1 Tala bonso bubela kinkulu ki kanda di Yesu-Klisto, mutekolo wu Davidi, Davidi yandi bende wuba mutekolo wu Abalahami.

2 Abalahami wubuta Isaaki, Isaaki wubuta Yakobi, Yakobi wubuta Yuda na zimpangi zandi mpe,

3 Yuda wubuta baala bole na Tamali: Falesi na Zala, Falesi wubuta Heselomi, Heselomi wubuta Alami,

4 Alami wubuta Aminadabi, Aminadabi wubuta Nasoni, Nasoni wubuta Salamoni,

5 Salamoni wubuta na Lahabi, Bozi. Bozi wubuta na Luti, Obedi. Obedi wubuta Yese,

6 Yese wubuta ntinu Davidi.

Ntinu Davidi wubuta na mukento wu Uli, Solomo.

7 Solomo wubuta Loboami, Loboami wubuta Abia, Abia wubuta Asafi,

8 Asafi wubuta Yosafati. Yosafati wubuta Yolami. Yolami wubuta Oziya,

9 Oziya wubuta Yoatami, Yoatami wubuta Akazi, Akazi wubuta Ezekiase,

10 Ezekiase wubuta Manase, Manase wubuta Amoni, Amoni wubuta Yosiase,

11 Yosiase wubuta Yekoniani na zimpangi zandi, mu ntangu yi banata bantu ba Isayeli mu kinanga ku nsi yi Babiloni.*. Kinanga ki ba-Isaeli ku nsi yi Babiloni.

12 Bu bamana nata bantu ba Isaeli ku nsi yi Babiloni, kumanima, Yekoniani wubuta Salatieli, Salatyeli wubuta Zolobabeli,

13 Zolobabeli wubuta Abiwudi, Abiwudi wubuta Eliakimi, Eliakimi wubuta Azoli,

14 Azoli wubuta Sadoki, Sadoki wubuta Akimi, Akimi wubuta Eliwudi,

15 Eliwudi wubuta Eleazali, Eleazali wubuta Matani, Matani wubuta Yakobi,

16 Yakobi wubuta Yosefi, mulumi wu Maliya, ngudi yi buta Yesu, wu bakwe tumisinanga ti Klisto.

17 Lutangu lu zimbandu kumi na ya ziba kutonina ku Abalahami natee ku Davidi, mpe mbandu kumi na ya kutonina ku Davidi natee mu nkwendolo awu ku kinanga ku nsi yi Babiloni, mboki mbandu kumi na ya mu ntangu yi baba ku kinanga natee mbutukulu yi Klisto.

18 Mbutukulu yi Yesu-Klisto ebu yi beela. Maliya, ngudi andi, wutambula nsilulu yi makwela ku Yosefi, kansi tekila bazakala nzo yimosi, wuyiza baka zimi mu lulendo lu Mpeve Yilongo. 19 Yosefi, mulumi andi, wuba muntu wuludedomo na katya mu muvweza ha meso ma bantu ko, wubaka makani me kabikisa makwela mu kinsweki. 20 Bu kedi yindulanga bobo, mbazi yimosi yi mfumu yiyiza muyenikina mu ndozi, na yi muteela ti: «Yosefi, mwana wu Davidi, kuyenandi bunkuta mu kwela Maliya ko, mu dyambu ti mu lulendo lu Mpeve Yilongo ka bakidi zimi. 21 Mwana wu bakala kaabuta, nkumbu yi Yesu waamuhaana, mu dyambu ti yandi waakuula bantu mu masumu mawu.*»

22 Misamu mimvimba mihilama bonso Mfumu kateela myo mu munwa wu mumbikudi ti:

23 «Tala, Ndumba yilembolo teka hilulu yaabaka zimi, na waabuta mwana wu bakala.

Nkumbu yi Emanueli baamuhaana.*.»

Yina mbangudulu «Nzambi wu neto.»

24 Yosefi bu kavumbuka, wuhidika mimvimba bonso bu muteela mbazi yi Mfumu, na wubonga mukento na wumutuula mu nzo andi. 25 Kansi kavukisa mfulu nandi ko natee bu kabuta mwana, wu kaahaana nkumbu yi Yesu.