20 Bu lukwe kutakananga, nina yena ti ka bindya bi Mfumu ko lukwe dyanga, 21 mu dyambu ti, bu lukwe zakalanga ha meza, kadi muntu kwe bingilanga mu bonga bindya bi yandi bende. Ni hahoho lukwe belanga ti, wumosi wuu na nsatu, kansi wuhiika wuna kolo. 22 Kadi, luu na zinzo mu dya na mu nwa ko e? Hoti, Dibundu di Nzambi luna vweza, mpe lutiidi mu fwisa nsoni yobobo balembolo ba na kima e? Nki nalendi luteela e? Nganunu lutiidi na lusiika e? Mu musamu bewuwu, nina lusiika ko.
23 Kadi ndongosolo yi nina lulonga, ku Mfumu natambula yo: Mfumu Yesu, mu mpimpa beyoyo yi bamukanga, wubonga dimpa, 24 bu kamana vutula matondo, wubukuna dyo na wuta ti: «Bongeeno na dyeeno, yi ni nitu ani yihaanu mu dyambu dyeno. Sangeeno bobo mu mbambukilanga moyo.» 25 Wusa bumosi mpe na mbungu, bu bamana dya, wuta ti: «Mbungu beyiyi ni luwawanu lumoona mu menga mani ma ba tengola mu dyambu dyeno. Sangeeno bobo mu mbambukilanga moyo ntangu zimvimba zi luna nwa yo.» 26 Mu dyambu ti, ntangu zimvimba zi luna dya dimpa bedidi na zi luna nwa mbungu beyiyi, luna samuna lufwa lu Mfumu natee bu kana kwiza.
27 Ni hahoho, yondowo wuna dya dimpa bedyodyo hoti wuna nwa mbungu yi Mfumu na mbeelo yilembolo lunga, waasa disumu ha ntadisi yi nitu na menga ma Mfumu. 28 Ni hahoho, bika kadi muntu kakifyongonina, teekila kadya dimpa na kanwa mbungu, 29 kadi yondowo wuna dya na wuna nwa wulembolo zaba ti yiyiyi ni nitu yi Mfumu, wuna dya na wuna nwa mfundusu mu yandi bende.