1 Kimfumu ki Mazulu kyaafwanakana bonso ndumba kumi zi bonga minda myawu mu kwe bwana kikwedi. 2 Batanu ha kati dyawu baba bizengi mpe batanu bahiika baba na madyela. 3 Ndumba zi bizengi babonga minda myawu, kansi banata mazi ko, 4 yobobo baba na madyela, babonga minda myawu mpe banata mazi mu mwa zimbwata. 5 Kikwedi bu kazingila mu kwiza, ndumba zimvimba zibaka tolo, ni zilambalala. 6 Mu kati-kati di mpimpa, ndinga yi yuwakana: "kikwedi yanduwu wizidi! Duukeeno mu kwe mubwana!" 7 Buna ndumba zimvimba zi vukumuka mpe zi kubika minda myawu. 8 Ndumba bezozo zi bizengi ziteela ku ziba na madyela ti: "Tuhaaneeno mwa ndambu yi mazi meno, mu dyambu ti minda myeto mitonini mu zima!" 9 Kansi ndumba zimadyela zibateela ti: "Kaani, ma tulungila ko mu yeno na yeto. Bufweni lwenda lusumba ku yobobo bakwe tekisanga mo." 10 Mu ntangu yi bayenda mu kwe me sumba, kikwedi kisala hingani. Ndumba za zitanu ziba zikubama zikota nandi mu kati di nzo yi mukembo wu makwela, na bakanga mwelo. 11 Ku manima, ndumba zihiika zitula na babulana ti: "Mfumu, Mfumu, tuzibudila!" 12 Kansi kikwedi kibavutudila ti: "Kedika nina luteela, naluzebi ko." 13 Yesu wuta ti: Buna kayeno meso, mu dyambu ti luzebi kilumbu na kilokola ko.

14 Kimfumu ki mazulu kifwanakani bonso muntu wumosi, wukubama mu kwenda ku nzyetolo, na wutumisa mindongo myandi mu basisila mvwilu andi. 15 Wuhaana ku wuntete talanta* zitanu, zole ku wuhiika, mpe yimosi ku wu mitatu, bonso bubela ngolo zi muntu-muntu, mboki wuyenda ku nzyetolo. 16 Yondowo wu baka talanta zitanu wuyenda butisa zo na wubaka ndandu yi talanta zitanu zihiika. 17 Bumosi mpe ku yondowo wu baka talanta zole, wubaka ndandu yi talanta zole zihiika. 18 Kansi ku yondowo wu baka talanta yimosi, wuyenda timuna bulu ha butoto na wusweka talanta yi mfumu andi.

19 Bilumbu bibingi bihyoka, kumanima, mfumu yi mindongo wuvutuka, na wubafuula mu zaba bwedi basadidi mbongo bezozo. 20 Yondowo wu baka talanta zitanu, wumutwadila talanta zitanu zihiika na wumuteela ti: "Mfumu, talanta zitanu wusala nsisila, zibutidi ndandu yi talanta zitanu zihiika." 21 Mfumu andi wumuteela ti: "Bumbote siidi! Mundongo wumbote wudi na wukwikama! Mu dyambu ti bedi wukwikama mu bima bifyoti, bwabu nina kuhaana bivudidi. Yiza wuyangalala kintwadi na mfumu aku." 22 Yondowo wu baka talanta zole, wuyiza na wumuteela ti: "Mfumu, talanta zole wusala nsisila, tala, zibutidi ndandu yi talanta zole zihiika." 23 Mfumu andi wumuteela ti: "Bumbote siidi! Mundongo wumbote wudi na wukwikama! Mu dyambu ti bedi wukwikama mu bima bifyoti, bwabu nina kuhaana bivudidi. Yiza wuyangalala kintwadi na mfumu aku." 24 Mboki yondowo wu baka talanta yimosi, wuyiza na wumuteela ti: "Mfumu, meno nzebi ti ngeye muntu wumbalu wudi: ngeye kwe yonzikanga ho ha wulembolo kuna, mpe kwe totanga ho ha wulembolo mwanga. 25 Bunkuta nayeni, ni nayenzi sweka talanta aku ku nsye butoto. Buna, bonga byaku bi wuvwidi." 26 Mfumu andi wumuteela ti: "Mundongo wumbi na wukilenga, ngeye zebi ti nakwe yonzikanga bima ho ha na lembolo kuna, mpe nakwe totanga ho ha na lembolo mwanga. 27 Bila nki wulembolo tudila mbongo zani mu nzo yi kiswekolo ki mbongo, nganunu bu mvutukidi za naketi bakila ndandu bu naketi bonga zo. 28 Muzikeeno talanta beyoyo yi nandi, mpe haneeno yo ku yondowo wuna talanta kumi. 29 Ni hahoho, mbo bahaana ku yondowo teekidi na bima, na wuna ba na byo bibingi, kansi yondowo lembolo ba na kima, mbo ba muzika mpe kyo kiteekidi nandi. 30 Nganunu mundongo wumpamba bewuwu, mutubeno ku mbazi ku mpimpita yina bokoboko. Kwakoko kwaaba bidilu na nkwetosolo yi meno."

31 Mu ntangu yaakwiza Mwana Muntu mu nkembo andi, ha kimosi na zimbazi zimvimba, waazakala ha kyandu ki kintinu kyandi kinkembo. 32 Makanda mamvimba ma bantu ma ha butoto maayonzama ha ntadisi andi, na waahambisa mu ndambu zole bonso mimvungi bu mikwe hambisilanga mameme na zinkombo, 33 waatuula mameme ku kooko kwandi ku lubakala, na zinkombo ku kooko kwandi ku lumoso. 34 Buna ntinu waata ku yobobo baaba ku kooko kwandi ku lubakala ti: "Yizeno, yeno basakumunu ku Tata ani, mpe tambuleeno Kimfumu ki kalukubikila tuka mbadukulu yi nza. 35 Mu dyambu ti nabedi na nsatu, yeno lumpeeni bindya, nabedi na mpwila yi mamba, yeno lumpeeni mamba me nwa, nabedi nzenza, yeno lumbweni, 36 nabedi mpene, yeno lundwikidi, nabedi wubeela, yeno lunsadisi, nabedi mu boloko, yeno luyizidi mu ntala." 37 Bantu balunungu baamuvutudila ti: "Mfumu, nkye ntangu tukuyeni bu wubedi na nsatu, mboki tukuheeni bindya e? Hoti wubedi na mpwila yi mamba, mboki tukuheeni mamba me nwa e? 38 Nkye ntangu tukuyeni nzenza, mboki tukubweni e? Hoti wubedi mpene, mboki tukulwikidi e? 39 Nkye ntangu tukuyeni wubeela, hoti mu boloko, mboki tuyizidi mu kutala e?" 40 Ntinu waabavutudila ti: "Kedika nina luteela, bu luhidikidi bo ku wumosi mu mwa baala bebaba bafyoti, hoti ku wumosi mu zimpangi zani, ku meno luhidikidi bo."

41 Mboki waata ku yobobo baaba ku kooko kwandi ku lumoso ti: "Lunkatukila, yeno bantu basingu! Yendeeno ku tiya tu mbungulu tu mimvu ka mimvu tubakubikila nkadyampemba na zimbazi zandi. 42 Mu dyambu ti, nabedi na nsatu, kansi lumpeeni bindya ko, nabedi na mpwila yi mamba, kansi lumpeeni mamba me nwa ko, 43 nabedi nzenza, kansi lumbweni ko, nabedi mpene, kansi lundwikidi ko, nabedi wubeela, na mu boloko, kansi luyizi ntala ko." 44 Buna baamuvutudila ti: "Nkye ntangu tukuyena wuba na nsatu, hoti na mpwila yi mamba, wuba nzenza hoti mpene, wuba wubeela hoti mu boloko, na tulembolo ku sadisa e?" 45 Ntinu waabavutudila ti: "Kedika nina luteela, tala ti luhidikidi bo ko ku wumosi mu mwa baala bebaba bafyoti, kuu meno lulembolo bwe hidika." 46 Mpe yababa, baatambula kitumbu ki mimvu ka mimvu, kansi bantu balunungu, baatambula luzingu lu mimvu ka mimvu.»