1 Bafalisi na basaduki bayiza kubeela Yesu mu mutonta, na bamulomba ka balonka kidimbu kyaafuma ku yulu. 2 Kansi Yesu wubavutudila ti: [«Bwisi bu bukwe yilanga, lukwe tanga ti: "Ntangu yimbote yaaba, mu dyambu ti yulu dimbwaki didi." 3 Mpe mumene, lukwe tanga ti: "Bubedidi mvula yaanoka, mu dyambu ti yulu dilomba didi." Luzebi mu tanga bidimbu bi ku yulu, kansi bwedi luna lembolo bakudila bidimbu bi ntangu beyiyi e?] 4 Mbandu beyiyi yimbi na yi kinsuza yina sosa kidimbu, kansi ku kidimbu ki kaka kiba lulonka ko, tala ti ka ki mumbikudi Yona ko.» Mboki wusala basisa na wuyenda kwandi.

5 Milongoki bu basabuka ku simu dihiika, bazimbakana mu nata mampa. 6 Yesu wubateela ti: «Kebeno kweno! Mu kima ki Bafalisi na basaduki kikwe vimbisanga kiputi.» 7 Milongoki mi banza yawu na yawu ti: «Kana zonzila bobo mu dyambu ti tutwedi mampa ko.» 8 Yesu wubakula mayindu mawu, na wubateela ti: «Bila nki luna telasana ti luu na mampa ko e? Yeno bantu ba kiminu kifyoti ludi! 9 Luna bakula ko e? Luna bambuka moyo ko mu mampa matanu mu mafunda matanu ma babakala, na lutangu lu mikuta mi luyonzika e? 10 Na mampa nsambwadi mu mafunda maya ma babakala na lutangu lu mikuta mi luyonzika e? 11 Bwedi luna lembolo bakudila ti ka mu dyambu di mampa ko na luzonzidi e? Kansi kebeeno kweno mu kima ki Bafalisi na basaduki kikwe vimbisanga kiputi!»

12 Buna milongoki mi bakula ti ka mu dyambu di kima kikwe vimbisanga kiputi ki mampa ko kabalwengisila, kansi mu ndongosolo yi Bafalisi na basaduki.

13 Yesu wuyenda ku kizunga ki mbanza yi Kayisali yi Filipi. Wufuula milongoki myandi ti: «Mu nzonzolo zi bantu, Mwana Muntu nani kadi e?» 14 Bamuvutudila ti: «Bantu bana ta ti Yoane Mumbotiki wudi, bahiika ti Eliya, bahiika dyaka ti Yelemiya hoti wumosi mu mimbikudi.» 15 Na wubafuula ti: «Mbo yeno bwedi luna ta e? Meno nani nidi e?» 16 Simoni Petelo wumuvutudila ti: «Ngeye ni Klisto, mwana wu Nzambi yi Moyo!» 17 Yesu wumuteela ti: «Kyese kyaku, Simoni mwana wu Yona, mu dyambu ti ka nsuni na menga ko bi kubakusi misamu bemyomyo, kansi Tata ani wu ku mazulu. 18 Bwabu meno nakuteedidi ti, ngeye ni Petelo (mpila mosi tadi), mpe ha yulu tadi bedyodyo naatungila dibundu dyani, mpe myelo mi nsi yi bafwa milendi sa kima ko ha ntadisi andi. 19 Nina kuhaana nsabi zi Kimfumu ki mazulu: Mimvimba mi waakanga ha butoto myaakangama ku mazulu, mpe mi waanyanguna ha butoto myaanyanguka ku mazulu.» 20 Mboki Yesu wotoma kanikina milongoki myandi mulembolo we ta ku kani muntu ti yandi ni Klisto.

21 Tuka ntangu beyoyo, Yesu wutona mu zabikisa ku milongoki myandi ti fweti kwenda ku Yelusalemi, waayena mpasi zizingi ku bakuluntu, ku zimfumu zinganga-Nzambi na milongisi mi Misiku. Baamuhonda na mu kilumbu kitatu, waafuluka mu bafwa. 22 Petelo wunata Yesu ha luhengo na wutona mu musemba ti: «Mfumu! Bika Nzambi ka kukeba. Kaani, misamu bemyomyo milendi kutudila ko!» 23 Kansi, Yesu wubangumuka na wuteela Petelo ti: «Satana, nkatukila! Kikaku wudi mu nzila ani, mabanza maku ka mabanza ma Nzambi ko, kansi ma bantu.»

24 Ku manima, Yesu wuta ku milongoki myandi ti: «Tala ti muntu tiidi mu ba mulongoki ani , kakizimbakana yandi bende, kananguna kulunsi dyandi na kandanda. 25 Mu dyambu ti wonso muntu waasosa mu vukisa luzingu lwandi, lwaakahombisa. Kansi wonso muntu waahombisa luzingu lwandi mu dyambu dyani, lwaakavuukisa. 26 Nkye ndandu kwandi ku muntu beki bimvwama bi nza yimvimba, tala ti hombisi luzingu lwandi e? Hoti, nki muntu kalenda haana mu hingisa luzingu lwandi e? 27 Mwana Muntu waakwiza mu mukembo wu Tata andi na zimbazi zandi, buna waasenda muntu-muntu bonso buu mavanga mandi. 28 Wukedika nina luteela, mwa ndambu bantu mu yobobo ba haha, baakifwila ko tala ti bayeni ko Mwana Muntu wuna kwiza bonso ntinu.»