntu wukwe zonzanga ndinga zinzenza, kakwe zonzanga ku bantu ko, kansi ku Nzambi, mu dyambu ti kuna mubakula muntu ko, mpe mu kimpeve kakwe zabikisilanga mansweki. 3 Kansi yondowo kwe bikulanga, ku bantu kakwe zonzanga mu bakudisa mu kiminu, mu basyamisa na mu babomba. 4 Muntu wukwe zonzanga mu ndinga yi nzenza, kwe kudisanga kiminu kyandi, kansi yondowo kwe bikulanga, Dibundu kakwe kudisanga mu kiminu.

5 Natiidi ti yeno bamvimba luzonza zindinga zinzenza, kansi vula-vula kwe bikulanga. Yondowo kwe bikulanga, vuvudi mfunu na yondowo kwe zonzanga zindinga zinzenza, kadi ti kuba na muntu waahaana mbangudulu, mwanki Dibundu dibaka nsyamusunu. 6 Bwabu zimpangi zani, bwedi nabeela mfunu tala ti nizidi kuu yeno, mpe nina luzonzila mu ndinga yinzenza, ha kibuka kye lunatina musamu wu ntambudi ku Nzambi, wu nzayilu, wu mbikudulu hoti wu ndongosolo e?

7 Tala ti bima bikwe lembolo ningananga, bikwe duukisanga muningu bonso hungu, hoti kisanzi, tala ti bina haana miningu mi swaswana ko, bwedi bazabila muningu wuna sika kadi kima e? 8 Tala ti kulumenta dina duukisa muningu wumbi, buna nani waakubama mu nwana mvita e? 9 Bumosi mpe kuu yeno: tala ti ludimi lweno luna duukisa misamu mimbote ko, bwedi baazabila mi luna ta e? Kuzonza ku mpamba luna zonza. 10 Ndinga zinzenza zizingi zii mu nza, kansi, kuu ndinga yilembolo ba na mbangudulu andi ko. 11 Tala ti nazebi mbangudulu yi ndinga ko, nzenza naaba kuu muntu wuna zonza, mpe yondowo wuna zonza waaba nzenza kuu meno. 12 Ni hahoho, yeno mpe bu luu na nsatu yi minkayulu mi Mpeve, soseeno mu ba na myo, mu kitezo kivudidi, myo mikwe kudisanga Dibundu.

13 Ni hahoho, yondowo wuna zonza mu ndinga yinzenza, bika kalomba ku Nzambi ka muhaana munkayulu we bangula. 14 Tala ti nina sambila mu ndinga yinzenza, mpeve ani yii mu kati di lusambulu, kansi madyela mani mana sa kima ko. 15 Nki mfweti sa e? Naasambila na mpeve ani, kansi naasambila mpe na madyela mani. Naayimbila na mpeve ani, kansi naayimbila mpe na madyela mani. 16 Tala ti wuna vutula matondo ku Nzambi mu mpeve aku kwandi, bwedi yondowo wuna kuyuwa wuu ha bundu kavutudila «Ameni» mu lusambulu lwaku lumvutudulu yi matondo e? Mu dyambu ti kazebi ko misamu mi wuna ta. 17 Ninga, wuna sambila lusambulu lumbote lu mvutudulu yi matondo, kansi wuhiika lwaamukudisa mu kiminu ko.

18 Nina tonda Nzambi bukwe zonzanga ndinga zinzenza kuhyoka yeno bamvimba. 19 Kansi, mbote na zonza mu Dibundu mpova zitanu zi balendi bakula, mwanki na syamisa bahiika, na mu zonza mafunda kumi (10000) ma mpova mu ndinga zinzenza.

20 Mpangi zani, lubandi na nzonzolo bonso zi baala bafyoti ko. Kansi mu misamu mimbi, beeno bonso mwa baala bansombe, kansi mu mayindu, beeno bantu bakula. 21 Wusonama mu misiku ti:

«Mu bantu bandinga zihiika, na mu minwa mi banzenza naazonzila ku mukangu bewuwu,

mpe kati nina sadila bobo, baanyuwila ko.»

Mfumu teedi bobo.

22 Ni hahoho, ndinga zinzenza zii kidimbu ko ku minkwikidi, kansi ku balembolo ba minkwikidi, kidimbu kidi. Mbikudulu kii kidimbu ko ku balembolo ba minkwikidi, kansi ku minkwikidi, kidimbu kidi.

23 Tala ti Dibundu dimvimba diyonzamani huma hamosi, mpe bantu bamvimba bana zonza ndinga zinzenza, mboki bantu balembolo we zaba hoti yobobo balembolo ba minkwikidi bakotidi hoho, nganunu baata ko ti kulahuka luna lahuka e? 24 Kansi tala ti bamvimba bana bikula, mpe ti muntu wumosi wulembolo ba munkwikidi hoti muntu wulembolo zaba kotidi, buna muntu bewowo waabakula masumu mandi, mpe waafundusu mu mimvimba mi kana yuwa, 25 buna mansweki ma mutima andi mazabakana, na wafukama luse ha nsi mu sambila Nzambi, bu kaata ti: «wukedika, Nzambi wuu ha kati dyeto!»

26 Mpangi zani, nki bwabu tuna sa e? Mu ntangu yi lukwe yonzamanga, wumosi mu yeno waayimbila mukunga, wuhiika waalonga, wuhiika dyaka waabikula, wumosi waazonza ndinga yinzenza, wuhiika waabangula. Bika mimvimba bemyomyo miba ntungulu yi Dibundu! 27 Tala ti kuu na bantu bana zonza ndinga yinzenza, bika bole hoti batatu bazonza, kadi muntu na kilokola kyandi, mpe muntu wuhiika kabangula. 28 Tala ti kunaani muntu wabangula, bika bahuza napii ha kati di lukutukunu, na kazonza ku yandi bende, mpe na Nzambi. 29 Ku yobobo bana bikula, bika bole hoti batatu bazonza, na bahiika bafyongonina mi bana ta. 30 Tala ti muntu wuhiika wuu hoho tambudi mbikudulu, bika yondowo wuna zonza kaba napii. 31 Yeno bamvimba lulendi bikula kweno, kansi wumosi-wumosi, mwanki bantu bamvimba balongoka mpe basyamusu. 32 Mpeve zi mimbikudi zikwe tumiminanga mimbikudi, 33 mu dyambu ti, Nzambi kaa Nzambi yi mvwanzi ko, kansi yi kiyenge.

Bonso mu Mabundu mamvimba ma balongo, 34 bika bakento beno bahuzanga napii mu zinkutukunu, mu dyambu ti baa na luve mu zonza ko, kansi bafweti tumama bonso buna ta misiku. 35 Tala ti batiidi mu zaba musamu, bafuula babakala bawu ku nzo, mu dyambu ti, buu bumbote ko mukento kazonza ha kati di Dibundu.

36 Bwedi, luna banza ti Mambu ma Nzambi ku yeno mafuma e? Hoti yeno hika lutambula mo e? 37 Tala ti muntu wuna banzila ti mumbikudi kadi hoti munkayulu wu Mpeve wuu nandi, bika kazaba ti misamu mi nina lusonikina ntumunu yi Mfumu yidi. 38 Tala ti kazebi wo ko, Nzambi mpe ka muzebi ko!

39 Ni hahoho, mpangi zani, beeno na nsatu yiyingi yi munkayulu we bikula, mpe lukakidilandi bantu mu zonza ndinga zinzenza ko, 40 kansi bika mimvimba mihilama bonso bufwanakani, mpe mu ludedomo.